29. निर्दई दासा री कहाणी

इक दिन, पतरसे यीशुये ते पूछया, हे स्वामी, मिंज्जो अपणे भाईये जो कितनी बार माफ करना चाहिंदा तजे सै मेरे बरोधा च पाप करो? क्या सात्त बार तकौ?” यीशुये बोल्या, “सात्त बार नीं, पर सात्त रे सत्तर बार माफ कर!” इसरे जरिये यीशु ये दसणा चाहवां आ भई अहां जो सदा माफ करना चाहिंदा। तां यीशुये ये कहाणी दस्सी।

प्रभु यीशुये बोल्या, “परमेशरा रा राज्य इकी राजे साई आ सै जे अपणे दासा ते लेखा लेणा चाहवां था। तिसरा इक दास 200000 रपईये रे मजदूरिया रे पैसेयां रे इक बड्डे करजे रा करजदार था।”

पर सै दास अपणा करजा नीं दई पाया, इस खातर राजे बोल्या, “इसरा करज चुकाणे खातर इस माहणुये जो कने इसरे टबरा औलेयां जौ दासां रे तौरा च बेची दो।”

“तिने दासे राजे रे सामणे अपणे गोडेयां टेकी ने बोल्या, ‘मेहरबानी ने मेरे सौगी धीरजा ने काम्म लै, कने मांह अपणे करजा रिया पूरिया रकमा रा भुगतान करी देणा।’ राजे तिस दासा पर दया कित्ती। इस खातर तिने तिसरे सारे करजा जो माफ करी दित्या कने तिसो जाणे दित्या।”

“पर तजे सै दास राजे ला जो बाहर गया, तां तिसो तिसरा इक साथी दास मिलय सै जे सिर्फ चार महीनेयां रिया मजदूरिया बराबर करजदार था। तिने दासे अपणे साथी दासा जो पकड़ी लया कने गलाया, ‘सै जे मेरे उपर करज आ मिंज्जो तिसरा भुगतान कर!”

“तिने साथी दासे गोडेयां रे भार पई ने बोल्या, ‘मेहरबानी ने मेरे सौगी धीरजा ने काम्म लै, कने मांह अपणे करजा रे पूरे पैसेयां रा भुगतान करी देणा।’ पर इसरे बजाये, तिने दासे अपणे साथी दासा जो जेलखाने च पाई दित्या तदुआं तकौ जे भई सै तिस करजा रा भुगतान नीं करी दो।”

“जो किछ हुआ था ये गल्ल किछ होरीं दासें बी देखी कने सै बोहत परेशान हुये। सै राजे ला जो गये कने तिसो सब किछ दस्सया।”

“राजे तिस दासा जो सद्दी कने बोल्या, ‘हे दुष्ट दास! मैं तेरे करजा जो इस खातर माफ कित्या था कांभई तैं मेरने विनती कित्ती थी। तां तिजो बी तेढ़ा ई करना चाहिंदा था।’ राजा इतने गुस्से था भई तिने तिस दुष्ट दासा जो जेलखाने च पाई दित्या तदुआं तकौ जे भई सै अपणे सारे करजा रा भुगतान नीं करी दो।”

तां यीशुये बोल्या, “मेरा स्वर्गा च विराजमान पिते तुहां च ते हर इक ने सौगी येढ़ा ई करना जे तुहें भाई ये जो अपणे दिला ते माफ नीं करो।”