27. दयालु सामरीये री कहाणी

इक दिन, यहूदी व्यवस्था रा इक खरा जाणकार यीशुये ला जो आया। सै सबीं जो ये दस्णा चाहवां था भई यीशु गलत रितिया ने शिक्षा दे रां था। इस खातर तिनें गलाया, “हे गुरू, अनन्त जीवन पाणे खातर हऊँ क्या करुँ?” यीशुय जवाब दित्या, “परमेशरा री व्यवस्था च क्या लिखी रा?”

तिनें माहणुये बोल्या, “तेथी लिखिरा भई अपणे परमेशरा ते अपणे सारे मन, प्राण, सामर्थ कने बुध्दिया ने प्रेम रख। कने अपणे पड़ेसिये ने अप्पुं साई प्रेम रख।” यीशुये जवाब दित्या, “तू इकदम ठीक आ! जे तू येढ़ा करो, तां तिज्जो अनन्त जीवन पक्का ई मिलणा।”

पर सै व्यवस्था रा खरा जाणने औला लोकां जो दसणा चाहवां था भई तिसरा जीवन जीणे रा तरीका ठीक था। इस खातर तिने यीशुये ते पुछया, “ठीक आ, तां मेरा पड़ोसी कुण आ?”

यीशुये तिस व्यवस्था रे खरे जाणने औले जो इक कहाणी दस्सी ने जवाब दित्या। “इक यहूदी माहणु था सै इक सड़का ते हुईने यरुशलेमा ते यरीहो जो जाये रां था।”

“पर किछ डाकुयें तिसो देख्या कने तिस पर हमला करी दित्या। तिनें तिसरा सब किछ लई लया कने तिसो लगभग मरने तकौ मारेया कने कुटया। तां सै चली गे।”

“तिसते बाद, इक यहूदी याजक तिसा सड़का चीयें चली ने जाये रां था। तिने याजके तिस माहणुये जो सड़का पर पई रा देख्या। तजे तिने दिख्या तां सै सड़का रे दुज्जिया खा ते चली कने अग्गे बधी गया। तिने तिस माहणुये जो पूरे तरीके ने अणदेखा करी दित्या।”

“इसते बाद थोड़ा बगत बीतणे पर, इक लेवी तिस सड़का चीयें आया। (लेवी यहूदियां रा इक गोत्र था तिनें जे मंदरा च याजकां री मद्द कित्ती थी।) सै लेवी बी सड़का रे दुज्जे खा ते निकली गया। तिने बी तिस माहणुये जो अणदेखा करी दित्या।”

“अगला माहणु तिस सड़का पर आया सै सामरिया रा इक माहणु था। (सामरी कने यहूदी इकी दुज्जे ते नफरत करां थे।) तिने सामरिये सड़का पर तिस माहणुये जो देख्या। तिने देख्या भई सै इक यहूदी था, पर फेरी बीं तिसो तिस पर बोहत दया आई। इस खातर सै तिस ला जो गया कने तिसरे जख्मा पर पट्टियाँ बन्नियाँ।”

“फेरी तिस सामरिये तिस माहणुये जो अपणे गधे पर रखी कने तिसो सड़का ते इकी सरांयी चौ लई गया। तेथी तिने तिसरी देखभाल करने रा प्रबन्ध कित्या।”

“अगले दिन, तिस सामरिये जो अपणी यात्रा जो जारी रखणे री जरुरत थी। तिने तिस सरांई रे संभाल करने औले इकी माहणुये जो किछ पैसे दित्ते। तिने तिसने बोल्या, “इस माहणुये री देखभाल करयां। जे इनां पैसेयां ते अलावा तेरा किछ होर पैसा खर्च हो तां बापस औणे पर मांह तेरे तिस पैसे रा भुगतान करी देणा।”

फेरी यीशुये तिस व्यवस्था रे खरे जाणने औले ते पुछया, “तू क्या सोचां? इनां तीन्नां लोकां च ते कुण तिस माहणुये रा पड़ोसी आ तिसो जे लूट्टी ने मारया बी गया था?” तिने जवाब दित्या, “सै ई तिने जे तिस पर दया कित्ती थी।” यीशुये तिसने बोल्या, “तू जा कने येढ़ा ई कर।”