4. अब्राहमा सौगी परमेशरा रा वायदा

बाढ़ा ते कई सालां ते बाद, संसारा च बोहत लोक रये करां थे, कने तिनें फेरी ते परमेशरा रे कने इकी दुज्जे रे बरोधा च पाप कित्या। कांह्भई से इक इ भाषा बोला थे, इस खातर सै कट्ठे हुये कने संसारा जो भरी देणे रे परमेशरा रे हुक्मा जो मनणे री बजाये इक इ नगर बनाणे लगे।

सै बोहत घमण्डी थे कने अपणे जीवना जो जीणे रे बारे च सै परमेशरा रे हुक्मां रा पालन नीं करना चाहंदे थे। येथी तकौ भई तिनें इक येढ़ी मीनारा जो बनाणा शुरू कित्या सै जे स्वर्गा तकौ पुज्जो। परमेशरे देक्खेया भई जे सै सौगी मिली ने बुरा ई करदे रैंहगे तां सै बड्डे-बड्डे पापां रे कम्मां जो करी सकांये।

इस खातर परमेशरे तिनां री भाषा जो मत्तियां भाषावां च बदली दित्या कने तिनां लोकां जो सारे संसारा च फैलाई दित्या। तिस नगरा जो तिनें बनाणा शुरू कित्या था तिसरा नौं बाबेल पया, इसरा मतलब आ “गड़बड़ी”।

कई हजारां सालां ते बाद, परमेशरे अब्राम नौं रे इकी माणुये ने गल्लां कित्तियां। परमेशरे तिसने बोल्या, “अपणे देश कने टबरा जो छड्डी ने तिस देशा जो चली जा सै जे मांह तिज्जो दसणा। मांह तिज्जो आशीष देणी कने तेरते इक बड्डी जाति बनाणी। मांह तेरा नौं महान करना। सै जे तिज्जो आशीष देओ मांह बी तिस्सो आशीष देणी, कने सै जे तिज्जो श्राप देओ तिसो श्राप देणा। तेरिया बजहा ते संसारा रे सारे कुलां जो आशीष मिलणी।”

इस खातर अब्रामे परमेशरा री गल्ल मन्नी। तिनें अपणे सारे सेवकां कने अपणी सारी सम्पतिया समेत अपणी पत्नी सारै जो लईने तिस देशा ते कनान देशा जो चलीग्या सै जे परमेशरे तिस्सो दस्सेया था।

तजे अब्राम कनान च पुज्जेया तां परमेशरे तिसने बोल्या, “अपणे चऊं तरफा देख। मां तिज्जो ये सारा देश देणा कने तेरे वंशजां सदा खातर इस पर अधिकार रखणा।” तां अब्राम तिस देशा च बसी गया।

मलिकिसिदक नौं रा इक माहणु था सै जे सबते उच्चे परमेशरा रा याजक था। इक दिन तजे अब्राम युध्द करने ते बाद आये रां था तां सै कने अब्राम मिले। मलिकिसिदके अब्रामा जो आशीष दित्ती कने बोल्या, “सर्वोच्च परमेशर सै जे स्वर्ग कने धरतिया रा मालक आ तिस तिज्जो आशीष देणी।” फेरी अब्रामे युध्दा च जीती रियां सारिया चीज़ा रा दसवां हिस्सा मलिकिसिदक जो दित्या।

कई साल बीती गे, पर अजें बी अब्राम कने सारा रे कोई पुत्र नीं था। परमेशरे अब्रामा ने गल्ल कित्ती कने फेरी ते वायदे कित्या भई तिसरे इक पुत्र जमणा कने तियां जे आकाशा च तारे ये तियां इ तिसरे बोहत सारे वंशज हुणे। अब्रामे परमेशरा री प्रतिज्ञा पर विस्वास कित्या। परमेशरे घोषणा कित्ती भई अब्राम इक धर्मी माहणु था कांह्भई तिने परमेशरा रे वायदे पर विस्वास कित्या था।

तां परमेशरे अब्रामा सौगी इक वाचा बन्नी। आमतौरा ते, इक वाचा दूईं दलां रे बिच्च इकी दुज्जे खातर किसी कम्मा जो करने खातर इक समझौता हुआं। परमेशरे अब्रामा ने सै प्रतिज्ञा तां कित्ती थी तजे अब्राम सये रां था, पर सै तां बी परमेशरा जो सुणी सक्कां था। परमेशरे बोल्या, “मांह तेरा इक पुत्र तेरे शरीरा रे जरिये पैदा हुईरा देणा। मांह तेरे वंशजां जो ये कनान देश देआं।” पर अजें तकौ बी अब्रामा रे कोई औलाद नीं थी।