16. छुड़ाणे औला

यहोशुये रे मरने ते बाद इस्राएलियें परमेशरा रा हुक्म नीं मनया। तिनें परमेशरा रे नियमां रा पालन नीं कित्या, कने तिनें तिस वादे रे देशा रे बचीरे कनानियां जो बाहर नीं कडया। इस्राएलियें अपणे सच्चे परमेशर, यहोवा जो छड्डी ने कनानियां रे देवतेयां री उपासना करने शुरु कित्ती। इस्राएलियां ले कोई राजा नीं था, इस खातर तिसो जो किछ ठीक लगया तिने तेड़ा ई कित्या।

परमेशरा रे हुक्म नीं मनणे रे जरिये इस्राएलियें इक पध्दति शुरु करी दित्ती तिसो जे कई बार दोहराया था। ये पध्दति इयां चली : किछ सालां तक इस्राएली परमेशरा रे हुक्मां जो नीं मनणा, तां तिस तिनां जो तिनांरे बैरियां ते हरवाणे रे जरिये सजा देणी। इनां बैरीयां इस्राएलियां ते तिनांरी चीजां जो लुटी लेणा, तिनां रिया सम्पतिया जो नष्ट करी देणा। फेरी तजे इस्राएलियां रे बैरियां तिनां पर कईयां सालां तक अत्याचार करना कने परमेशरा ने तिनां जो बचाणे खातर प्राथना करनी।

हर बार तजे इस्राएलियां पश्चाताप करना तां परमेशरा तिनां जो बचाणा। सै इक छुड़ाणे औले रे जरिये येढ़ा करना- इक येढ़ा माहणु तिस जे तिनां शत्रुआं रे बरोधा च लड़ना कने तिनां जो हराई देणा। तां देशा च शान्ति हुणी कने तिस छुड़ाणे औले तिनां पर खरे तरीके ने राज करना। परमेशरे तिनां लोकां जो बचाणे खातर मते छुड़ाणे औलेयां जो भेजया। परमेशरे नेड़े री इक शत्रु देश, मिद्यानियां रे जरिये इस्राएलियां जो हरवाणे रे जरिये फेरी ते येड़ा ई कित्या।

मिद्यानियें सत्तां सालां तको इस्राएलियां रियां फसलां जो लुटया। इस्राएली लोक बौहत डरी गे थे, कने सै गुफां च छिपी गे भई मिद्यानी लोक तिनांजो टोली नीं सको। आखर च तिनां जो बचाणे खातर तिनें परमेशरा ले प्राथना कित्ती।

गिदोन नौंआ रा इक इस्राएली माहणु था। इक दिन, सै इकी जगा लुक्खी ने कणका जो झाड़े रां था, भई किते मिद्यानी लोक तिसो चोरी नीं लओ। यहोवे रे स्वर्गदूते गिदोना ले आई ने तिसने बोल्या, “हे शूरवीर सुरमा, परमेशर तेरे सौगी आ, जाईने इस्राएलियां जो मिद्यानियां ते बचा।”

गिदोना रे पिते ले मूर्तिया जो समर्पित इक वेदी थी। सबते पैहली गाल्ल सै जे परमेशरे गिदोना जो करने खातर गलाई, भई तिसा वेदिया जो जाईने तोड़ना था। पर गिदोन लोकां ते डरां था, इस खातर तिनें रात हुणे रा इंतजार कित्या। तां तिनें तिसा वेदिया रे टुकड़े करी दित्ते। तिनें परमेशरा खातर नवीं वेदी बणाई कने तिस पर परमेशरा खातर बलि चढ़ाई।

अगले रोज भ्यागा लोकें देक्खया भई किन्हियें वेदिया जो तोड़ी ने कई टुकड़े करी दितिरा, इस खातर सै बौहत गुस्से हुये। सै गिदोना जो मारने खातर तिसरे घरा जो गये, पर गिदोना रे पिते बोलया, “तुहें कां अपणे देवता री मद्द करने री कोशिश करे रांये? जे सै देवता आ तां तिसो अपणी सुरक्षा अप्पुं करने देओ!” कांह्भई तिनें येढ़ा बोलया इस खातर लोकें गिदोना जो नीं मारेया।

तां इस्राएलियां जो लूटणे खातर मिद्यानी लोक फेरी भीं आये। सै इतने सारे थे भई तिनांरी गिणती बी नीं कित्ती जाई सकदी थी। गिदोने तिनां रे बरोधा च लड़णे खातर इस्राएलियां जो सौगी सदया। गिदोने परमेशरा ते दो चिन्ह मंगे भई तिसो विस्वास हुई जाओ भई परमेशर सच ई तिसो बचाणे खातर बोलया रां।

पैहले चिन्हा खातर, गिदोना ने भेड़ा री ऊना जो धरतिया पर रखी दितया, परमेशरा ने गलाया भई सवेरे रा पाला सिर्फ भेडा रिया तिसा उना पर पओ कने धरतिया पर नीं पओ। परमेशरे येढ़ा ई कित्या। अगलिया राती, तिनें परमेशरा ने बोलया भई धरती गीली हुई जाओ पर भेडां री ऊन सुक्की रओ। परमेशरे येढ़ा कित्या। इनां दुईं चिन्हां रिया वजहा ते, गिदोने परमेशरा पर विस्वास कित्या भई परमेशर असल च चाहवां भई सै इस्राएलियां जो मिद्यानियां ते बचाओ।

तां गिदोने सैनिकां जो अप्पुं ले सद्दया कने 32000 सैनिक आये। पर परमेशरे तिसने गलाया भई ये बोहत जादा ये। इस खातर गिदोने तिनां सबीं जो 22000 जो घरें बापस भेजी दित्या सै जे लड़ने ते डरां थे। परमेशरे गिदोना ने गलाया भई ये सैनिक अजें बी बोहत जादा थे। इस खातर गिदोने 300 सैनिकां जो छड्डी ने तिनां सबीं जो घरें भेजी दित्या।

तिसा राती जो परमेशरे गिदोना ने बोल्या, “मिद्यानियां रिया छावनिया च जा कने तिनां जो गल्लां करदे सुण। तजे तु सुणो भई सै क्या गल्लां करांये तां तू तिनां पर हमला करने ते नीं डरना।” इस खातर तिसा राती, गिदोन थल्ले तिनां रिया छावनिया च गया कने तिनें इक मिद्यानी सैनिकां जप अपणे दोस्ता ने गल्‍ल करदे सुणया सै जे तिनें सपने च देक्खया था। तिस सैनिकां रे दोस्ते बोलया, “ इस सपने रा क्या मतलब आ भई गिदोना रे सैनिकें अहां मिद्यानी सैनिकां जो हराई दित्या!” तजे गिदोने ये सुणया तां तिनें परमेशरा री स्तुति कित्ती।

तां गिदोन अपणे सैनिकां बापस आया कने तिनां चते हरेक जो इक-इक नरसिंगा, इक मिट्टिया रा घड़ा, कने इक मशाल दित्ती। तिनें तिसा छावनिया जो घेरी लया तेथी जे मिद्यानी सैनिक सये रां थे। गिदोना रेयां 300 सैनिकें अपणी मशाला रे बरतनां ने ढक्कि रा था इस खातर मिद्यानी लोक तिनां मशालां रिया लोई जो नीं देखी सके थे।

तां गिदोना रेयां सबीं सैनिकें अपणे बरतनां जो इक लख्त तोड़ी ने अचानक मशालां ते अग्गी जो सामणे कित्या। तिनें अपणे नरसिंगे बजाये कने रड़ाये, “यहोवा री कने गिदोना री तलवार!”

परमेशरे मिद्यानियां जो घबराई दित्या, इस खातर सै इकी दुज्जे जो मारने कने बढणे लगे। ताहलूं ई, गिदोने संदेश देणे औलेयां जो बोहत सारे होर इस्राएलियां जो मिद्यानियां रा पीछा करने च तिनांरी मद्द करने जो सदणे खातर भेज्या। तिनें तिनां च ते मते सारेयां जो मारी दित्या कने बाकियां रा पीछा करीने तिनां जो इस्राएल देशा ते बाहर नकाली दित्या। तिस दिन 120000 मिद्यानी मारे गये। इस तरीके ने परमेशरे इस्राएला जो बचाया।

सै लोक गिदोना जो अपणा राजा बनाणा चाहवां थे, पर गिदोने तिनां जो येढ़ा नीं करने दित्या, पर तिनें तिनां ते सै सोने रे गैहणे मंगे सै जे तिनें सारे मिद्यानियां ते लुटे थे। तिनें लोकें बौहत सोना गिदोना जो दित्या।

तां गिदोने तिस सोने ते इक खास कपड़ा बनाया तेढ़ा जे महायाजक पैहनां थे। पर लोकें तिसरी उपासना करना शुरु करी दित्या तियां जे सै कोई मूर्ति हो। तां परमेशरे फेरी ते इस्राएला जो सजा दित्ती कांह्भई तिनें फेरी भीं मूर्ति पूजा कित्ती थी। परमेशरे तिनां जो तिनां रे शत्रुआं जो हराणे जोगा बणाया। आखर च तिनें फेरी ते परमेशरा ले मद्द करने खातर प्राथना कित्ती, कने परमेशरे तिनां ले तिनां जो बचाणे खातर इक छुड़ाणे औले जो भेज्या।

ये ई गल्लां कई बार हुईयां: इस्राएली लोक पाप करां थे कने परमेशरा तिनां जो सजा देणी, तिनां पश्चाताप करना कने परमेशरा तिनां जो छुड़ाणे खातर किसी ना किसी जो भेजणा। कईयां सालां तकौ, परमेशरे बोहत छुड़ाणे औलेयां जो भेज्या तिनें जे इस्राएलियां जो तिनांरे शत्रुआं ते बचाया।

आखर च तिनें लोकें होरी देशां साई परमेशरा ते अप्पुं खातर इक राजे री मांग कित्ती। सै इक येढ़ा राजा चाहवां थे सै जे लंबा कने ताकतवर हो कने सै जे लड़ाईया च तिनांरे अगवाई करी सको। परमेशरा जो तिनां री ये बिनती पसंद नीं आई, पर तिनें तिनां जो तेढ़ा राजा दित्या तेढ़ी जे तिनां री मांग थी।