8. परमेशर यूसुफ कने तिसरे टबरा जो बचावां

कई सालां ते बाद, तजे याकूब बुड्ढा हुई गया था, तां तिनें अपणे प्यारे पुत्र यूसुफा जो तिसरे भाईयां री टोल-डूँढ करने जो भेज्या सै जे जानवरां रे झुंडा जो चारने जो दूर आईरे थे।

यूसुफा रे भाईयें सै जे तिसने ईर्ष्या करां थे कांभई तिनांरा पिता तिनां ते जादा तिसने प्रेम करां था कने इस खातर भई यूसुफ सुफने देक्खां था भई तिस तिनां पर राज करना। तजे यूसुफ अपणे भाईयां लौ आया तां तिनें तिसो बन्नी लया कने तिसो दासां रा व्यापार करने औलेयां जो बेची दित्या।

घरें वापस औणे ते पैहले यूसुफा रे भाईयें यूसुफा रे कपड़ेयां जो फाड़ी ने बकरीया रे खुना च डबोई दित्या। फेरी तिनें सै कपड़े अपणे पिते जो दस्से भई सै जे सोचो भई किसी जंगली जानवरे यूसुफा जो मारी दित्तीरा। याकूब बोहत दुआस था।

दासां रा व्यापार करने औले सै लोक मिस्र जो गये। नील नदिया रे कनारे पर बसीरा मिस्र इक बोहत बड्डा कने ताकता औला देश था। तिनें दासां रा व्यापार करने औलेयां यूसुफा जो धनी सरकारी अधिकारिये जो पैसे लईने बेची दित्या। यूसुफे अपणे मालका री खरी सेवा कित्ती कने परमेशरे यूसुफा जो आशीष दित्ती।

तिसरे मालका रिये जनाने यूसुफा ने सौणे री कोशिश कित्ती, पर यूसुफे इसा परिस्थितिया च बी परमेशरा रे बरोधा च पाप करने ते मना करी दित्या। सै गुस्से हुई गी कने यूसुफा पर झुठा इलजाम लाया, इस खातर तिसो कैद करीने कैदखाने जो भेज्जी दित्या गया। येथी तकौ भई जेलखाने च बी, यूसुफ परमेशरा रे प्रति सच्चा रैया कने परमेशरे तिस्सो आशीष दित्ती।

दुईं सालां ते बाद, यूसुफ अजें कैदखाने च था, भले इ सै निर्दोष था। इक रात, फिरौन, तियां जे मिस्री लोक अपणे राजेयां जो पुकारां थे, दो सुफने देक्खे तिनें जे तिसो बोहत परेशान करी दित्या। तिसरा कोई बी सलाहकार तिसो तिनां सुफणेयां रा मतलब नीं दस्सेया।

परमेशरे यूसुफा जो सुफनेयां रा मतलब दसणे रा दान दित्तीरा था, इस खातर फिरौने यूसुफा जो कैदखाने ते अप्पु लौ सदेया। यूसुफे तिस्सो तिनां सुफनेयां रा मतलब दस्सेया कने गलाया, “परमेशर बोहतीं फसलां औले सत्तां सालां ते बाद अकाला रे सात्त साल भेजणे औला आ।”

फिरौन यूसुफा ते इतना प्रभावित हुआ भई तिने तिसो मिस्रा रा दुज्जा सबते ताकता औला माहणु नियुक्त करी दित्या।

यूसुफे लोकां जो बोहत फसलां औले सात्त सालां रे बीच्च बोहत जादा खाणे रा समान जमा करने खातर गलाया। तजे सात्त सालां रा अकाल आया तां यूसुफे लोकां जो सै खाणे रा समान बेचया भई तिनांले खाणे रियां चीज़ां नीं घटो।

सै अकाल सिर्फ मिस्र ची नीं, पर कनान ते बी भयंकर था तेथी जे याकूब कने तिसरा पूरा टबर रहवां था।

इस खातर याकूबे अपणे सबते बड्डे पुत्रां जो खाणे रा समान खरीदणे खातर मिस्र जो भेज्या। तजे सै खाणे रा समान खरीदणे खातर यूसुफा रे सामणे खड़े हुये तां तिनें भाईयें यूसुफा जो नीं पछेयाणेया। पर यूसुफे तिनां जो पछेयाणी लया।

ये पता करने खातर भई तिनांरा स्वभाव बदली गरा की नीं तिनां जो परखणे ते बाद, यूसुफे तिनां ने बोल्या, “हऊं तुहांरा भाई यूसुफ आ! मता डरदे। तजे तुहें मिंज्जो दासा रे तौरा च बेच्या था तां तुहें बुरा करने रा बचार कित्या था, पर परमेशरे तिसा बुराईया जो भलाईया खातर इस्तेमाल कित्या! आवा कने मिस्र च रहवा भई हऊं तुहांरा कने तुहांरे टबरा रे सारे लोकां खातर रोटिया रा प्रबन्ध करी सकूँ।

तजे यूसुफा रे भाई घरें वापस आये कने अपणे पिते याकुबा जो दस्सेया भई यूसुफ अजें बी जीऊंदा आ तां सै बोहत खुश हुआ था।

याकूब बोहत बुड्ढा हुणे रे बावजूद अपणे पूरे टबरां रे लोकां सौगी मिस्र जो आई गया कने सै तेथी बसी गये। याकूबा रे मरने ते पैहले, तनें अपणे सारे पुत्रां जो आशीषां दित्तियां।

वाचा रा सै वादा सै जे परमेशरे अब्राहमा ने कित्या था सै इसहाका पर कने तिसते बाद याकूबा कने तिसते बाद तिसरे बाहरां पुत्रां कने तिनां रे टबरां रे सबीं लोकां पर आई गी थी। तिनां बाहरां पुत्रां रे वंशज इस्राएला रे बाहरा गोत्र बणी गये।