31. यीशुये रा पाणिये पर चलणा

पांज्ज हजार लोकां जो रोटी खुआणे ते बाद, यीशुये अपणे चेलेयां जो किस्तिया पर जाणे खातर गलाया। तिने तिनां जो झीला रिया दुज्जिया खा जाणे खातर गलाया पर अप्पुं किछ बगता खातर ओथी ई रैया। इस खातर चेले चली गे कने यीशु भीड़ा जो विदा कित्या भई सै अपणे घरा जो चली जाओ। इसते बाद, यीशु प्राथना करने खातर इकी पहाड़ा पर चली गया। तेथी सै कल्ला था, कने तिने बोहत देर राती तकौ प्राथना कित्ती।

तिस बगत, चेले अपणिया किस्तिया जो चलांदे जाये रां थे, पर हवा तिनांरे बरोधा च जोरा ने बगे रां थी। बोहत रात हुणे पर बी सै सिर्फ झीला रे बीच ई पुज्जे थे।

तिस बगत यीशुये प्राथना करना खत्म कित्ती कने अपणे चेलेयां लौ बापस जाणे शुरु कित्या। सै किस्तिया खा जो जाणे खातर पाणिये पर चलणे लगया।

ता चेलयां तिसो देख्या। सै बोहत डरी गये कांह्भई तिनें सोच्या था भई ये कोई भूत आ। यीशु जाणां था भई सै डरी गे थे, इस खातर तिने तिनां जो हाक्क पाई ने बोल्या, “मता डरदे, ये हऊँ आ!”

तां पतरसे यीशुये ने बोल्या, “हे प्रभु, जे ये तू आ तां मिंज्जो पाणिये पर चली कने तेरे ला जो औणे रा हुक्म दे।” यीशुये पतरसा ने बोल्या, “औ!”

इस खातर पतरस किस्तिया ते उतरी गया कने यीशुये ला जो जाणे खातर पाणिये पर चलणा शुरु कित्या। पर थोड़ी दूर जाई ने, तिने अपणियां नजरां यीशुये ते हटाई ने लैहरां जो देखणा शुरु कित्या कने तिसो हवा ते तेज हुणे रा बी पता लगणे लदी गया।

तां पतरस डरी गया कने पाणिये च डूबणे लगया। सै रड़ाया, “हे प्रभु, मिंज्जो बचा!” यीशुये तिस ई बगत हात्थ बधाया कने तिसो पकड़ी लया। तां पतरसे गलाय, “तेरा विस्वास बोहत घट आ! तिजो बजाई ने रखणे खातर तैं मेरे पर भरोसा कां नीं कित्या?”

तां यीशु कने पतरस किस्तिया पर चढ़ी गये कने इकदम हवा बगणे बंद हुई गी। पाणी शान्त हुई गया। चेलेयां रैहान हुई कने यीशुये रे अग्गे गोडे टेकी दित्ते। तिनें तिसरी आराधना कित्ती कने तिसने बोल्या, “सचमुच तू परमेशरा रा पुत्र आ।”