33. इकी करसाणा री कहाणी

इक दिन, यीशु झीला रे कनारे रे नेड़े था। सै लोकां जो इक बोहत बड्डी भीड़ा जो शिक्षा दे रां था। तिसो सुणने खातर इतने सारे लोक आये भई यीशुये ले तिनां सबीं ने गल्लां करने खातर जगहा नीं बची। इस खातर सै पाणिये च खड़ी रिया इकी किस्तिया पर चढ़ी गया। तेथी सै बैठी गया कने लोकां जो शिक्षा दित्ती।

यीशुये तिनां जो ये कहाणी सुणाई, “इक किसान बीऊ बाहणे खातर खेतां जो चलया। तजे सै हत्थां ते बीऊआं जो बखेरे रां था तां किछ बीऊ रस्ते रे कंडे पये। पर पंछियें आई ने तिनां सबीं बीऊआं जो खाई लया।”

“किछ बीऊ पथरीली धरतिया पर पये तेथी जे बोहत घट्ट मिट्टी थी। पथरीली धरतिया पर पईरे बीऊआं जो बोहत छोड़े ई लूंगाँ निकली गी आं, पर तिनां रियां जड़ां धरतिया च गेहराईया च जाई नीं सकदियां थियां। तजे सूरज निकलया कने गर्मी हुई तां सै पौधे मुरझाई गे कने खत्म हुई गये।”

“किछ बीऊ झाड़ियाँ रे बीच्च पये। तिनें बीऊयें बधणे लगे, पर कण्डेआं तिनां जो दबाई दित्या। इस खातर कण्डेआं औलिया मिट्टिया पर पईरे बीऊआं च ते निकली रे पौधे किछ बी अनाज पैदा नीं करी सके।”

“किछ बीऊ खरिया मिट्टिया च पये। सै बीऊ बधे कने तितने जे बाईरे थे तिसते 30,60 कने येथी तकौ भई 100 गुणा अनाज पैदा कित्या। जो कोई परमेशरा रे पीछे चलणा चाहवां, सै इसा मेरिया गलाई रियां इनां गल्ला जो ध्यान दई ने सुणो!”

इसा कहाणिया ते चेले परेशानिया च पई गे। इस खातर यीशुये व्याख्या कित्ती, “सै बीज परमेशरा रा वचन आ। सै रस्ता इक येढ़ा माहणु आ सै जे परमेशरा रे वचनां जो सुणां, पर तिस्सो समझदा नीं आ। तां शैतान तिस ला ते वचनां जो चोरी ने लई जां। मतलब शैतान तिसो वचनां जो समझणे नीं देंदा।”

“सै पथरीली मिट्टी सै माहणु आ सै जे परमेशरा रे वचनां जो सुणा कने खुशिया ने सौगी वचनां जो मन्नी बी लां। पर तजे मुस्कला रा बगत आवां, या तजे होर लोक तिस्सो सतावांये, तां सै परमेशरा ते दूर चली जां। मतलब सै परमेशरा पर भरोसा करना बंद करी देआं।”

“सै कण्डेयां औली मिट्टी येढ़ा माहणु आ सै जे परमेशरा रे वचनां जो सुणां। पर सै मतियां सारियां गल्लां रे बारे च चिन्ता करने शुरु करी देआं, कने सै बोहत पैसा कमाणे री कोसत करां कने कईयां चीजां जो कट्ठा करने री कोसत करां। किछ बगता ते बाद, हुण सै परमेशरा जो प्रेम करने जोगा नीं मेहसूस करदा। इस खातर जो किछ तिने परमेशरा रे वचनां ते सीखया था सै तिस रिया तरफा ते परमेशरा जो खुश करने जोगा नीं बणांदा। सै बगैर सिल्लुआं औलिया कणका साई आ तिसते जे कोई अनाज पैदा नीं हुंदा।”

“पर खरिया मिट्टी तिस माहणुये रे बारे च दस्सां ई सै जे परमेशरा रे वचनां जो सुणां, तिस पर विस्वास करां कने मता फल पैदा करां।”