10. दस्स विपत्तियाँ

परमेशरे मूसा कने हारूना जो चेतावनी दित्ती भई फिरौना अपणा मन कठोर करी देणा। तजे सै फिरौना ले पुज्जे तां तिनें बोल्या, “इस्राएला रा परमेशर येढ़ा बोलां, ‘मेरे लोकां जो जाणे दे!’” पर फिरौनए तिनां री नीं सुणी कने इस्राएलियां जो जाणे खातर अजाद करने री बजाये तिनें तिनां जो होर कठण मेहणत करने रे खातर मजबूर कित्या।

फिरौन तिनां लोकां जो भेजणे ते मना करदा रैया, इस खातर परमेशरे मिस्र पर दस भयानक विपत्तियां भेजियां। इना विपत्तियां रे जरिये, परमेशरे फिरौना जो दस्सेया भई सै फिरौन कने मिस्रा रे देवतेयां ते जादा ताकता औला आ।

परमेशरे नील नदिया रे पाणिये जो खून बणाई दित्या, पर फिरौने अजें बी इस्राएलियां जो जाणे नीं दित्या।

परमेशरे सारे मिस्रा च मेनके भेजे। फिरौने मेनकेयां जो दूर करने खाते मूसा ते विनती कित्ती। पर सबीं मेनकां रे मरी जाणे ते बाद, फिरौने अपणे मन जो कठण करी लया कने इस्राएलियां जो मिस्रा ते निकलणे दित्या।

इस खातर परमेशरे कुटकियां री विपत्ति भेज्जी। तिसते बाद डाँसां री विपत्ति भेज्जी। फिरौने मूसा कने हारुना जो सदेया कने तिसने गलाया भई जे तिसा विपत्तिया जो रोकी दे तां इस्राएली मिस्रा जो छड्डी ने जाई सक्कांये। मूसा रिया प्राथना करने ते परमेशरे मिस्र परा ते डाँसां जो हटाई दित्या। पर फिरौने अपणे मना जो कठोर करी लया कने तिनां लोकां जो स्वतंत्र हुई ने जाणे नीं दित्या।

इसते अग्गे, परमेशरे मिस्रियाँ रे सबीं पालतू जानवरां जो बमार हुईने मरी जाणे दित्या। पर फिरौना रा मन कठोर हुई गया था कने तिनें इस्राएलियां जो जाणे नीं दित्या।

तां परमेशरे मूसा जो फिरौना रे सामणे हवा च सवाह डुआणे खातर बोल्या। तजे तिनें येढा कित्या तां मिस्रा रे लोकां रिया चमड़िया पर पीड़ देणे औले फोड़े निकली गे, पर इस्राएलियां जो किछ मनी हुआ। परमेशरे फिरौना रे मना जो कठोर करी दित्या कने फिरौने इस्राएलियां जो अजाद करीने जाणे नीं दित्या।

इसते बाद परमेशरे आणा रे बड्डे गोले सट्टे कने मिस्रा री सारियां फसलां जो नास करी दित्या कने जो कोई बी बाहरा जो निकलया सै मारे गये। फिरौने मूसा कने हारूना जो सद्दया कने तिनें गलाया, “मैं पाप कित्तिरा। तुहें लोक जाई सक्कांये।” इस खातर मूसा रे प्राथना करने ते आकाशा ते आण पौने ते रूकी गी।

पर फिरौने फेरी ते पाप कित्या कने अपणे मना जो कठोर करी लया। तिनें इस्राएलियां जो अजाद हुईने जाणे नीं दित्या।

इस खातर परमेशरे मिस्र पर टिड्डियां रे झुण्डां जो भेज्या। इनें टिड्डियें तिनां सारियां फसलां जो खाई लया तिनां जो ने आणी ते नास नीं कित्या था।

फिरी परमेशरे नेहरा करी दित्या से जे तीन्नां दिनां तकौ छाईरा रैया। ये इतना घणा था भई मिस्री लोक अपणे घरां ते निकली नीं सके। पर तेथी जे इस्राएली लोक रैयां थे तेथी लोये थी।

इनां नौ विपत्तियां ते बाद बी, फिरौने इस्राएलियां जो अजाद हुईने भेजणे ते मना करी दित्या। इस खातर भई फिरौने नीं सुणीरा था परमेशरे इक आखरी विपत्ति भेजणे री योजना बणाई। ये फिरौना रे मना ज बदली देंगी।