5. वायदे रा पुत्र

अब्राम कने सारै रे कनान पुजणे रे दस सालां ते बाद बी तिनां ले कोई औलाद नीं थी। इस खातर, अब्रामा री जनाना सारै तिसने बोल्या, “देख परमेशरे अजें तकौ बी मिंज्जो औलाद पैदा करने जोगा नीं बणाया कने हुण हऊं औलाद पैदा करने खातर बुढी हुई गरी, देख, मेरी दासी हाजिरा येथी इ। तिसा ने ब्याह करी ले भई सै मेरे कने तेरे खातर इक औलाद पैदा करी सको।”

इस खातर अब्रामे हाजिरा ने ब्याह करी लया। हाजिरा रे इक पुत्र जम्मेया कने अब्रामे तिसरा नौं इश्माएल रखेया। पर सारै हाजिरा ते जलणे लगी। तजे इश्माएल तेराह सालां रा था, परमेशरे फेरी बीं अब्रामा ने गल्लां कित्तियां।

परमेशरे बोल्या, “हऊं सर्व-शक्तिमान परमेशर आ। मांह तेरने सौगी इक वाचा बन्नणी।” तां अब्राम धरितया पर पईने मथा टेक्या। परमेशरे अब्रामा ने ये बी बोल्या, “तू बोहत सारियां जातियां रा पिता हुणा। मांह तिज्जो कने तेरे वंशजां जो तिनां री अपणी जमीन हुणे खातर कनान देश देणा कने मांह सदा खातर तिनां रा परमेशर हुणा। तिज्जो अपणे घराने रे हरेक माणुये रा खतना करने पौणा।

“तेरी जनाना सारै रे इक पुत्र पैदा हुणा - सै वायदे रा पुत्र हुणा। तिसरा नौं इसहाक रखेयां। मांह तिस सौगी अपणी वाचा जो बणाई रखणा कने तिसते इक बड्डा समाज बणाया जाणा। मांह इश्माएला ते बी इक बड्डा समाज बनाणां, पर मेरी वाचा इसहाका सौगी रैहणी।” तां परमेशरे अब्रामा रा नौं बदली ने अब्राहम रखीत्या, तिसरा मतलब आ “बोहतीं रा पिता”। परमेशरे सारै रा बी नौं बदली ने सारा करित्या, तिसरा मतलब आ “मूलमाता”।

तिस दिन अब्राहमे अपणे घराने रे सबीं माहणुआं रा खतना कित्या। कोई इक साला ते बाद, तजे अब्राहम 100 साला रिया उम्रा रा था कने सारा 90 सालां री थी, तां सारे अब्राहमा रे पुत्रा जो पैदा कित्या। तेढ़ा जे परमेशरे तिनां जो बोल्या था तिनें तिसरा नौं इसहाक रखेया।

तजे इसहाक जवान हुआ तां परमेशरे ये बोलीने अब्राहमा रे विस्वासा री परीक्षा कित्ती, “अपणे इकलौते पुत्रा जो लै कनेस तिसो मेरे खातर बलिया रे तौरा च मारी दे।” फेरी अब्राहमे परमेशरा री गल्ल मन्नी कने अपणे पुत्रा जो बलि करने खातर त्यार कित्या।

तजे अब्राहम कने इसहाक बलि चढ़ाने रिया जगहा खौ जाणे लगे तां इसहाके पुछेया, “हे मेरे पिता, अहांले बलि चढ़ाने खातर लकड़ियाँ तां हई, पर बलि करने रा मेम्ना कित्ति आ?” अब्राहमे जवाब दित्या, “हे मेरे पुत्र, परमेशरा बलि करने खातर मेम्ने रा इंतजाम करना।”

तजे सै बलि चढ़ाने रिया जगहा पुज्जिगे, तां अब्राहमे इसहाका जो बन्नी ने वेदिया पर लटाई तय। सै अपणे पुत्रा जो मारने इ औला था भई परमेशरे बोल्या, “रुकी जा! लड़के रा कोई नुक्सान नीं कर! हुण हऊं जाणी गया भई तू मेरा डर मन्नां कांह्भई तैं अपणे इकलौते पुत्रा जो बी मेरते बचाई ने नीं रख्या।”

सौगी इ अब्राहमे इकी मिन्डे जो देक्खया सै जे झाड़ियां स फस्सिरा था। इसहाका रे बदले बलिया खातर परमेशरे मिन्डे रा इन्तजाम कित्या था। अब्राहमे खुशी-खुशी मिन्डे री बलि चढ़ाई।

तां परमेशरे अब्राहमा ने गलाया, “कांह्भई तू मेरे खातर सब कुछ देणे जो त्यार था, येथी तकौ भई अपणे इकलौते पुत्रा जो बी, इस खातर हऊं तिज्जो आशीष देणे रा वाचा करां। तेरे वंशज आकाशा रे तारेयां ते बी जादा हुणे। कांह्भई तैं मेरे हुक्मां जो मन्निरा इस खातर मांह तेरे टबरा रे जरिये संसारा रे सबीं कुलां जो बी आशीष देणी।”