18. राज्य रा बंडोणा

दाऊद राजे चालियां सालां तकौ राज कित्या। तां सै मरी गया कने तिसरे पुत्र सुलैमाने इस्राएला पर राज करना शुरु कित्या। परमेशरे सुलैमाना ने गल्लां कित्तियां कने तिसते पुछया भई मेरते तिसा आशीषा जो माँग सै जे तिसो सबते जादा पंसंद हो। सुलैमाने परमेशरा ते तिसो बोहत जादा बुध्दिमान बनाणे रा वरदान मँगया। इसा गल्ला ते परमेशर खुश हुआ, इस खातर परमेशरे सुलैमाना जो संसारा रा सबते जादा बुध्दिमान माहणु बणाई दित्या। सुलैमाने बोहत गल्लां सिखियां कने सै इक बुध्दिमान राजा बणया। परमेशरे तिसो बोहत समृध्द बी बणाई दित्या था।

यरुशलेमा च सुलैमाने मंदरा खातर समान कट्ठा करीने, तिस मंदरा जो बणाया तिस खातर जे तिसरे पिते दाऊदे योजना बणाई थी। हुण लोक मलापा औले तम्बुये री बजाये मंदरा च परमेशरा री आराधना करां थे कने तिस खातर बलि चढ़ावां थे। परमेशरा री उपस्थिति तिस मंदरा च बणीरी रहवां थी कने तेथी सै अपणे लोकां ने रहवां था।

पर सुलैमाने बगाने देशा रियां जनानां ने प्रेम कित्या। तिनें मत्तियां सारियां, लगभग 1000 जनानां सौगी ब्याह करीने परमेशरा रे हुक्मां जो नीं मन्नेया! इनां चते बोहत जनानां बगाने देशां ते आईयां कने अप्पुं सौगी अपणे देवतेयां जो लयाई थी कने तिनांरी पुजा-पाठ करना नीं छडेया था। तजे सुलैमान बूढ़ा हुई गया तां तिनें बी तिनां ने मिली ने तिनांरे देवतयां री उपासना कित्ती।

इसा वजहा ते परमेशर सुलैमाना ते गुस्से था। परमेशरे बोल्या भई तिस इस्राएला जो दुईं हिस्सेयां च बंडणे रे जरिये तिनां जो सजा देणी। तिस सुलैमाना रे मरने ते बाद येढ़ा करना।

सुलैमाना रे मरने ते बाद, रहबाम राजा बणया। इस्राएल देशा रे सब लोक तिसो अपणे राजे रे तौरा च मन्नणे खातर कट्ठे हुईरे थे। तिनें रहबामा ने शकैत कित्ती भई सुलैमाने तिनां ते कठण मेहणत करवाई थी कने मता सारा कर लया था। तिनें रहबामा ने विनती कित्ती भई सै तिनां ते घट मेहनता औला काम्म करवाओ।

पर रहबामे तिनां जो बड़ा मूर्खता औला जवाब दित्या, “तुहें बोलांये भई मेरे पिते सुलैमाने तुहांते कठण मेहणत करवाई। पर मांह तुहांते होर बी जादा कठण मेहणत करवाणी कने मांह तुहां जो इसते बी जादा दुखी करना।”

तजे लोकें तिसो येढ़ा बोलदे सुणया तां तिनां च ते बोहत लोकें तिसरे बरोधा च बलवा कित्या। दस्सें गोत्रें तिसो छड्डी दित्या; तिसने सौगी हुण सिर्फ दो ई गोत्र बचे। इनें दुईं गोत्रें अप्पुं जो यहूदा रा राज्य करीने ने नौं दित्या।

बाकी रे दस्स गोत्रें यारोबाम नौं रे इक माहणुये जो अपणा राजा बणाई लया। ये गोत्र देशा रे उत्तर कने पूर्वा खा रे हिस्से च थे। तिनें अपणे राज्य रा नौं इस्राएल रा राज्य रखेया।

पर यारोबामे परमेशरा रे बरोधा च बलवा कित्या कने लोकां ते पाप करवाया। तिने अपणे लोकां रे जरिये उपासना खातर दो मूर्तियां जो बणवाया। सै हुण यहूदा रे राज्य च यरुशलेमा च परमेशरा रे मंदरा च तिसरी आराधना करने खातर नीं गये।

यहूदा कने इस्राएला रे राज्य अप्पु चीयें शत्रु बणी गे कने अक्सर इकी दुज्जे रे बरोधा च लड़ने लगे।

इस्राएला रे नवें राज्य रे, सारे ई दुष्ट राजा हुये थे। इनां च ते कई राजा येढे इस्राएली लोकां रे जरिये मरवाये गये सै जे अप्पुं जो राजा बनाणा चाहवां थे।

इस्राएल राज्य रे सारे ई राजेयां कने जादा जे लोकें मूर्तियां री उपासना कित्ती। तजे तिनें येढ़ा कित्या, तां सै वेश्यां ने सम्बन्ध बनाई लवां थे कने तिनें कई बार मूर्तियां रे अग्गे बच्चेयां जो बलिदान बी करी दित्या।

यहूदा राज्य रे राजा, दाऊदा रे वंशज थे। इनां राजेयां च ते कई भले माहणु थे तिनें जे न्याय सौगी राज कित्या कने परमेशरा री आराधना कित्ती। पर यहूदा रे जादा जे राजा दुष्ट थे। तिनें दुष्टता ने राज्य कित्या कने मूर्तियां री उपासना कित्ती। येथी तकौ भई इनां च ते किछ राजेयां झुठे देवतयां रे अग्गे अपणे बच्चेयां जो बी बलि करी दित्या। यहूदा रे जादा जे लोकें बी परमेशरा रे बरोधा च बलवा कित्या कने होरी देवतयां री उपासना कित्ती।