11. फसह

परमेशरे मूसा कने हारूना जो फिरौना ले ये गलाणे खातर भेज्या भई इस्राएलियां जो जाणे दे। तिनें तिसो चेतावनी दित्ती भई जे सै तिनां जो जाणे नीं देंगा, तां परमेशरे मिस्रा रे लोकां रे कन जानवरां रे सबीं पैहलौठेयां जो मारी देणा। फिरौने ये सुणी ने बी परमेशरा पर विस्वास करने री बजाये तिसरी गल्ला जो मनणे ते मना करी दित्या।

परमेशरे तिस पर विस्वास करणे औले किसी रे बी पैहलौठे पुत्रा जो बचाणे खातर इक इंतजाम कित्या। हर टबरा जो इक निष्कलंक मेमने जो लईने तिसरा बलिदान करने पौणा था।

परमेशरे इस्राएलियां ने तिस मेमने रे लहुये जो लईने अपणे घरां रियां व्दार साखां पर लाणे जो बोल्या। तिनां जो तिसरे मासा जो भून्नि ने फेरी तिसो अखमीरी रोटिया सौगी तेजिया ने खाणा था। तिनें तिसा रोटिया जो खाणे ते बाद तिनां जो इकदम मिस्र जो छड्डणे जो बी त्यार रैहणे खातर गलाया।

तेढा करने खातर परमेशरे इस्राएलियां जो हुक्म दित्या था तिनें तिसरे मताबक सब किछ कित्या। अधिया राति च, परमेशरे हर इक पैहलौठेयां बच्चेयां जो घात करदे हुये मिस्र रे बिच्च हुईने गया।

इस्राएलियां रे हर इक घरा रे दरवाजेया पर लहू लगीरा था, इस खातर परमेशरे तिनां घरां जो छड्डी दित्या। तिनां अन्दर सब लोक सुरक्षित थे। सै मेमने रे लहू रिया बजहा ते बची गे थे।

पर मिस्रियें परमेशरा पर विस्वास नीं कित्या था कने तिसरे हुक्मां जो नीं मन्नेया था। इस खातर परमेशरे तिनांरे घरां जो नीं छड्डेया। परमेशरे मिस्रियां रे हर इक पैहलौठे पुत्रां जो मारी दित्या।

कैद खाने रे कैदियां रे पैहलौठेयां ते लईने, फिरौना रे पैहलौठे तको, हर इक पैहलौठा नर मरी गया। अपनणिया गेहरिया दरदा रिया वजहा ते मिस्री लोक बोहत रोये रां थे कने दुख मनाये रां थे।

तिसा राति, फिरौने मूसा कने हारूना जो सद्देया कने बोल्या, “इस्राएलियां जो लईने इकदम मिस्र ते निकली जाओ!” मिस्र रे लोकें बी इस्राएलियां ते इकदम निलणे खातर तिनां जो गलाया।