20. बंधुये बणना कने तेथी ते छुटणा

इस्राएला रे राज्य कने यहूदा रे राज्य दुईं परमेशरा रे बरोधा च पाप कित्या। तिनें तिसा वाचा जो तोड़ी दित्या सै जे परमेशरे तिनां ने सौगी सीनै पहाड़ा पर बन्नी थी। परमेशरे तिनां जो पश्चाताप करने कने फेरी बीं तिसरी आराधना करने खातर चेतावनी देणे जो अपणे भविष्यव्दक्तावां जो भेज्या, पर तिनें तिस रियां गल्लां जो मन्नणे ते मना करी दित्या।

इस खातर परमेशरे तिनां रे शत्रुआं जो तिनां जो नास करने रे जरिये तिनां दुईं राज्यां जो सजा दित्ती। अश्शूर इक लग देश था सै जे बोहत ताकता औला हुई गया था। सै दुज्जे देशा ते खातर बोहत निर्दयी बी थे। तिनें आई कने इस्राएल रे राज्य जो नाश करी दित्या। अश्शूरियें आई ने इस्राएला रे राज्य च बोहतीं जो मारी दित्या, कने तेढ़ा जे चाहया सै लूटी लया कने देशा रे कई हिस्सेया जो फुक्कि दित्या।

अश्शूरियें सबी अगुवेयां, धनवान लोकां कने येढ़े लोकां जो सै जे कीमती चीज़ां बणाई सक्कां थे कट्ठा कित्या कने सै तिनां जो अश्शूर देशा जो लई गये। इस्राएला च सिर्फ किछ गरीब इस्राएली ई बचे थे।

फेरी अश्शूरी लोक तिस देशा च रैहणे खातर विदेशियां जो लई कने आये। तिनें विदेशियें तिनां नगरां जो फेरी ते बणाया। सै जे इस्राएली तेथी बचे थे तिनां ने तिनें ब्याह करी ले। इनां लोकां रे वंशज सामरी केहलाये गये।

यहूदा रे राज्य रे लोकें देख्या भई कियां परमेशरे तिस पर विस्वास नीं करने कने तिस रियां गल्लां जो नीं मनणे रिया वजहा ते इस्राएला रे राज्य रे लोकां जो सजा दित्ती थी। पर इतना हुणे पर बी तिनें कनानियां रे देवतयां री मूर्तियां री उपासना कित्ती। परमेशरे तिनां जो चेतावनी देणे खातर भविष्यव्दक्तावां जो भेज्या, पर तिनें सुणने ते मना करी दित्या।

लगभग इक सौ सालां ते बाद अश्शूरियें इस्राएला रे राज्य जो नास करी दित्या। परमेशरे बेबीलोना रे राजे, नबूकदनेस्सरा जो यहूदा रे राज्य पर हमला करने खातर भेज्या। बेबीलोन इक ताकत औला देश था। यहूदा रा राजा नबूकदनेस्सरा रा दास बणने कने हर साल तिसो मता सारे पैसे रा भुगतान करन खातर सैहमत हुई गया।

पर किछ सालां ते बाद, यहूदा रे राजे बेबीलोना रे बरोधा च बलवा कित्या। इस खातर बेबीलोनियें बापस आई कने यहूदा रे राज्य पर हमला करी दित्या। तिनें यरूशलेम नगरा पर कब्जा करी लया, मंदरा जो नास करी दित्या कने नगरा कने मंदरा रे खजाने जो लूटी कने लई गये।

बलवा करने रिया वजहा ते यहूदा रे राजा जो सजा देणे खातर, नबूकदनेस्सरा रे सैनिकें राजे रे पुत्रां जो तिसरे सामणे मारी दित्या कने फेरी तिस्सो अन्ना करी दित्या। इसते बाद, सै राजे जो लई गये भई सै बेबीलोना रे कैद खाने च मरी जाओ।

नबूकदनेस्सर कने तिसरी सेना यहूदा रे राज्य रे लगभग सारे ई लोकां जो बेबीलोना जो लई गी, सिर्फ सबते गरीब लोकां जो पीछे छड्डी गे भई सै खेतां च फसल पैदा करो। बगता रे इस दौरा जो बंधुऐ बणना बोल्या गई रा। इसच परमेशरा रे लोकां जो वादे रे देशा च ते निकली कने जाणे खातर मजबूर कित्या गया था।

भले ई परमेशरे अपणे लोकां जो तिनां रे पापां खातर बंधुये बणी ने लई जाणे रे जरिये सजा दित्ती, तां बी सै तिनां जो या अपणिया प्रतिज्ञावां जो नीं भुलया था। परमेशरे अपणे लोकां री निगरानिया रखदा रैया कने अपणे भविष्व्दक्तावां रे जरिये तिनां ने गल्लां करदा रैया। तिनां ते प्रतिज्ञा ते सत्तर सालां ते बाद, सै फेरी भीं प्रतिज्ञा कित्तिरे देशा चौ बापस आई गये।

लगभग सत्तर सालां ते बाद, फारसा रे कुस्रु नौं रे राजे बेबीलोना जो हराई दित्या, इस खातर बेबीलोना रे साम्राज्य रे बजाये फारसा रे साम्राज्य ते कई देशां पर राज कित्या। इस्राएली लोक हुण यहूदी केहलावां थे। तिनां च ते बोहतीं अपण पूरा जीवन बेबीलोना च बताई दित्या था। सिर्फ बोहत थोड़े बूढ़े यहूदियां जो ई यहूदा रे देशा री याद थी।

फारसी लोक बोहत सामर्थी थे, पर तिनें अपणे जीती रे लोकां पर दया कित्ती थी। फारसी लोकां रा राजा बणने ते थोड़े बगता ते बाद, कुस्रु राजे इक हुक्म दित्या भई कोई बी यहूदी सै जे यहूदा जो बापस जाणा चाह्वां था, सै फारस ते निकली कने बापस यहुदा जो जाई सकां आ। येथी तकौ भई तिने तिनां जो मंदरा जो बनाणे खातर फेरी बीं पैसा बी दित्या। ईयां बंधक रैहणे रे सत्तर सालां ते बाद, यहूदियां रा इक छोटा झुंड यहूदा च यरूशलेम नगरा जो बापस आई गये।

तजे सै लोक यरूशलेमा पुज्जे तां तिनें मंदरा जो कने नगरा रे चऊं पासेयां री दीवारा जो फेरी बणाया। फारसी लोक अजें बी तिनां पर राज करां थे पर इक बार फेरी ते सै प्रतिज्ञा रे देशा च रये रां थे कने मंदरा च आराधना करे रां थे।