1. सृष्टि

इयां शुरु च परमेशरे सब चीज़ां री सृष्टि कित्ती। तिने छे दिनां च संसारा री कने जो किछ तिसच आ सबीं कजी री सृष्टि कित्ती। परमेशरा रे जरिये धरतिया जो रचणे ते बाद धरती नेहरी कने खाली थी, कांह्भई हुणा तकौ परमेशरे तिसच किसी बी चीजा जो नीं बणाया था। परमेशरा रा आत्मा पाणिये पर मण्डरावां था।

फेरी परमेशरे बोलया, “लोये हो!” कने लोये हुईगी। परमेशरे देक्खया भई लोये ठीक इ कने तिसो “दिन” बोलया। परमेशरे तिसो नेहरे ते लग कित्या इसो तिने “रात” बोलया। परमेशरे सृष्टि करने ते पेहले दिना च लोयी री रचना कित्ती।

सृष्टि करने ते दुज्जे दिना च परमेशरे बोल्या, “पाणिये रे उपर इक फर्क हो।” इक फर्क हुईग्या। परमेशरे तिस फर्का जो “आकाश” बोल्या।

तीज्जे दिन परमेशरे बोल्या, “पाणी इकी जगा पर कट्ठा हुई जाओ कने सुक्की धरती दुस्सो।” तिने सुक्किया धरतिया जो “पृथ्वी” बोल्या कने पाणिये जो “समुद्र” बोल्या। परमेशरे देक्खया भई जो किछ तिने बणाया था सै खरा था।

फेरी परमेशरे बोल्या, “पृथ्विया पर सबीं किस्मा रे पेड़ कने पौधे जम्मो।” कने येढ़ा इ हुआ। परमेशरे देक्खया भई जो किछ तिनें बणाया था सै खरा था।

सृष्टि करने ते चौथे दिना च परमेशरे बोल्या, “आकाश च जोतियाँ हो।” सुरज, चन्द्रमा कने तारागण प्रकट हुये। परमेशरे तिनां जो पृथ्विया पर लोये देणे खातर दिन कने रात, मौसमां कने सालां च फर्क करने खातर बणाया।

पँजवें दिन परमेशरे बोल्या, “जीवित प्राणी पाणिये जो भरी दो कने आकाशा च पक्षी उड़ो।” इसा किस्मा ते तिने पाणिये च तरने औले सब जन्तुआं जो कने पक्षियां जो बणाया। परमेशरे देक्खया भई ये खरा था कने तिनां जो आशीष दित्ति।

सृष्टिया रे छेवें दिना च परमेशरे बोल्या, “धरितया पर रेहणे औले सबीं किस्मा रे जानवर हो।” परमेशरा रे बोलणे रे मताबक येढा हुईग्या। किछ जानवर पालतु थे, किछ धरतिया पर रघड़ने औले कने किछ जंगली जानवर थे। परमेशरे देक्खया भई ये खरा था।

फेरी परमेशरे बोल्या, “आओ अहां माणुये जो अपणे स्वरुपा च कने अपणी समानता च बणाईये। तिनां धरतिया पर सबीं जानवरां पर प्रभुता करनी।”

इस खातर परमेशरे मिट्टी लईने तिसते माणुये जो बणाया कने तिसच जीवना रे साँसा जो फँक्कीत्या। इस माणुये रा नांव आदम था। परमेशरे आदमा रे रहणे खातर इक बड्डे बगीचे जो बणाया कने तिसरी देखभाल करने खातर आदमा जो तेथी रखी दित्या।

तिस बगीचे रे बीच परमेशरे दो खास डाल लाये - जीवना रा डाल कने भले-बुरे रे ज्ञाना रा डाल। परमेशरे आदमा ने बोल्या भई सै तिस बगीचे रे जीवना रे डाला कने भले-बुरे रे ज्ञाना रे डाला जो छड्डी ने होरीं सबीं डालां रे फलां जो खाई सकां। जे तिने तिस डाला रा फल खादया ता तिस मरी जाणा।

फेरी परमेशरे बोल्या, “माहणुये रा कल्ले रैहणा खरा नीं आ।” पर कोई बी जानवर आदमा रा साथी नीं हुई सक्या।

इस खातर परमेशरे आदमा जो गेहरी नींदा च पाईत्या। फेरी परमेशरे आदमा री इक पसली लईने तिसते इक जनाना री रचना कित्ती कने तिसा जो आदमा लौ लईने आया।

तजे आदमे तिसा जो देक्खया तां तिसाने गलाया, “होर नीं आ तां ये तां मेरे साई हई! ये ‘जनाना’ केहलाणी, कांह्भई ये माहणुये च ते बणाई गईरी।” इसा बजा तर माहणुये अपणे मौ-बुढ़े जो छड्डी ने अपणिया जनाना सौगी इक हुई जां।

परमेशरे आदमी कने औरता जो अपणे स्वरूपा च बणाया। परमेशरे तिनां जो आशीषां दित्तियां कने तिनां ने बोल्या, “बोहत सारी औलादां कने पोते-दोहते सौगी बधा कने धरतिया जो भरी देवा!” इयां परमेशरे देक्खया भई जो किछ तिनें बणाया था सै बोहत खरा था, कने सै तिना सबीं ते बोहत खुश था। ये सब किछ सृष्टि करने ते छेवें दिन हुआ था।

तजे सतवां दिन आया तां जो किछ परमेशर करे रां था तिने तिस सारे कम्मा जो खत्म कित्या। तिनें सतवें दिना जो आशीष दित्ती कने तिसो पवित्र ठैहराया, कांह्भई तिस दिन तिनें सबीं चीज़ां रे रचणे रा काम्म खत्म कित्या था। इयां परमेशरे संसारा री कने जो किछ तिसच आ तिनां सबीं री सृष्टि कित्ती।