23. प्रभु यीशुये रा जन्म

यूसुफ नौं रे इक धर्मी माहणुये सौगी मरियमा री मंगणी हुई चकी री थी। तजे तिने सुणेया भई मरियम भारहत्थी ई ता सै जाणना चाहवां था भई सै तिसरा बच्चा नीं आ। पर, सै मरियमा जो बदनाम नीं करना चाहंदा था, इस खातर तिने तिसा पर दया करी ने कने चुपचाप तलाक देणे रे बारे च सोचया। पर इसते पैहले भई सै येढ़ा करदा, इकी स्वर्गदूते तिसरे सुफने च आई ने तिसने गल्लां कित्तियां।

तिनें स्वर्गदूते बोल्या, “हे यूसुफ, मरियमा जो अपणी जनाना रे तौरा च लई जाणे ते मत डरदा। तिसारे अन्दर सै जे बच्चा आ सै पवित्र आत्मा खा ते आ। तिसा इकी पुत्रा जो जन्म देणा। तिसरा नौं यीशु रखेयां (इसरा मतलब आ, ‘यहोवा बचावां आ’), कांह्भई तिस लोकां जो तिनां रे पापां ते छुड़ाणा।”

इस खातर यूसुफे मरियमा ने ब्याह कित्या कने तिसा जो अपणिया जनाना रे तौरा च अपणे घरा जो ली आया, पर तिस बच्चे जो पैदा करने तकौ सै तिसा सौगी नीं सया।

तजे मरियमा रे बच्चा पैदा करने रा बगत नेड़े था, तां तिसे कने यूसुफे बैतलहमा जो जाणे खातर इक लंबी यात्रा कित्ती। तिनां जो तेथी जाणा बोहत जरुरी था कांह्भई रोमी अधिकारी इस्राएला च रैहणे औले सबीं लोकां री गिणती करना चाहवां थे। सै चाहवां थे भई सब लोक तेथी जाओ तेथी जे तिनां रे पूर्वज रह्वां थे। राजा दाउदा रा जन्म बैतलहमा च हुआ था कने सै मरियम कने यूसुफा दुईं रा पूर्वज था।

मरियम कने यूसुफ बैतलहमा जो गये, पर तेथी जानवरां जो रखणे औलिया जगहा ते अलावा तिनां रे ठैहरणे खातर कोई जगहा नीं थी। ये सै ई जगहा थी तेथी जे मरियमे अपणे बच्चे जो पैदा कित्या। तिसे तिसो खुरलिया च लटाया कांह्भई तेथी तिस खातर कोई बिस्तरा नीं था। तिनें तिसरा नौं यीशु रखया।

तिसा राती, तेथी नेड़े रे ई फाटां च किछ चरवाहे अपणे भेडां रे झुंडां री रखवाली करे रां थे। अचानक ते, इक चमकदार स्वर्गदूत तिनां पर प्रकट हुआ कने सै डरी गये। तिने स्वर्गदूते बोल्या, “मत डरदे, कांह्भई मेरे ले तुहां खातर शुभ संदेश आ। बैतलहमा च मसीह, स्वामी रा जन्म हुई रा!”

जाई ने तिस बालका जो टोला कने तुहां तिसो कपड़े च लिपटी रा कने चरनिया च लेटी रा पाणा।” अचानक ई आकाश स्वर्गदूतां ते भरी गया। सै परमेशरा री स्तुति करे रां थे। तिनें बोल्या, “सारी महिमा स्वर्गा च विराजमान हुणे औले परमेशरा जो मिलो। धरतिया पर तिनां लोकां च शान्ति हो तिनां री जे सै चिन्ता करां!”

तां स्वर्गदूत चली गे। सै चरवाहे बी अपणिया भेडां जो छड्डी कने बालकां जो देखणे गये। छोड़े ई सै तिसा जगहा पर पुज्जे तेथी जे यीशु था कने तिनें तिसो खुरलिया च लेटीरा देख्या, तेढ़ा जे तिनें स्वर्गदूते गलाया था। सै बोहत उत्साहित थे। तां सै चरवाहे बापस तेथी जो हटी ने आये तेथी जे तिनां रियां भेडां थियां। तिनें जो किछ बी सुणया कने देख्या तिस सबीं खातर सै परमेशरा री स्तुति करे रां थे।

पूर्वा खौ दूर इक देशा च किछ माहणु थे। तिनें सतारेयां रे बारे च अध्ययन कित्या था कने सै बोहत बुध्दिया औले थे। तिनें इक असामान्य सतारे जो आकाशा च देख्या। तिनें गलाया भई इतरा मतलब आ भई यहूदियां रे इकी नवें राजे रा जन्म हुईरा। इस खातर तिनें तिस बालका जो देखणे खातर अपणे देशा ते यात्रा करने रा निर्णय कित्या। इक लंबी यात्रा ते बाद, सै बैतलहमा जो आये कने तिस घरा जो टोलया तेथी जे यीशुये कने तिसरे माता-पिता ठेहरी रे थे।

तजे इनें माहणुयें यीशुये जो अपणी मावा सौगी देख्या तां तिनें गोडे टेकी कने तिसरी आराधना कित्ती। तिनें यीशुये जो कीमती तोफे दित्ते। फेरी सै घरा जो बापस हटी गये।