12. निकली ने जाणा

इस्राएली लोक मिस्रा ते निकली ने बोहत खुश थे। सै सब दास नीं थे कने सै वादे औले देशा जो जाये रांथे! जो किछ बी इस्राएलियें मंगेया, मिस्रियें तिनां जो सब चीज़ां दित्तियां, इनां च सोना कने चाँदी कने होर कीमती चीज़ां बी थियां। दुज्जे देशा रे किछ लोकें परमेशरा पर विस्वास कित्या कने सब इस्राएली लोक मिस्र ते निकले तां सै बी तिनां सौगी चलीपे।

दिनें बोहत बड्डा बादलां रा झुण्ड खम्बे साई तिनांरे अग्गे-अग्गे चलां था; कने राति रे बगता ये अग्गी रा खम्बा बणी जां था भई तिनां सबीं जो लोये हो। परमेशर हमेशा तिस बदलां रे खम्बे च कने अग्गीरे खम्बे च तिनां सौगी था कने तिने यात्रा करदे बगता तिनांरी अगुवाई कित्ती। तिनां जो सिर्फ तिसरे पीछे चलणा पौणा था।

थोड़े बगता ते बाद फिरौन कने तिसरे लोकें अपणे मना जो बदली दित्या। सै इस्राएलियां जो फेरी ते अपणा दास बनाणां चाहवां थे। इस खातर तिनें इस्राएलियां रा पीछा कित्य। ये परमेशर इ था तिनें जे तिनांरे मनां जो बदली दित्या था। तिनें येढा इस खातर कित्या कांह्भई सै चाहवां था भई हर कोई ये जाणी लो भई यहोवा, फिरौना ते कने मिस्रियां रे सबीं देवतयां ते जादा ताकता औला आ।

तजे इस्राएलियें मिस्र री सेना जो औंदे देख्या तां तिनां जो पता लगेया भई सै फिरौना री सेना कने लाल समुद्रा रे बीच फसी गरे। सै बोहत डरी गे कने रोणे लगे, “अहें मिस्र जो कैं छड्डया? अहें हुण मरने औले ये!”

मूसे इस्राएलियां ने बोल्या, “डरदे मता! परमेशरा आज्ज तुहां खातर लड़ना कने तुहांजो बचाणा।” तां परमेशरे मूसा ने बोल्या, इनां लोकां जो लाल समुद्रा खौ अग्गे बधणे जो बोल।”

तां परमेशरे तिस बदला रे खम्बे जो लईने इस्राएलियां कने मिस्रियां रे बीच करी दित्या भई मिस्री लोक इस्राएलियां जो देखी नीं सको।

परमेशरे मूसा जो समुद्रा खौ अपणा हात्थ बधाणे खातर गलाया। फेरी परमेशरे हवा ते समुद्रा रे पाणिये जो अखा कने बखा खौ करवाई दित्या, तिसते भई समुद्रा चीयें हुईने इक रस्ता बणी गया।

इस्राएली लोक अपणे दुईं पासेयां पाणिये रिया दीवारा सौगी सुक्की धरतिया पर समुद्रा चीयें अग्गे बधीने चलीपे।

तां परमेशरे तिस रस्ते ते बदलां जो चकी लया भई मिस्री लोक इस्राएलियां जो बची ने जांदे देखो। मिस्रियें तिनां जो पकड़ने खातर तिनांरा पीछा करने रा निर्णय लया।

इस खातर तिनें समुद्रा रे बीच तिस रस्ते पर इस्राएलियां रा पीछा कित्या, पर परमेशरे मिस्रियां जो घबराई दित्या कने तिनां रे रथां जो तेथी फसाई दित्या। सै रढ़ाणे लगे, “नट्ठा! इस्राएलियां खा ते परमेशर लड़े रां आ!”

सारे इस्राएली समुद्रा रे दुज्जे कनारे पुज्जी गे। तां परमेशरे मूसा ने गलाया भई सै फेरी ते पाणिये खौ हात्थ बधाओ। तजे मूसे येढ़ा कित्या, तां पाणी अपणिया पैहलकिया जगा चौ आई गया कने मिस्री सेना पर पई गया, सारी मिस्री सेना डूब्बी गी।

तजे इस्राएलियें देख्या भई मिस्री मरी गे थे तां तिनें परमेशरा पर विस्वास कित्या। तिनां जो ये विस्वास हुई गया भई मूसा परमेशरा खा ते भविष्यव्दक्ता था।

इस्राएली लोक इस खातर बी बोहत खुश थे कांह्भई परमेशरे तिनां जो मरने ते कने दास बणने ते बचाई लरा था। हुण सै परमेशरा री अराधना करने कने तिसरे हुक्मा रा पालन करने खातर स्वतंत्र थे। इस्राएलिये अपणी स्वतंत्रता री खुशी मनाणे खातर कने परमेशरा री प्रशंसा खातर, कई गीत गाये कांह्भई तिनें तिनांजो मिस्रियां री सेना ते बचाया था।

परमेशरे इस्राएलियां जो हर साल इक त्योहार मनाणे रा हुक्म दित्या भई तिनां जो ये याद रौ भई कियां परमेशरे मिस्रियां जो हराया कने तिनांजो दास हुणे खातर स्वतंत्र कित्या। ये फसह रा त्योहार केहलाया था। इसच तिनां जो इतरा त्योहार मनाणे खातर इक ठीक-ठाक मेमने जो बलि करने पौणा, तिसो भुन्णा था कने बिना खमीरा औलिया रोटिया सौगी खाणा था।