26. प्रभु यीशु सेवा करने शुरू करां

शैताना री लई री परिक्षा जो पूरा करने ते बाद, यीशु बापस गलील रे लाके चौ आया। ये सै ई जगा ई तेथी जे सै रहवां था। पवित्र आत्मा तिसो बोहत सामर्थ दे रां था कने यीशु इकी जगहा ते दुज्जिया जगहा जो जाई ने लोकां जो शिक्षा देणे रा काम्म करने लगया। सबीं तिसरे बारे च खरियां गल्लां गलाये रां थे।

यीशु नासरत नगरा चौ गया। ये सै गांव आ तेथी जे सै अपणे बच्चपना च रह्वां था। सब्ता रे दिन, सै आराधना करने रिया जगहा पर गया। अगुवे तिसो यशायाह भविष्यव्दक्ता रे संदेशां री इक कताब दित्ती। सै चाहवां थे भई सै तिस चते पढ़ो। इस खातर यीशुये तिसा कताबा जो खोली कने तिसते इकी हिस्से जो लोकां खातर पढ़ा।

यीशुये पढ़ा, “परमेशरे मिंजो अपणा आत्मा दित्तिरा भई हऊँ कंगालां च सुसमाचार प्रचार करी सकूँ। तिनें मिंज्जो इस खातर भेज्जिरा भई कैदियां जो स्वतंत्र करूष, अन्नेयां जो फेरी नजरां देऊँ कने तिनां जो छुटकारा देऊँ तिनां जो जे दुज्जे लोक जिगलेया रां ये। ये सै बगत आ तजे परमेशरे अहां पर कृपा करनी कने अहांरी मद्द करनी।”

फेरी यीशु बैठी गया। सब लोक तिसो बड़े ध्याना ने देख्या रां थे। सै जाणां थे भई पवित्र शास्त्र रा सै जे हिस्सा तिनें अजें पढ़या था सै मसीह रे बारे च था। यीशुये बोल्या, “सै जे गल्लां मैं हुण तुहांरे खातर पढ़ियां, सै इस बगत घटे बी रां ईयां।” सब लोक रैहान थे। तिनें गलाया, “क्या सै यूसुफा रा पुत्र नीं आ?”

तां यीशुये गलाया, “ये सच्च आ भई लोक किसी येढ़े भविष्यव्दक्ता जो कदी स्वीकार नीं करदे सै जे तिनां रे नगरा च पलेया कने बड्डा हुई रा हो। एलिय्याह भविष्यव्दक्ता रे बगता च, इस्राएला च मतियां सारियां विधवा थियां। पर तजे साड्डे तीन्न सालां तकौ बरखा नीं हुई तां परमेशरे एलिय्याह जो इस्राएला च किसी विधवा री मद्द करने खातर नीं भेज्या। इसरे बजाये, तिने एलिय्याह जो किसी होरी देशा रिया विधवा लौ भेज्या।”

यीशु बोलदा रैया, “कने एलीशा भविष्यव्दक्ता रे बगता च, इस्राएला च बोहत सारे लोकां जो चमड़िया री बमारी ते घिरी रे थे। पर एलीशे तिनां च ते किसी जो बी चंगा नीं कित्या। तिने सिर्फ इस्राएल रे बैरियां रे सेनापतिये नामाना जो ई ठीक कित्या।” पर सै जे लोक यीशुये जो सुणे रां थे सै यहूदी थे। इस खातर तजे तिनें ये गल्लां सुणियां तां सै तिस पर गुस्से हुये।

नासरत रे लोकें यीशुये जो पकड़ी लया कने तिसो आराधना रिया जगहा ते घसीटी ने बाहरा जो लई गे। सै तिसो मारी देणे खातर थल्ले सट्टणे जो इकी पत्थरा रे सिरे पर लई गे। पर यीशु भीड़ा च ते निकली कने चली गया कने नासरत नगरा जो छड्डी ने होरती जो चली गया।

फेरी यीशुये सारे गलीगा रे लाके च गया कने बड्डी भीड़ तिसले आई। सै मते सारे लोकां जो लई कने आये सै जे बमार कने लंगड़े थे। तिनां च ते किछ देखी, चली, सुणी या बोली नीं सकदे थे। प्रभु यीशुये तिनां जो चंगा कित्या।

इसते अलावा, मते सारे येढ़े लोक यीशुये ला जो तिनें लयांदे तिनां च जे कई दुष्टात्मा थियां। यीशुये कई दुष्टात्मा जो तिनां च ते निकलणे रा हुक्म दित्या। सै दुष्टात्मा आम तौरा ते रड़ावां थियां, “तू परमेशरा रा पुत्र आ!” भीड़ा रे लोक रैहान थे कने तिनें परमेशरा री स्तुति कित्ती।

फेरी यीशुये बाह्रां माहणुआं जो चुणेया तिनां जो जे तिने अपणे प्रेरित गलाया। तिनें प्रेरितें तिस ने सौगी यात्रा कित्तियां कने तिसते शिक्षा लेंदे रये।