7. परमेशरा रा याकूबा जो आशीष देणा

तजे से बच्चे बड्डे हुये तां याकूबा जो घरें रैहणा खरा लगेया, पर एसावा जो जानवरां रा शिकार करना खरा लगया। रिबका याकूबा ने, कने इसहाक एसावा ने जादा प्यार रखां था।

इक दिन, तजे एसाव शिकार करीने वापस आया तां तिसो बोहत भुक्ख लगीरी थी। एसावे याकूबा ने गलाया, “सै जे तैं पकाई रा तेथी ते थोड़ी रोटी मिंज्जो खाणे जो दे।” याकूबे जवाब दित्या, “पैहले मेरने ये वादा कर भई पैहलौठा हुणे रिया बजहा ते हरेक चीज़ सै जे तिज्जो मिलणी चाहिंदी, सै सारियां तू मिंज्जो देणियां।” इस खातर एसावे तिनां सबीं चीज़ां जो याकूबा जो देणे री प्रतिज्ञा कित्ती। तां याकूबे तिसो खाणे खातरे रोटी दित्ती।

इसहाक एसावा जो आशीष देणा चाहवां था। पर इसते पैहले भई तिनें येढ़ा कित्या, रिबका कने याकूबे याकूबा जो एसाव बणने रा ढोंग करीने तिसने धोखा कित्या। इसहाक बुड्डा था कने तिस्सो दिसदा नीं था। इस खातर याकूबे एसावा रे कपड़े पैहने कने बकरिया री खाली जो अपणे गले कने हत्थां पर लपेटी लया।

याकूबा इसहाका ले आया कने गलाया, “हऊं एसाव आ। हऊं इस खातर आईरा भई तू मिंजो आशीष देओ।” तजे इसहाके बकरिया रे बालां जो मेहसूस कित्या कने कपड़ेया जो सींगेया, तां तिनें सोचया भई ये एसाव आ कने तिसो आशीष दित्ती।

एसावे याकूबा ते ईर्ष्या कित्ती कांभई याकूबे तिसते पैहले पुत्रा रे अधिकारा जो कने सौगी इ तिस रियां आशीषां जो बी चोरी लया था। इस खातर तिने तिनांरे पिते रे मरने ते बाद याकूबा जो मारने री योजना बनाई।

पर रिबके एसावा रिया योजना जो सुणी लया। इस खातर तिसे कने इसहाके याकूबा जो अपणे रिश्तेदारां सौगी रैहणे खातर बोहत दूर भेज्जी दित्या।

याकूब कई सालां तकौ रिबका रे रिश्तेदरां सौगी रैया। तिस बगता रे बीच्च तिनें ब्याह कित्या कने तिसरे बारा पुत्र कने इक पुत्री बी जम्मी। परमेशरे तिस्सो बोहत धनी बणाई दित्या।

बीह सालां तकौ कनाना च अपणे घरा ते दूर रैहणे ते बाद, याकूब अपणे टबरा, अपणे सेवकां कने अपणे जानवरां रे सारे झुंडाँ सौगी तेथी जो वापस आया।

याकूब इस खातर डरीरा था कांभई तिनें सोचया भई एसाव हुण बी तिस्सो मारी देणा चाहवां था। इस खातर तिनें भेंटा रे तौरा च जानवरां रे झुंडां जो एसावा लौ भेज्या। सै जे सेवक झुंडाँ जो लई ने गये थे तिनें गलाया, “तेरा दास याकूब, इनां जानवरां जो तिज्जो देआं। सै छोड़े इ आये रां।”

पर एसाव हुण याकूबा जो नुक्सान नीं पजुआणा चाहंदा था। इतरे बजाये, सै तिस्सो इक बार फेरी भीं ते देक्खी ने बोहत खुश था। तिसते बाद याकूब कनान च शान्तिया ने रहेया। फेरी इसहाक मरी गया कने याकुबे कने एसावे तिस्सो दफनाया। वाचा रे वादे सै जे परमेशरे अब्राहमा ने कित्ते थे सै हुण इसहाका ते याकूबा पर आईगे थे।