14. जंगला च भटकणा

परमेशरे इस्राएलियां जो तिनां नियमां जो दसणा खत्म कित्या तिनांरा जे तिनां जो तिसा वाचा रिया बजहा ते पालन करना जरुरी था। फेरी तिने सीनै पहाड़ा ते अग्गे तिनांरी अगुवाई कित्ती। सै तिनां जो वादे रे तिस देशा च नेणा चाहवां था। ये देश रा नौ कनान बी गलाया जावां था। परमेशरे बदला रे खम्बे च तिनां रे अग्गे-अग्गे चलया, कने सै तिसरे पीछे-पीछे चले।

परमेशरे अब्राहम, इसहाक कने याकूबा ने वादा कित्या था भई सै वादे रा सै देश तिनांरे वंशजा जो देना, पर इस बगत तेथी बोहत सारियां जातियां रये रां थियां। तिनां जो कनानी गलावां थे। ये कनानी लोक परमेशरा री आराधना नीं करदे थे कने तिसरे हुक्मां जो नीं मनदे थे। सै झूठे देवतयां री उपासना करां थे कने मते सारे बुरे काम्म करां थे।

परमेशरे इस्राएलियां ने बोल्या, “तजे तुहां तिस वाचा रे देशा च जाणा तां तेथी रे सबीं कनानियां ते छुटकारा पाई लेणा। तिनां ने कोई संधि नीं करनी कने ना तिनां ने नातेदारी करनी। तुहां तिनां रियां सारियां मूर्तियां जो पूरे तरीके ने नास करी देणा। जे तुहें मेरे हुक्मां जो नीं मनगे, तां तुहां मेरे बजाये तिनांरे देवतयां री उपासना करने लगणा।”

तजे इस्राएली कनान रिया सीमा पर पुज्जे, मूसे इस्राएला रे हरेक गोत्रा च ते इक-इक करीने बरहा माहणुआं जो चुणेया। तिने तिनां जो तिस देशा रा भेत लेणे खातर गल्लां समझाईयां भई सै जाईने देखो कने समझो भई से केढ़ा देश आ। तिनां कनानियां रा बी पता लगाणा था भई देखो सै ताकता औले या कमजोर हुंगे।

तिनें बारहा माहणुयें पुरे कनाना चीयें चलदे-चलदे चाली दिनां रा सफर कित्तया कने फेरी वापस आये।तिनें लोकां जो दसया, “सै देश बोहत उपजाऊ आ कने बोहत फसलां देआं!” पर दस भेतियें बोल्या, “तिनांरे नगर बोहत पक्के कने सै लोक लंबे कने ताकता औले! जे अहें तिनां पर हमला करगे, तां पक्का इ अहां तिनां ते हारी जाणा कने तिनां अहां जो मारी देणा।”

तां कालेब कने यहोशू कने दो होर भेतियें बोल्या, ये सच आ भई कनान रे लोक लंबे कने ताकता औले ये, पर पक्का ई अहां तिनां जो हराई देणा! कांह्भई परमेशरा अहां खा ते लड़ना!”

पर लोकें कालेब कने यहोशू ये री नीं सुणी। सै मूसा कने हारूना पर गुस्से हुई गे कने बोल्या, “तुहें अहां जो इस खतरनाक जगहा पर कैं लईने आई गे? अहां जो मिस्र ची रैहणा चहिंदा था। जे अहें तिस देशा च जावांये तां अहां तेथी युध्दा च मरी जाणा कने कनान रे लोकां अहां रियां जनानां कने बच्चेयां जो दास बणाई लेणा।” सै लोक तिनां जो मिस्र च वापस लई जाणे खातर इक होर अगुवे जो चुणना चाहवां थे।

तजे तिनें लोकें येढ़ा गलाया तां परमेशरे बोहत गुस्सा कित्या था। सै मिलापा औले तंबुये चो आया कने गलाया, तुहें मेरे बरोधा च बलवा कित्तिरा, इस खातर तुहां सबीं जो इस जंगला च भटकणे पौणा। हर इक माणु सै जे बीह साल या तिसते जादा उम्रा रा आ तिस तेथी मरी जाणा कने कदी बी तिस देशा च जाई नीं सकणा सै जे मांह तुहां जो देणा। सिर्फ कालेब कने यहोशू तिसच जाइ सकांये।”

तजे लोकें परमेशरा जो येढ़ा बोलदे सुणेया, तां सै दुखी हुये कांह्भई तिनें पाप कित्या था। इस खातर तिनें कनान रे लोकां पर हमला करने रा निर्णय कित्या। मूसा तिनां जो नीं जाणे खातर चेतावनी दित्ती कांह्भई परमेशरा तिनां सौगी नीं जाणा, पर तिनें तिसरी नीं सुणी।

परमेशर इसा लड़ाईया च तिनां रे सौगी नीं गया था, इस खातर कनानियें तिनां जो हराई दित्या कने तिनां च ते मते सारेयां जो मारी दित्या। तां इस्राएली लोक कनान ते वापस मुड़ी गये। औणे औले चाली सालां तकौ, तिनां जंगला च इखा-उखा भटकणा।

इस्राएली लोकां रे जरिये जंगला च भटकणे रे चाली सालां रे बीच, परमेशरे तिनां रियां जरुरतां जो पूरा कित्या। तिनें तिनां जो स्वर्गा ते “मन्ना” केहलाणे औली रोटी दित्ती। तिनें बटेरां रे झुंडां रे झुंड बी (सै जे बड्डे कुकड़ा साई पंछी हुआंये) तिनां रिया छावनिया चौ भेजे तां भई तिनां जो खाणे खातर मास मिलो। तिस पूरे बगता, परमेशरे तिनां रे कपड़ेयां कने जुत्तेयां जो नीं फटणे दित्या।

येथी तकौ भई परमेशरे तिनांरे पीणे खातर चमत्कार करीने पत्थरा च ते पाणी कड्डेया। पर इनां सबीं ते बाद, इस्राएली लोकें परमेशरा रे बरोधा च कने मूसा रे बरोधा च गलाये कने कुड़कुड़ाये। तां बी, परमेशर विस्वास योग्य था। तिने सै जे वादा कित्तिरा था भई तिस अब्राहम, इसहाक कने याकूबा रे वंशजां खातर वादे रा देश देणा, सै तिनें पूरा कित्या।

होर इक बारी तजे तिनां लोकां ले पाणी नीं था, तां परमेशरे मूसा जो बोल्या, “ पत्थरा ने गल्लां कर, कने तिसते पाणी निकलणा।” पर मूसे पत्थरा ने गल्लां नीं कित्तियां; पर इसरे बजाये तिनें लाठिया ने पत्थरा पर दो बारी मारेया। इस तरीके ने तिनें परमेशरा री बेज्जति कित्ती। सबीं रे पीणे खातर तिस पत्थरा च ते पाणी तां आई गया, पर परमेशर मूसा ते गुस्से हुई गया। तिनें गलाया, “कांह्भई तैं येढ़ा कित्तिरा, इस खातर तू वादे रे देशा च जाई नी सकदा।”

तजे इस्राएली लोक चाली सालां तकौ जंगला च भटकी चूके थे, तां तिनें जे परमेशरा रे बरोधा च बलवा कित्या था सै सब मरी गे थे। तां परमेशरे तिनां लोकां जो फेरी ते तिस वादे रे देशा रिया सीमा तकौ लई गया। हुण मूसा बोहत बुड्डा हुई गया था, इस खातर परमेशरे लोकां री अगुवाई करने च तिसरी मदद करने खातर यहोशूये जो चुणेया। परमेशरे मूसा ते ये वादा बी कित्या था भई इक दिन तिस तिनां लोकां ले मूसा साई इक भविष्यव्दता भेजणा।

तां परमेशरे मूसा जो इक पहाड़ा रिया चूंडिया पर जाणे खातर गलाया भई सै तिस वादे रे देशा जो देखी सको। मूसे तिस वादे रे देशा जो देख्या पर परमेशरे तिसो तिस च जाणे री अनुमती नीं दित्ति। तां मूसा मरी गया, कने इस्राएलियें तीह दिनां तकौ दुख मनाया। यहोशू तिनां रा नवां अगुवा बणी गया। यहोशू इक खरा अगुवा था कांह्भई तिनें परमेशरा पर भरोसा कित्या कने तिसरी गल्लां जो मन्नेया।