3. बाढ़

बोहत बगता ते बाद, संसारा च बोहत सारे लोक रैहणे लगीगे। सै बोहत दुष्ट कने पद्रवी हुई गे थे। ये इतना बुरा था भई परमेशरे मते पाणिये ने इस पूरे संसारा जो नष्ट करने रा निर्णय लया।

परमेशर नूहा ते खुश था। सै दुष्ट माहणुआं रे बिच्च रैहणे औला इक धर्मी माहणु था। परमेशरे नूहा जो दस्या भई सै मती बाढ़ भेजणे औला आ। इसा बजहा ते, तिने नूहा जो इक बड्डा जहाज बनाणे खातर बोल्या।

परमेशरे नूहा जो लगभग 140 मीटर लंबा, 23 मीटर चौड़ा कने 13.5 मीटर उच्चा जहाज बनाणे खातर बोल्या। नूहा जो इसो लकड़िया ते बनाणा था कने तिसच तीन्न मंजलां, मते सारे कमरे, इक छत कने इक खिड़की बनाणी थी। सै जहाज नूह, तिसरे टबरा कने धरतिया रे हर किस्मा रे जानवरां जो बाढ़ा ते बचाणे खातर थी।

नूहे परमेशरा री गल्ल मन्नी। तिने कने तिसरे पुत्रें तेढ़ा इ जहाज बणाया तेढ़ा जे परमेशरे दस्सिरा था। कांह्भई सै जहाज बोहत बड्डा था इस खातर तिस्सो बनाणे च कई साल लगे। नूहे लोकां जो औणे औलिया बाढ़ा रे बारे चेतावनी दित्ती कने तिनां जो परमेशरा री भक्ति करने खातर बोल्या, पर तिनें तिस पर विस्वास नीं कित्या।

परमेशरे नूह कने तिसरे चबरा जो अपणे खातर कने जानवरां खातर खाणे रा समान कठेरने रा हुक्म बी दित्या। तजे सब किछ त्यार था, तां परमेशरे नूहा ने बोल्या भई ये बगत तिसरे, तिस रिया जनाना रे, कने तिन्नां पुत्रां रे कने तिनां रियां जनानां रे - कुल मलाई ने आठ माहणुआं रे जहाजा चौ औणे रा था।

परमेशरे सारे जानवरां कने पंछियाँ च ते नर कने मादा जो नूहा लौ भेज्या भई सै जहाजा चौ जाई सको कने बाढ़ा रे बगता बचीने रई सको। परमेशरे येढ़े हर किस्मा रे जानवरां च ते सात्त नर कने सात्त मादा जो भेज्या सै जे बलि चढ़ाणे रे कम्मा आई सको। तजे सै सब जहाजा च पुज्जीगे तां अप्पुं परमेशरे जहाजा रे दरवाजे जो बंद करीत्या।

तां बरखा पौणे शुरू हुई कने बरखा हुंदी गई, हुंदी गई। बिना रूके चाली दिन कने चाली रात तकौ बरखा हुंदी रई। सारे संसारा री हर इक चीज़, येथी तकौ भई उच्चे ते उच्चे पहाड़ बी पाणिये च डुब्बीगे।

सुक्की धरतिया पर रैहणे औली हर इक चीज खत्म हुई गी, तिनां लोकां कने जानवरां ते अलावा सै जे जहाजा च थे। सै जहाज पाणिये पर तरदा रैया कने जहाजा रे अन्दरा री हर इक चीजां जो डुबणे ते बचाई ने रखेया।

बरखा रे रूकणे ते बाद, पाँज्ज महीनेयां तकौ सै जहाज पाणिये पर तैरदा रैया कने तिस बगता रे बिच्च पाणी घट हुणे लगेया था। तां इक दिन सै जहाज इक पहाड़ा रिया चुंडिया पर टिकी गया, पर संसारा च अजें बी पानी भरीरा था। तीन्न महीने ते बाद, पहाड़ां रियां चुंडियाँ दुसणे लगीयां थियां।

फेरी होर चाली दिनां ते बाद, नूहे इकी कावा जो ये देखणे खातर बाहर भेज्या भई क्या पाणी सुक्कीग्या था। सै कऔ सुक्किया धरतिया जो टोलदा इखा-उखा उड़दा रैया, पर तिसो येढ़ी जगा नीं मिली।

फेरी बाद च नूहे इक कबुतरिया जो बाहर भेज्या। पर तिसो बी कोई सुक्की धरती नीं मिली, इस खातर सै नुहा लौ बापस आईगी। इक हफ्ते ते बाद तिनें तिसा कबुतरिया जो फेरी ते भेज्या कने सै अपणिया चुँजा च जैतुना री इक डाली लई ने बापस आई। पाणी घटे रां था कने पौधे फेरी ते जमणे लगे थे।

नूहे इकी हफ्ते होर रूकी ने तीज्जी बार तिसा कबूतरिया जो बाहर भेज्या। इस बार तिसा जो टिकणे री जगा मिली गी कने सै बापस नीं आई। पाणी सुक्के रां था।

दो महीने ते बाद परमेशरे नूहा ने बोल्या, “हुण तू कने तेरा टबर कने सारे जानवर जहाजा ते बाहरौ आये। बोहत सारी औलादां कने पोते-पड़पोते पैदा करा कने धरतिया जो भरी दो।” आखर च नूह कने तिसरा सारा टबर जहाजा ते बाहर निकली आये।

नूहा रे जहाजा ते बाहर औणे ते बाद, तिनें इक इक वेदी बणाई कने बलिया खातर चढ़ाणे जोगे हर किस्मा रे जानवरां च ते किछ लईने बलि चढ़ाई। परमेशर तिस बलिदाना ते खुश हुआ कने नूह कने तिसरे टबरा जो आशीष दित्ती।

परमेशरे बोल्या, हऊं वादा करां भई माहणुआं रे जरिये कित्ते जाणे औले बुरे कम्मां रिया वजहा ते फेरी कदी धरतिया जो श्राप नीं देणा या बाढ़ा रे जरिये संसारा जो नष्ट नीं करना, तांबी माणु अपणे बचपना रे बगता ते इ पापी हुआं।

फेरी परमेशरे अपणे कित्तिरे वायदे रे नशाणा रे तौरा च पैहला मेघधनुषा जो बणाया। तजे कदी बी आसमाना च मेघधनुष दुस्सगा, तां परमेशरा जो कने तिसरे लोकां जो बी कित्तिरा वायदा ये याद औणा।