2. पाप संसारा च औणा

आदम कने तिसरी जनाना परमेशरा रे जरिये तिनां खातर बणाई रे तिस सुन्दर बगीचे च खुशी-खुशी रहवां थे। तिनां च ते कोई बी कपड़े नीं पैहनदा था, फेरी भीं इसा गल्ला ते तिनां च ते कोई शर्मिन्दा नीं था, कांह्भई संसारा च पाप नीं था। सै तिस बगीचे च आवां जावां थे कने परमेशरा ने गल्लां करां थे।

पर तिस बगीचे च इक साप्प बी था। सै बोहत चलाक था। तिनें तिसा जनाना ते पुछेया, “क्या सच्ची परमेशरे तुहांने इस बगीचे रे किसी बी डाला रे फलां जो खाणे ते मना कित्तिरा?”

तिसे जनाने जवाब दित्या, “परमेशरे अहां ने बोलीरा भई अहें तिस भले कने बुरे रे ज्ञाना रे डाला ते अलावा किसी बी डाला रे फलां जो खाई सकांये। परमेशरे अहां ने गलाईरा भई जे तुहें तिस फला जो खादया या तिस्सो छुया बी, तां तुहां मरी जाना।”

तिने सप्पे जनाना जो जवाब दित्या, “ये सच्च नीं आ! तुहां नीं मरना। परमेशर जाणां भई तियां इ जे तुहां तिस फला जो खाणा, तुहां परमेशरा साई हुई जाणा कने तिस साई भले कने बुरे जो समझणे लगणा।”

तिसे जनाने देक्खया भई से फल दिला जो खरा लगणे औला कने स्वाद दुस्सेरां था। सै बी समझदार बनणा चाहवां थी, इस खातर तिसे फला जो तोड़ीने खाई लया। फेरी तिसे अपणे खसमा जो सै जे तिसा सौगी था सै फल दित्या कने तिने बी खाई लया।

इकदम ते, तिनां रियां आक्खीं खुली गियां कने तिनांजो पता लगया भई सै नंगे थे। तिनें पत्तेयां जो जोड़ी ने सित्या कने तिनांरे कपड़े बणाई ने तिनां ने अपणे शरीरां जो ढकणे री कोशत कित्ती।

तां आदम कने तिसरी जनाना जो तिस बगीचे च घुमदे परमेशरा री अवाज़ा जो सुणया। सै दोनो परमेशरा ते लुक्खीगे। तां परमेशरे आदमा जो अवाज लाई, “तु कित्ती आ?” आदमे जवाब दित्या, “ मैं तुहांजो बगीचे च औंदे सुणेया कने हऊं डरीग्या था, कांह्भई हऊं नंगा था। इस खातर हऊं लुक्खीग्या।”

फेरी परमेशरे पुछया, “तिज्जो किने दस्सेया भई तू नंगा आ? क्या तैं सै फल खादिरा तिसो ने खाणे खातर मैं तिझो मना कित्या था?” आदमे जवाब दित्या, “तुहें मिंज्जो ये जनाना दित्तिरी इसे इ मिंजो सै फल दित्या।” तां परमेशरे जनाना ते पुछया, “तैं ये क्या कित्तिरा?” सै जनाना गलाई, “सप्पे मिंजो धोखा दित्तिरा।”

परमेशरे सप्पा ने बोलया, “तु स्रापित आ! तु अपणे पेटा रे भार चले करना कने मिट्टी चाटगा। तू कने ये जनाना इक दुज्जे ते घृणा करनी, कने तेरी औलादां कने तिसरी औलादां बी इकी दुज्जे ते घृणा करनी। इसा जनाना रे वंशजां तेरे सिरा जो कुचलणा कने तू तिसरिया अड्डिया जो दसणा।”

तां परमेशरे जनाना ने बोलया, “मांह तेरी औलाद पैदा करने रिया दर्दा जो बोहत बधाणा। तेरी लालसा अपणे खसमा खा हुणी कने तिस तुझ पर प्रभुता करनी।”

परमेशरे आदमा ने गलाया, “तैं अपणिया जनाना री सुणी कने मेरे हुक्म नीं मन्ने। इस खातर धरती सर्आपित हुईरी कने तिजो रोटिया खातर कठण मेहणत करने री जरुरत हुणी। हुण तू मरी जाणा कने तेरी देह मिट्टिया च मिली जाणी।” तिस माहणुये अपणी जनाना रा नांव हव्वा रखया, तिसरा मतलब आ “जीवन देणे औली”, कांह्भई तिसा सब जातियां री माता हुणी। परमेशरे आदम कने हव्वा जो जानवरा री खल्लां ते बणिरे कपड़े पहनाये।

फेरी परमेशरे बोलया, “हुण भले कने बुरे जो जाणने ते माहणु अहां साई हुई गरा, इस खातर तिनां जो जीवनां रे डाला रा फल खाणे नीं देणा चाहिंदा भई सै सदा खातर जीऊंदे रओ।” इस खातर परमेशरे आदम कने हव्वा जो तिस बगीचे ते बाहर नकाली दित्या। परमेशरे किसी जो बी तिस जीवना रे डाला रे फल खाणे ते रोकणे खातर तिस बगीचे जो जाणे औले दरवाजे पर ताकतवर स्वर्गदूतां जो बठाई दित्या।