28. धनी जवान शासक

इक दिन, इक धनी जवान शासके यीशुये ले आई ने तिसते पुछया, “हे उत्तम गुरु, अनन्त जीवन पाणे खातर मिंजो क्या करना चाहिंदा?” यीशुये तिसने बोल्या, “तू मिंज्जो ‘उत्तम’ कैं बोलां? सिर्फ इक ई उत्तम आ कने सै परमेशर आ। पर जे तू अनन्त जीवन पाणा चाहवां तां परमेशरा री व्यवस्था रा पालन कर।”

“मिंज्जो कुण कुण झे हुक्मा रा पालन करने ती जरुरत ई?” तिने पूछया। यीशुये जवाब दित्या, “हत्या नीं करना। व्यभिचार नीं करना। चोरी नीं करनी। झूठ नीं बोलणा। अपणे पिता कने माता रा आदर करना कने अपणे पड़ोसिये ने अप्पुं साई प्रेम करना।”

पर तिस जवान माहणुये बोल्या, “ हऊँ अपणिया छोटिया उम्रा ते ई इनां सबीं हुक्मां रा पालन करदा आई रा। मिंज्जो सदा खातर जीऊंदे रेहणे खातर होर बी क्या करने री जरुरत ई?” यीशुये तिस खा जो देख्या कने तिसने प्रेम कित्या।

यीशुये जवाब दित्या, “जे तू सिध्द हुणा चाहवां तां जाईने अपणा सब किछ बेची दे कने सै पैसा गरीबां च बंड्डी दे कने तिज्जो स्वर्गा च धन मिलणा। तां आई ने मेरे पीछे आई जा।”

तजे तिनें जवान माहणुये सुणेया भई प्रभु यीशुये तिस्सो क्या जवाब दित्या, तां सै जवान बोहत उदास हुई गया, कांह्भई सै बोहत धनी था कने सै अपणी सारी धन दौलत नीं देणा चाहंदा था। सै मुड़ी ने यीशुये ला ते चली गया।

तां यीशुये अपणे चेलेयां ने गलाया, “परमेशरा रे राज्य चौ जाणा धनी लोकां खातर बोहत कठण आ! हाँ, किसी धनी माहणुये रा परमेशरा रे राज्य चौ जाणे ते तां किसी ऊँटा रा सूईया रे नक्के चीयें हुई ने निकली ने जाणा असान आ।”

जो किछ यीशुये गलाया तजे चेलेयां सुणया ता सै बोहत रैहान हुये। तिनें बोल्या, “जे येढ़ा आ तां परमेशर किसो बचांगा?”

यीशुये चेलेयां पर दृष्टि कित्ती कने बोल्या, “लोकां खातर अप्पुं अपणा उध्दार करना तां असम्भव आ। पर परमेशरा खातर किछ बी करना असम्भव नीं आ।”

पतरसे यीशुये ने बोल्या, अहें सारे चेले अपणा सब किछ छड्डी कने तेरे पीछे आई गरे। तां अहां जो क्या इनाम मिलणा?”

यीशुये जवाब दित्या, “हर इक माहणुये तिने जे मेरिया बजहा ते घर, भाई, बैहण, पिता, माता, बच्चे या सम्पतिया जो छड्डी तरा हो, तिस तिसते 100 गुणा जादा मिलया करना कने अनन्त जीवना जो बी पाणा। पर बोहत सारे सै जे पैहले आईरे तिनां पीछे हुणा कने बोहत सारे सै जे पीछले ये तिनां पैहले औणा।”