24. यूहन्ना रा यीशुये जो बपतिस्मा देणा

एलीशिबा कने जकर्याह रा इक पुत्र यूहन्ना, बड्डा हुईने इक भविष्यव्दक्ता बणी गया। सै जंगला च रैया करां था कने जंगली शैहत कने टिड्डियाँ खाया करां था कने ऊँटा रे चमड़ रे बणी रे कपड़े पैहनां था।

बोहत सारे लोक यूहन्ना रियां गल्लां सुणने खातर जंगला च जाणे लगे। तिने येढ़ा बोली ने तिनां जो प्रचार कित्या, “पश्चाताप करा, कांह्भई स्वर्गा रा राज्य नेड़े आ!”

तजे लोकें यूहन्ना रे संदेशा जो सुणया, तां तिनां च ते बोहतीं अपणे पापां ते पश्चाताप कित्या कने यूहन्ने तिनां जो बपतिस्मा दित्या। यूहन्ना जो देखणे खातर बोहत सारे धार्मिक अगुवे बी आये, पर तिनें अपणे पापां रा पश्चाताप या अंगीकार नीं कित्या।

यूहन्ने धार्मिक अगुवेयां ने बोल्या, “हे जेहरीले सप्पो! पश्चाताप करा कने अपणे व्योवहारा जो बदला। परमेशरा हर इक तिस डाला जो कटी देणा सै जे खरा फल नीं लयोंदा कने तिस तिनां जो अग्गी च पाई देणा।” सै जे भविष्यव्दक्तावें गलाया था यूहन्ने तिसो पूरा कित्या, “देख, छोड़े ई मांह तेरे अग्गे अपणा संदेशा देणे औले जो भेजणा तिस जे तेरे खातर रस्ता त्यार करना।”

किछ धार्मिक अगुवेयां यूहन्ना ते पुछेया भई क्या सै मसीह आ। यूहन्ने जवाब दित्या, “हऊं मसीह नीं आ, पर सै मेरे बाद आये रां। सै इतना महान आ भई हऊं तिसरे जूत्तेयां रे तसमे खोलणे रे बी जोगा नीं आ।”

अगले दिन, यीशु बपतिस्मा लेणे रे खातर यूहन्ना लौ आया। तजे यूहन्ने तिसो देख्या, तां तिने बोल्या, “देखा! परमेशरा रा मेमना तिस जे संसारा रे पापां जो चक्की ने लई जाणा।”

यूहन्ने यीशुये ने गलाया, “हऊं तिज्जो बपतिस्मा देणे रे जोगा नीं आ। इतरे बजाये जरुरी आ भई तू मिंजो बपतिस्मा देओ।” पर यीशुये गलाया, “तिज्जो मिंजो बपतिस्मा देणा चाहिंदा, कांह्भई ये ई काम्म करना अहां खातर ठीक आ।” इस खातर यूहन्ने तिसो बपतिस्मा दित्या, यीशुये कदी बी पाप नीं कित्या था।

बपतिस्मा दित्ते जाणे ते बाद तजे यीशु पाणिये ते निकली ने बाहर आया, तां परमेशरा रा आत्मा कबूतरा रे रुपा च प्रकट हुआ कने थल्ले आई ने यीशुये पर ठेहरी गया। तिस ई बगत, परमेशरे स्वर्गा ते गल्ल कित्ती। तिने बोल्या, “तू मेरा पुत्र आ। हऊं तेरने प्रेम करां कने हऊँ तेरते बोहत खुश आ।”

परमेशरे यूहन्ना ने बोल्या था, “पवित्र आत्मा थल्ले आई ने तिस पर जे ठेहरी जाणा तिसो जे तू बपतिस्मा देणा।” सै ई परमेशरा रा पुत्र आ परमेशर इक ई आ। पर तजे यूहन्ने यीशुये जो बपतिस्मा दित्या, तां तिनें परमेशर पिता जो गल्लां करदे सुणया, पुत्र परमेशरा जो देखा, सै जे यीशु आ, कने तिने ने पवित्र आत्मा जो देख्या।