32. प्रभु यीशुये रा इक दुष्टात्मा रे पकड़ी रे कने इकी बमार जनाना जो ठीक करना

यीशु कने तिसरे चेले अपणिया किस्तिया च तिस लाके जो गये तेथी जे गिरासेनी लोक रहवां थे। सै तिस लाके च पुज्जी कने किस्तिया ते उतरी गये।

तेथी इक माहणु दुष्टात्मा रा पकड़ी रा था।

सै माहणु इतना ताकता औला था भई कोई बी तिस्सो बसा च नीं करी सकदा था। कई बार लोकें तिसरे हत्था पैरां जो जंजीरां ने बन्नेया। पर सै तिनां जो तोड़ी देआं था।

सै माहणु तिस लाके च कब्रां च रहवां था। ये माहणु पूरे दिन कने पूरी रात रड़ांदा रहवां था। सै कपड़े नीं पैहनदा था कने अक्सर अप्पुं जो पत्थरां ने घायल करदा रहवां था।

सै माहणु दौड़ी कने यीशुये ला जो आया कने तिसरे सामणे गोडे टेकी दित्ते। तां यीशुये तिस माहणु रे अन्दर बैठी री दुष्टात्मा ने गल्ल बात कित्ती कने गलाया, “इन माहणुये च ते बाहर निकली जा!”

सै दुष्टात्मा ऊच्चिया आवाजा च रड़ाई, “हे यीशु, परम प्रधान परमेशरा रे पुत्र, तिज्जो मेरने क्या काम्म? मेहरबानी करी ने मिंज्जो परेशान मत करदा!” तां यीशुये तिसा दुष्टात्मा ते पुछया, “तेरा नौं क्या?” तिसे जवाब दित्या, “मेरा नौं सेना आ, कांह्भई अहें बोहत ये।” (रोमी सेना च कई हजार सैनिकां रा इक झुण्ड “सेना” हुआं थी।)

तिनें दुष्टात्मायें यीशुये ने विनती कित्ती, “मेहरबानी करीने अहां जो इस लाके ते बाहर मत भेजदा!” तेथी नेड़े पहाड़ा पर सूराँ रा इक झुंड चरे रां था। इस खातर तिनें दुष्टात्मायें यीशुये ने विनती कित्ती, “मेहरबानी करी ने अहां जो तिनां सूराँ च भेज्जी दे!” यीशुये बोल्या, “ठीक आ, तिनां च चली जावा!”

इस खातर सै दुष्टात्मां तिस माहणुये च ते निकली ने तिनां सूराँ च चली गियां। सै सूर दौड़े कने इक बड्डिया टिह्गा परा ते झीला रे पाणिये च पई गे कने डूब्बी ने मरीगे। तिस झुंडा च लगभग 2000 सूर थे।

तेथी सूराँ री देखरेख करने औले लोक थे। जो किछ हुआ था तजे तिनें देख्या तां सै नगरा चौ नह्ठी गये। यीशुये जो किछ कित्या था तेथी तिनें सबीं लोकां जो दस्सया। तिस नगरा रे लोक निकली आये कने तिस माहणुये जो देख्या, तिसच जे दुष्टात्मावां थियां। सै शान्त हुई ने, कपड़े पैहनी ने, इकी आम माहणुये साई गल्ल बात करदा बैट्ठी रा था।

सै लोक डरी रे थे कने तिनें यीशुये जो तेथी ते चली जाणे जो गलाया। इस खातर यीशु किस्तिया पर चढ़ी गया। सै माहणु तिसच जे दुष्टात्मावां थियां तिनें यीशुये सौगी जाणे री विनती कित्ती।

पर यीशुये तिसने बोल्या, “नईं। हऊं चाहवां भई तू घरें जाई कने सबीं जो दस्सो भई परमेशरे तेरे खातर क्या कित्तिरा। तिनां जो दस्स भई कियां परमेशरे तू पर दया कित्ती थी।”

इस खातर सै माहणु चली गया कने सबीं जो इस बारे च दस्सया जो किछ यीशुये तिस खातर कित्या था। तिसरी कहाणिया जो सुणने औलास हर इक माहणु रैहान हुआ था।

यीशु झीला रिया दुज्जिया तरफा बापस आया। तिने तेथी पुज्जणे ते बाद, इक बड्डी भीड़ तिस अखा बखा कट्ठी हुई कने तिसो घरी लया। तिसा भीड़ा च इक जनाना थी सै जे बारहां सालां ते लहू बैहणे रिया बमारिया ते बमार थी। तिसे अपणा सारा पैसा वैदां जो दई तरा था भई सै तिसा जो ठीक करी दो, पर तिसारी बमारी होर बी बिगड़ी गी थी।

तिसे सुणया था भई यीशुये कईयां बमार लोकां जो ठीक कित्या था कने तिसे सोच्या, मिंज्जो पक्का विस्वास आ भई जे हऊँ सिर्फ यीशुये रे कपड़ेयां जो छूई लेंगी, तां मांह ठीक हुई जाणा!” इस खातर सै यीशुये रे पीछे खा आई कने तिसरे कपड़े जो छुया। तियां जे तिसे सै छुये, तिसारा लहू बगणा बंद हुई गया।

ताहलूं ई, यीशुये जाणी लया भई मेरते सामर्थ निकली री। इस खातर तिने पीछे मुड़ी कने पुछया, “मिंजो किने छुया?” चेलेयां जवाब दित्या, “येथी इतने सारे लोक तेरे चऊं पासेयां तिज्जो घेरी ने खड़ी रे कने तिज्जो छुणे री कोसत करे रां ये। तां तैं कैं पूछया भई मिंजो किने छुयी रा?”

सै जनाना यीशुये रे सामणे कँबदी आई कने बोहत डरी री अपणे गोडेयां पर बैठी गी। तां तिसे प्रभुये जो दस्सया भई तिसे क्या कित्तिरा कने येढ़ा बी भई फेरी सै ठीक हुई गरी। प्रभु यीशुये तिसाने बोल्या, “तेरे विस्वासा ते तू ठीक हुई गरी। शान्तिया ने चली जा।”