30. यीशुये रा पांज्ज हजार लोकां जो रोटी खुआणा

यीशुये अपणे प्रेरितां जो प्रचार करने कने लोकां जो शिक्षा देणे खातर बोहत सारे लग-लग गावाँ च भेज्या। तजे सै तेथी ते बापस प्रभु यीशुये ला जो आये तां तिनें दस्सया भई तिनें क्या कित्या था। तां यीशु तिनां जो किछ बगता खातर आराम करने खातर गलाया, कने झीला रिया दुज्जिया तरफा जो तिनां सौगी इक शान्त जगहा पर जाईने किछ बगता तकौ अराम करने खातर लई चलया। इस खातर सै किस्तिया पर चढ़ी गये कने झीला रे दुज्जे पासे चली गये।

पर तेथी मते सारे येढ़े लोक थे तिनें जे यीशुये कने चेलेयां जो किस्तिया च जांदे देख्या था। ये लोक तिनां ते अग्गे झीला रे दुज्जिया खा जाणे खातर झीला रे कनारे चीयें तजिया ने गये। इस खातर तजे यीशु कने चेले पुज्जे तां लोकां रा इक बड्डा झुंड तिनां जो तेथी पैहले ई पुज्जी कने तेथी नह्यालणे लगीरे थे।

तिसा भीड़ा च जनानां कने बच्चेयां ते बगैर सिर्फ 5000 जे जादा माहणु ई थे। यीशुये जो तिनां लोकां पर बोहत तरस आया। यीशुये खातर सै लोक बिना चरवाहे रियां भेड्डां साई थे। इस खातर तिनें तिनां जो शिक्षा दित्ती कने तिनां रे बीच्च सै जे लोक बमार थे तिनां जो चंगा कित्या।

दिनां रे आखर च, चेलेयां यीशुये ने बोल्या, “हुण देर हुई गरी कने नेड़े तेड़े बी कोई नगर नीं आ। इनां लोकां जो जाणे दे भई सै जाई ने खाणे खातर किछ खरीदी लो।”

पर यीशुये चेलेयां ने बोल्या, “तुहें ई तिनां जो खाणे खातर किछ देओ!” तिनें जवाब दित्या, “अहें येढ़ा कियां करी सकां ये?” अहां ले सिर्फ पांज्ज रोटियां कने दो मछियाँ इयां।”

यीशुये अपणेयां चेलेयां ने गलाया बई सै भीड़ा रे लोकां जो घा पर इकी लेणी च पंजाह लोकां जो बेठणे खातर बोलो।

तां यीशुये पांज्ज रोटियां कने दो मछियाँ जो लईने स्वर्गा खो देख्या कने तिसा रोटिया खातर परमेशरा रा धन्यवाद कित्या।

फेरी यीशुये रोटी कने मछियां जो टुकड़ेयां च तोड़ेया। तिनें लोकां जो देणे खातर अपणे चेलेयां जो सै टुकड़े दई ते। चेले तिसा रोटिया जो बँडदे रहे कने सै कदी बी खत्म नीं हुआ! सै सब लोक खाई ने रज्जी गये।

तिसते बाद, चेलेयां तिसा रोटिया जो कट्ठा कित्या, सै जे खाणे ते बिना रई गरी थी कने तिनां बची रियां रोटियां ते लगभग बाराह टोकरू तिनां ले बची गे थे! सै सारी रोटी तिनां पांज्ज रोटियां कने दुई मछियां ते आई थी।