19. भविष्यद्वक्ता

परमेशर सदा इस्राएलियां ले भविष्यव्दक्तावां जो भेजदा रैयां था। भविष्यव्दक्ता परमेशरा रे संदेशां जो सुणां थे कने फेरी तिसो लोकां जो दस्सां थे।

तजे अहाब इस्राएल राज्य रा राजा था तां तिस बगता एलिय्याह भविष्यव्दक्ता था। अहाब इक बूरा माहणु था। तिनें झुठे बाल देवता री उपासना करवाणे खातर लोकां जो मजबूर कित्या था। इस खातर एलिय्याह अहाबा दस्सेया भई परमेशर तिनां लोकां जो सजा देणे जाये रां था। तिनें तिनां ने गलाया, “तदुआं तकौ जे मांह फेरी बरखा हुणे खातर नीं बोलणा तदुआं तकौ इस्राएल राज्य च बरखा नीं हुणी कने ना ई पाला पौणा।” इसा गल्ला ते अहाब इतना गुस्से हुआ भई तिनें एलिय्याह जो मारी देणे रा निर्णय कित्या।

इस खातर परमेशरे एलिय्याह जो बोल्या भई सै जंगला च जाईने अहाबा ते लूक्खी जाओ। एलिय्याह जंगला च तिस पाणिये रे स्त्रोता लो गया तेथी जाणे खातर जे परमेशरे तिसो दस्सीरा था। रोज सवेरे कने रोज संजके बगता पंछी एलिय्याह खातर रोटी कने माँस लई ने आवां थे। इस सारे बगत, अहाब कने तिसरी सेना एलिय्याह जो टोलदे रये, पर सै तिसो टोली नीं सके।

बरखा नीं हुणे ते किछ बगता ते बाद सै स्त्रोत सूक्की गया। इस खातर एलिय्याह नेड़े रे इकी देशा चौ चली गया। तिस देशा च इक गरीब विधवा थी तिसारे इक पुत्र था। तिनां ले रोटी खत्म ई हुणे लगी री थी कांह्भई तेथी कोई फसल नीं हुई थी। पर फेरी बीं, तिसे जनाने एलिय्याह री देखभाल कित्ति, इस खातर परमेशरे तिसारी कने तिसारे पुत्रा री सारियां जरुरतां जो पूरा कित्या, इसा बजहा ते तिसारे आटा रखणे री जगहा ते आटा कने तिसारे तेला रिआ कुप्पिया ते तेल कदी बी खत्म नीं हुआ। तिस पूरे अकाला रे बगता रे बीच तिनां ले रोटी थी। एलिय्याह किछ सालां तकौ तेथी रैया।

साढ़े तीन्नां सालां ते बाद, परमेशरे एलिय्याह ने गलाया भई तिस फेरी बरखा करनी। तिनें एलिय्याह ते वापस इस्राएला रे राज्य च जाई ने अहाबा ने गल्ल बात करने जो गलाया। इस खातर एलिय्याह अहाबा ले गया। तजे अहाबे तिसो देख्या तां तिसने बोल्या, “अच्छा तू आ, मसीबतां जो लयौणे औला!” एलिय्याह जवाब दित्या, “मसीबता पैदा करने औला तां तू आ! तैं जे यहोवा जो छड्डी दित्तिरा। सै इ सच्चा परमेशर आ, पर तू बाल री उपासना करे रां। हुण तिज्जो इस्राएल राज्य रे सबीं लोकां जो कर्मेल पहाड़ा पर लईने औणा आ।”

इस खातर सब लोक कर्मेल पहाड़ा जो गये। सै माहणु बी आये सै जे बोलां थे भई सै बाल रे संदेशां जो बोलां थे। ये बाल रे भविष्यव्दक्ता थे। सै सब 450 माहणु थे। एलिय्याह लोकां ने गलाया, “कदुआं तकौ तुहां अपणे मनां जो फेरी रखणा? जे यहोवा परमेशर आ तां तिसरी अराधना करा! जे बाल परमेशर आ तां तिसरी उपासना करा।”

तां एलिय्याह बाल रे भविष्यव्दक्तावां ने बोल्या, “इकी खरे पालीरे जानवरा जो बलि करीने माँसा जो बलिदान हुणे जो इक वेदी पर रखा, पर आग्ग नी बालणी। तिसते बाद मांह बी येढ़ा ई करना कने इक लग वेदी पर मांह तिस माँसा जो रखणा। तां जे परमेशर वेदिया पर आग्ग सट्टो तां तुहां जाणी लेणा भई सै सच्चा परमेशर आ।” तां बाल रे भविष्यव्दक्तावें इक बलि त्यार किती पर आग्ग नीं बाली।

तां बाल रे भविष्यव्दक्तावें बाल ने प्राथना कित्ती, “हे बाल, अहांरी सुण!” पूरे दिन तिनें प्राथना कित्ती कने रड़ाये कने येथी तकौ भई अप्पुं जो चाकुआं ने कट्टी लया, पर बाले जवाब नीं दित्या, कने तिनें कोई आग्ग नीं सट्टी।

बाल रे भविष्यव्दक्तावें बाल ने प्राथना करने च लगभग पूरा दिन बताई दित्या। आखर च तिनें प्राथना करना बंद करी दित्या। तां एलिय्याह दुज्जे पाली रे जानवरा रे माँसा जो परमेशरा रिया वेदिया पर रखी दित्या। तिसते बाद, तिनें लोकां जो पाणिये रे बड्डे बरतनां जो तिस बलिदाना पर तदुआं तकौ सट्टणे खातर बोल्या तदुआं तकौ जे माँस, लकड़ियाँ कने येथी तकौ भई वेदिया री अखा बखा री पूरी मिट्टी सिज्जी नीं गई हो।

तां एलिय्याह प्राथना कित्ती, “हे यहोवा, अब्राहम, इसहाक कने याकूबा रे परमेशर, अहां जो दस्स भई तू इस्राएला रा परमेशर आ कने ये भई हऊं तुहांरा दास आ। मिंजो जवाब देवा तिसते जे ये लोक जाणी लो भई तु ई सच्चा परमेशर आ।”

इकदम ई, अकाशा ते आग्ग पई कने तिसते माँस, लकड़ियाँ, चट्टानां, मिट्टी कने येथी तकौ भई वेदिया रे अखा बखा रे पाणिये जो बी फुक्की दित्या। तजे लोकें ये देख्या, तां सै धरतिया पर पई गे कने बोले, “यहोवा ई परमेशर आ! यहोवा ई परमेशर आ!”

तां एलिय्याह बोल्या, “बाल रा इक बी भविष्यव्दक्ता बची ने नीं जाणे पाओ!” इस खातर लोकें बाल रे भविष्यव्दक्तावां जो पकड़ी लया कने तिनां जो तेथी ते लग लई गे कने तनां जो मारी दित्या।

तां एलिय्याहे अहाब राजा ने बोल्या, “छोड़े ई अपणे घरा जो नह्ठी जा, कांह्भई बरखा हुणे औली ई।” छोड़े ई बादल घणे हुई गे कने भारी बरखा शुरु हुई गी। यहोवा तिस सूक्के जो खत्म करे रां था। इसते ये प्रकट हुआ भई यहोवा ई सच्चा परमेशर आ।

तजे एलिय्याहे अपणा काम्म खत्म करी दित्या, तां परमेशरे एलीशा नौं रे इकी माहणुये जो परमेशरा खातर भविष्यव्दक्ता हुणे खातर चुणेया। परमेशरे एलीशा रे जरिये मते सारे चमत्कार कित्ते। इक चमत्कार नामाना सौगी हुआ। सै इक शत्रुये री सेना रा सरदार था, पर तिसो चमड़िया री इक बूरी बमारी हुई गरी थी। नामाने एलीशा रे बारे‍ सुणेया था, इस खातर सै एलीशा लौ आया कने तिसने विनती कित्ती भई सै तिसो ठीक करो। एलीशे नामाना जो बोल्या भई जाईने यरदन नदिया रे पाणिये च सात्त बार डुबकी लाई ले।

नामान गुस्से हुई गया। तिने येढ़ा करने ते मना करी दित्या, कांह्भई ये तिसो मूर्खता औली गल्ल लगी थी। पर बाद च तिने अपणा मन बदली लया कने जाई ने यरदन नदिया रे पाणिये च सात्त बार डुबकी लाई। तजे आखरी बार सै पाणिये ते बाहर निकलया तां परमेशरे तिसो ठीक करी दित्या।

परमेशरे इस्राएला रे लोकां ले होरी मते सारे भविष्यव्दक्तावां जो भेज्या। तिनें सबीं लोकां जो मूर्तियां री उपासना बंद करी देणे रे खातर गलाया। इतरे बजाये, तिनां सबीं जो अप्पुं चीयें न्याय सौगी व्योवहार करना चाहिंदा कने इकी दुज्जे पर दया करनी चाहिंदी ये गल्लां बी सखाई यां। तिनें भविष्यव्दक्तावें लोकां जो चेतावनी दित्ती भई तिनां जो अपणे बूरे कम्मां जो बंद करी देणा चाहिंदा कने इतरे बजाये परमेशरा रियां गल्लां रा पालन करना चाहिंदा। जे तिनें लोकें येढा नीं कित्या तां परमेशरा तिनां जो दोषी मन्नी ने तिनांरा न्याय करना कने तिनां जो सजा देणी।

जादा जे बगता, तिनें लोकें परमेशरा रे हुक्मां रा पालन नीं कित्या। अक्सर तिनें लोकें भविष्यव्दक्तावां सौगी बूरा व्योवहार कित्या येथी तकौ भई कदी कदी तिनां जो मारी दित्या। इक बार, तिनें यिर्मयाह भविष्यव्दक्तावां जो सूक्के खुआ च पाई दित्या कने तिसो तेथी मरने खातर छड्डी दित्या। सै खुआ रिआ तलिया च चीकड़ा च धस्सी गया। पर तजे राजे जो तिस पर दया आई कने तिनें अपणे सैनिकां जो हुक्म दित्या भई यिर्मयाह रे मरने ते पैहले तिसो खुआ ते बाहर खींज्जी लौ।

भविष्यव्दक्तावें परमेशरा खा ते बोलणा शुरू रखेया भले ई लोकें तिसने नफरत कित्ती। तिनें लोकां जो चेतावनी दित्ती भई जे तिनें पश्चाताप नीं कित्या तां परमेशरा तिनां जो नास करी देणा। तिनें लोकां जो ये बी याद दुआई भई परमेशरे तिनां खातर मसीह जो भेजणे री प्रतिज्ञा कित्तिरी।