9. परमेशर मूसा जो सद्दां

यूसुफा रे मरने ते बाद तिसरे सब रिश्तेदार मिस्र च बसी गये। सै कने तिनां रे वंशज कईयां सालां तकौ मिस्रा च ई रई गये कने तिनां ते बोहत औलादां जम्मियां। सै इस्राएली कैहलाये।

कई सौ सालां ते बाद, इस्राएलियां री संख्या बोहत बधी गी थी। मिस्री लोक हुण इसा गल्ला खातर धन्यवादी नीं थे भई तिनां री मद्द करने खातर यूसुफे बोहत किछ कित्या था। सै इस्राएलियां ते डरी गये कांह्भई सै गिणतिया च तिनां ते बोहत जादा थे। इस खातर तिस बगता मिस्र पर राज करने औले फिरौने इस्राएलियां जो मिस्रियां रा दास बणाई दित्या।

मिस्रियें इस्राएलियां जो बोहत सारियां इमारतां कने कई नगरां जो बनाणे खातर मजबूर कित्या। तिस कठण मेहणता ते तिनां रे जीवन बड़े दुख दाई बणाई दित्ते, पर परमेशरे तिनां जो आशीषां दित्तियां कने तिनां रे होर बी जादा औलादां पैदा हुईयां।

फिरौने देख्या भई इस्राएलियां रे बोहत औलादां पैदा हुये रां थियां, इस खातर तिने अपणे कर्मचारियां जो इस्राएलियां रे सबीं नर बच्चेयां जो नील नदिया च सट्टी देणे ते मारी देणे रा हुक्म दित्या।

इक इस्राएली जनाने इक नर बच्चे जो जन्म दित्या। तिसे कने तिसारे पतिये तितना जे संभव हुआ तितना जे तिनां ते हुई सक्या तिस बच्चे जो छुपाई ने रख्या।

तजे तिस बच्चे रे माता कने पिते तिसो होर जादा नीं लुखाई ने रखी सके, तां तिनें तिसो मारी देणे ते बचाणे खातर इक तैरने जोगी टोकरिया च नील नदिया रे कनारे पर सरकंडेयां रे बीच रखी दित्या। तिसरी बड्डी बैहणे ये देखणे खातर तिसरी निगरानी कित्ती भई तिसने क्या हुंगा।

फिरौना रिया पुत्रिये तिसा टोकरिया जो देखी कने तिसरे अन्दर झाँकेया। तजे तिसे इक बच्चा देख्या तां तिसे तिसो अपणे बच्चे रे तौरा च लई लया। तिसे इक इस्राएली जनाना जो तिसो दुध पयाणे खातर कम्मा पर रखी लया, बिना ये जाणे भई सै तिस बच्चे री असली मौ थी। तजे सै बच्चा इतना बड्डा हुई गया भई हुण तिसो अपणी माता रे दुधा री जरुरत नीं थी, तां तिसे फिरौना री पुत्रिया ला जो तिसो बापस करी दित्या, तिसरा नौं मूसा था।

इक दिन, तजे मूसा बड्डा हुई गया था, तां तिसे दिख्या भई इक मिस्री इस इस्राएलिये जो कुट्या रां आ। मूसे अपणे साथी इस्राएलियां जो बचाणे री कोशत कित्ती।

तजे मूसे सोचया भई तिसो कोई नीं देख्या रदा तां तिने तिस मिस्रिये जो मारी दित्या कने तिसरिया लाशा जो दबाई दित्या। पर मूसे जो किछ कित्या था तिसो किसी देखी लया था।

फिरौना जो पता लगी गया भई मूसे क्य कित्तिरा। तिने तिसो मारी देणे री कोशत कित्ती, पर मूसा मिस्र रे जंगला चौ नह्ठी गया। फिरौना रे सैनिक तिसो तेथी टोली नीं सके।

मिस्र ते दूर जंगला च मूसा इक चरवाहा बणी गया था। तिने तेथी इकी जनाना ने ब्याह करी लया कने दो बच्चे पैदा कित्ते।

मूसा अपणे सौरे रियां भेडां रे झुंडा री देखभाल करां था। इक दिन, तिने इक फुखदी झाड़िया जो देख्या सै जे भस्म नीं हुंदी थी पर फुख्या ई रां थी। तिसा जो देखणे खातर सै तिसा झाड़िया रे नेड़े गया। तजे सै तिसा रे बड़े नेड़े था तां परमेशरे तिस ने गल्लां कित्तियां। तिसे बोल्या, “हे मूसा, अपणे जूत्तेयां जो तुआरी दे। तू इक पवित्र जगहा पर खड़ीरा।”

परमेशरे बोल्या, “मैं अपणे लोकां रे दुखां जो देखिरा। मांह तिज्जो फिरौना ला जो भेजणा तां भई तू इस्राएलियां जो मिस्र रिया दासता ते कह्डी ने लयौणा। मांह तिनां जो कनान देश देणा, सै देश तिसरा जे मैं अब्राहम, इसहाक कने याकूबा ने वायदा कित्तिरा।”

मूसे पूछया, “जे लोकें जाणना चाह्या भई मिंज्जो किने भेज्जिरा तां मांह क्या बोलणा?” परमेशरे गलाया, “सै जे हऊं हया सै ई आ। तिने बोल्या, “सै जे मैं आ तिनें मिंज्जो तुहां ला जो भेज्जी रा।’ तिने ये बी गलाया, ‘हऊँ तुहांरे पूवर्जां अब्राहम, इसहाक कने याकूबा रा परमेशर यहोवा आ।’ मेरा ये नौं सदा रा आ।”

मूसा डरां था कने फिरौना ला जो जाणा नीं चांह्दा था कांह्भई तिने सोच्या भई सै खरे तरीके ने नीं गलाई सकदा, इस खातर परमेशरे मूसा रे भाई हारूना, जो तिसरी मद्द करने खातर भेज्या।