15. वादे रा देश

आखर च, हुण सै बगत आई गरा था भई इस्राएली लोक वादे रे देश आ, कनान च जाओ। तिस देशा च यरीहो नावां रा इक नगर था। तिसरी सुरक्षा खातर तिसरे चऊं पासेयां मजबूत दीवारां थीयां। यहोशूये तिस नगरा च दो भेतियां जो भेज्या। तिस नगरा च रहाब नावां री इक वेश्या रैयां थी। तिसे तिनां भेतियां जो लुखाया कने फेरी बादा च तिने तिनां नगरां ते बची ने निकलणे च मद्द कित्ती। तिनें येढ़ा इस खातर कित्या कांह्भई सै परमेशरा पर विस्वास करां थी। तिस बगता इस्राएली लोक यरीहो जो नास करगे तां तिनें रहाब कने तिसरे टबरा री मदशद करने रा वादा कित्या था।

इसाएली लोकां जो बादे रे देसा च जाणे खातर यरदन नदिया जो पार करने पौणा। परमेशरे यहोशुये ने बोल्या, “याजकां जो पैहले जाणे दे।” तां याजकें यरदन नदिया च अपणे कदम रखे तां पाणिये रा बगणा रुकी गया, तिसते भई इस्राएली लोक नदिया रे दुज्जिया खौ सुक्किया घरतिया पर पार जाई सको।

तिनें लोकें यरदन नदी पार करी ली तां परमेशरे यहोशूये ने गलाया भई यरीहो पर हमला करने खातर त्यार रै, सै बोहत बड्डा कने पक्का नगर था। परमेशरे तिनां लोकां ने गलाया भई याजकां कने सैनिकां जो छे दिनां तकौ तिस नगरा रे चऊं पासेयां चक्कर लगाणे पौणा। इस खातर याजकें कने सैनिकें येढ़ा इ कित्या।

तां सतवें दिन, इस्राएलियें तिस नगरा रे चऊं पासेयां सात्त बार होर चक्कर लगाये। तिनां रे नगरा रे चऊं पासेयां सतवीं बार चक्कर लाई लेणे ते बाद, याजकें अपणी तुरहियाँ बजाईयां कने सैनिकें बड़े जोरा ने रौला पाया।

तां यरीहो रे चऊं पासेयां री दीवार पई गी! तियां जे परमेशरे हुक्म दित्या था इस्राएलियें नगरा रियां सारियां चीज़ां जो नास करी दित्या। तिनें सिर्फ राहाब कने तिसारे टबरा जो छड्डी दित्या, सै जे इस्राएलियां च मिली गरे थे। तजे कनान च रैहणे औले होरीं लोकें सुणेया भई इस्राएलियें यरीहो जो नष्ट करी दित्तिरा, तां सै डरी गे भई तिनां इस्राएली लोकां तिनां पर बी हमला करना।

परमेशरे इस्राएलियां जो हुक्म दित्या था भई कनान च रैहणे औलिया किसी बी जातिया सौगी मेल करने औला समझौता नीं करना। पर गिबोनी नौं री इक कनानी जातिया रे लोकें यहोशूये ने झुठ गलाया भई सै कनान ते दूर इकी जगहा च रैहणे औले ये। तिनें यहोशूये ने तिनां सौगी मेल करने औला समझौता करने री बिनती कित्ती। यहोशू कने होरीं इस्राएली अगुयें परमेशरा ते नीं पुछेया भई तिनां जो क्या करना चाहिंदा। इतरे बजाये, तिनें गिबोनियां सौगी मेल करने औला समझौता करी लया।

तीन्नां दिनां ते बाद, इस्राएलियां जो ये पता लगया भई गिबोनी लोक कनान च इ रहवां थे। सै बोहत गुस्से हुई गे कांह्भई गिबोनियें तिनां जो धोखा दित्या था। पर तिनें तिनां सौगी कित्तिरी तिस मेल करने औले समझौते जो बणाई रख्या कांह्भई सै परमेशरा रे सामणे कित्या गईरा था। तां किछ बगता ते बाद, कनान देशा च रैहणे औली इक होरी झूंडा रैयां लोकें कने एमोरियां रे राजेयां सुणेया भई गिबोनियें इस्राएलियां सौगी मेल करने औला समझौता करी लरा, इस खातर तिनें अपणियां सेनां जो इक करीने इक बड्डी सेना बणाई कने गिबोना पर हमला करी दित्या। गिबोनियें तिनांरी मद्द करने खातर यहोशूये ले इक संदेशा भेजया।

इस खातर इस्राएलियें सेना जो कट्ठा कित्या कने गिबोनियां ले पुज्जणे खातर सै पूरी रात चले। सबेरे तड़के तिनें एमोरियां रिया सेना जो रेहान करी दित्या कने तिनां पर हमला करी दित्या।

तिस दिन परमेशरे इस्राएलियां खातर लड़ेया। परमेशरे एमोरियां जो घबराई दित्या कने परमेशरे बड्डे-बड्डे आणी रे गोले सट्टी कने मते एमोरियां जो मारी दित्या।

परमेशरे सूरजा जो बी आकाशा च ते इकी जगहा पर रोकी दित्या भई इस्राएलियां जो एमोरियां जो पूरे तरीके कने हराणे खातर पूरा बगत मिली जाओ। तिस दिन, परमेशरे इस्राएलियां खातर इक बोहत बड्डी जीत दई दित्ती।

तजे परमेशरे तिनां सेनां जो हराणे ते बाद, मते सारे कनानियां रे झुंडा रे लोक इस्राएलियां पर हमला करने खातर कट्ठा हुये। यहोशू कने इस्राएलियें हमला करीने तिनां रा सर्वनाश करी दित्या।

इना युध्दां ते बाद, परमेशरे इस्राएला रे सारे गोत्रां जो वादे रे तिस देशा च तिनां रा हिस्सा दित्या। तां परमेशरे इस्राएला जो तिनां रियां सारियां सीमावां पर शान्ति दित्ती।

तजे यहोशू बूडढा हुई गया तां तिनें इस्राएलियां रे सबीं लोकां जो कट्ठा करी ने सदया। तां यहोशूये तिनां लोकां जो याद कराया भई तिनें तिस वाचा रा पालन करने रा वादा बी कित्तिरा सै जे परमेशरे तिनां सौगी सीनै पहाड़ा पर बन्नी थी। तिनें लोकें परमेशरा ने विस्वासा जोगा बणी रैहणे कने तिसरी सारी व्यवस्था रा पालन करने रा वादा कित्या।