17. दाऊदा सौगी परमेशरा रा वादा

शाऊल इस्राएला रा पैहला राजा था। सै लंबाईया रा खरा कने सुन्दर था, तेढ़ा जे लोक चाहवां थे सै इक दम तेढ़ा इ था। इस्राएला पर अपणे राज करने रे पैहले किछ सालां च शाऊल इक खरा राजा था। पर बाद च सै इक दुष्ट माहणु बणी गया तिनें परमेशरा री गल्लां जो नीं मन्नेया। इस खातर परमेशरे इक होरी माहणुये जो चुणेया तिस जे भई इक दिन तिसरी जगहा पर राजा बणना था।

परमेशरे दाऊद नौं रे इक जवान इस्राएली माहणुये जो चुणी ने इक दिन शाऊला रिया जगहा पर राजा हुणे खातर त्यार करना शुरु कित्या। दाऊद बैतलहम नगरा रा इक चरवाहा था। बोहत बारी, दाऊदे सिंह कने भालूये जो बी मारी दित्या था। दाऊद इक नरम कने धर्मी माहणु था। तिनें परमेशरा पर भरोसा कित्या कने तिस रियां गल्लां जो मन्नेया।

तजे दाऊद अपणिया जवानिया च था, तां तिनें लंबे कने ताकता औले गोलियता रे बरोधा च लड़ाई कित्ती। गोलियत बोहत ताकता औला सैनिक था। सै बोहत मजबूत कने कोई तीन्न मीटर लंबा था! पर परमेशरे गोलियता जो मारने कने इस्राएला जो बचाणे च दाऊदा री मद्द कित्ती। इसते बाद, दाऊदे इस्राएला रे शत्रुआं पर कई बार जीत हासल कित्ती। दाऊद इक बड्डा सैनिक बणी गया कने तिनें बोहतीं जो युध्दा च इस्राएली सेना री अगुवाई कित्ती। लोकें तिसरी बोहत तारीफ कित्ती।

लोकें दाऊदा ते इतना स्नेह कित्या भई शाऊले तिसते जलणे लगेया। आखर च शाऊल तिसो मारना चाहवां था, इस खातर दाऊद तिसते कने तिसरे सैनिकां ते लुखणे खातर जंगला च नट्ठी गया। इक दिन, तजे शाऊल कने तिसरे सैनिक दाऊदा जो टोले रां थे तां शाऊल इकी गुफा चौ गया। ये सै इ गुफा थी तिसच जे दाऊद लुखीरा था, पर शाऊले तिसो नीं देख्या। दाऊद शाऊला रे पीछे तिसरे बोहत नजदीक चली गया कने तिसरे कपड़े ते इक टुकड़ा कट्टी लया। बाद च, तजे शाऊल तिसा गुफा चते निकलेया तां दाऊद तिसने मिलया कने तिसो सै कपड़े रा टुकड़ा दस्सेया। इस तरीके ने शाऊला जो पता लगी गया भई दाऊदे राजा बणने खातर तिसो मारने ते मना करी दित्तिरा।

किछ बगता ते बाद, शाऊल युध्दा च मरी गया कने दाऊद इस्राएला रा राजा बणी गया। सै इक खरा राजा था कने लोकें तिसने प्रीति रखी। परमेशरे दाऊदा जो आशीषित कित्या कने तिसो सफल बणाया। दाऊदे कई युध्द लड़े कने परमेशरे इस्राएला रे शत्रुआं जो हराणे खातर तिसरी मद्द कित्ती। दाऊदे यरुशलेम नगरा जो जीती कने तिसो अपणी राजधानी बणाया, तेथी जे सै रहेया कने राज कित्या। दाऊद चालियां सालां तकौ राजा बणीरा रैया। इस बगता रे अन्दर, इस्राएल सामर्थी कने धनवान बणी गया।

दाऊद इक मंदर बनाणां चाहवां था तेथी जे सारे इस्राएली परमेशरा री आराधना करी सको कने तिस खातर बलिदान चढ़ाई सको। लगभग 400 सालां ते, सै लोक मूसा रे बणाई रे मलापा औले तम्बुये च परमेशरा री आराधना करे रां थे कने तिस खातर बलिदान चढ़ाये रां थे।

पर तेथी नातान नावां रा इक भविष्यव्दक्ता था। परमेशरे तिसो दाऊदे जो ये गलाणे भेज्या: “तें मते सारे युध्द लड़ीरे, इस खातर तू मेरे खातर इस मंदरा जो नीं बणाई सकदा। तेरा पुत्र इसो बणाई सकां। तां बी, मैं तिज्जो बोहत आशीषां देणियां। तेरा इक वंशज सदा खातर मेरे लोकां पर राजे रे रूपा च राज करगा।” सदा खातर राज करने औला सै दाऊद इको ई मसीह रा वंशज था। मसीह परमेशरा रा चुणी रा माहणु था तिस जे संसारा रे लोकां जो तिनांरे पापां ते बचाणा।

तजे दाऊदे नाताना रे संदेशा जो सुणया तां तिने परमेशरा रा धन्यवाद कित्या कने तिसरी स्तुति कित्ती। परमेशर तिसरी प्रतिष्ठा जो बधाये रां था कने तिसो मत्तियां सारियां आशीषां दे रां था। पक्का ई, दाऊद नीं जाणदा था भई परमेशरा ये गल्लां कदूँ करनीयां। इस बगता अहें जाणांये भई इस्राएलियां जो इक लंबे बगता तकौ, लगभग 1000 सालां तकौ मसीह रे औणे री न्यालप करने पौणी।

दाऊदे कई सालां तकौ न्याय सौगी अपणे लोकां पर शासन कित्या। तिने बड़ी निष्ठा ते परमेशरा री गल्लां जो मन्नेया कने परमेशरे तिसो आशीषित कित्या। हालाँकि, अपणे जीवना रे आखर च तिने परमेशरा रे बरोधा च भयानक पाप कित्या था।

इक दिन दाऊदे अपणे मेहला ते बाहर झाँकी ने इकी सुन्दर जनाना जो नहूंदे देख्या। सै तिसो नीं जाणदा था, पर तिने पता करी लया भई तिसारा नौं बतशेबा था।

अपणियां नजरां जो फेरने री बजाये, दाऊदे तिसो अप्पुं लौ लयौणे खातर किसी जो भेज्या। सै तिसने सौगी सया कने तिसा जो वापस घरा जो भेज्जी दित्या। थोड़े बगता ते बाद बतशेबा ने ये गलाई कने दाऊदा लौ संदेश भेज्या भई सै भारत्थी ई।

बतशेबा रा खसम ऊरिय्याह नौं रा इक माहणु था। सै दाऊदा रे खरे सैनिकां च ते इक था। इस बगत सै युध्द करने बाहर गया था। दाऊदे ऊरिय्याह जो युध्दा ते वापस सद्दी ने तिसो अपणिया जनाना सौगी रैहणे खातर हुक्म दित्या। पर होरीं सैनिक युध्दा च थे इस खातर ऊरिय्याह घरें जाणे ते मना करी दित्या। इस खातर दाऊदे ऊरिय्याह जो वापस युध्दा चौ भेज्ज दित्या कने सेनापतिये ते तिसो युध्दा च येढ़िया जगहा पर रखणे खातर गलाया तेथी जे शत्रु सबते जादा ताकता औले हो तां भई सै मरी जाओ। तां येढ़ा हुआ भई ऊरिय्याह युध्द च मारेया गया।

ऊरिय्याह रे युध्दा च मारे जाणे ते बाद दाऊदे बतशेबा ने ब्याह करी लया। बाद च, तिसे दाऊदा रे पुत्रा जो जन्म दित्या। दाऊदे जो किछ कित्या तिसते परमेशर बोहत गुस्से था, इस खातर तिनें नातान भविष्यव्दक्ता जो दाऊदा जो ये दसणे खातर भेज्या भई तिसरा पाप कितना बुरा था। दाऊदे अपणे पापां रा पश्चाताप कित्या कने परमेशरे तिसो माफ करी दित्या। अपणे बाकि जीवना च, अपणे कठण बगता च बी दाऊद परमेशरा रे पीछे-पीछे चलेया कने तिसरी गल्लां जो मन्नेया।

पर दाऊदा रा बच्चा मरी गया। इस तरीके ने परमेशरे दाऊदा जो सजा दित्ती। इसते अलावा, दाऊदा रे मेरने तकौ, तिसरे अपणे टबरा रे किछ माहणुयें तिसरे बरोधा च लड़ाई कित्ती कने दाऊदा री अपणी ताकत घट हुई गी थी। पर परमेशर विस्वासा जोगा था कने हुण बी तिनें सै कित्या सै जे तिनें दाऊदा ने करने रा वादा कित्या था भई तिस करना, भले ई दाऊदे तिसरे हुक्मां जो नीं मन्नेया था। बाद च, दाऊदे कने बतशेबा रे दुज्जी औलाद पैदा हुई कने तिनें तिसरा नौ सुलैमान रख्या।