35. दयालू पिते री कहाणी

इक दिन, यीशु मते सारे लोकां जो शिक्षा दे रां था सै जे तिसरी सुणने खातर कट्ठा हुईरे थे। ये लोक चुंगी लेणे औले कने होर मते लोक बी थे तिनें जे मूसा री व्यवस्था रा पालन करने री कोसत नीं कित्ती थी।

किछ धार्मिक अगुवेयां जो देक्खया भई यीशु इनां लोकां ने इक मित्रा साई गल्लां करे रां था। इस खातर तिनें इकी दुज्जे ने बोलणा शुरु करी दित्या भई सै गलत करे रां था। यीशुये तिनां जो गल्लां करदे सुणया, इस खातर तिने तिनां जो ये कहाणी सुणाई।

“इक माहणु था तिसरे दो पुत्र थे। छोटे पुत्रे अपणे पिते ने बोल्या, ‘हे पिता, मिंज्जो हुण ई मेरा हिस्सा चाहिंदा!’ इस खातर पिते अपणे दुईं पुत्रां रे बीच्च अपणी सम्पतिया बंडवारा करी दित्या।”

“छोड़े ई तिसरे छोटे पुत्रे अपणा सब किछ कट्ठा कित्या कने दुज्जे देशा जो चली गया कने पापियां साई जीवन जीणे च अपणा सारा धन बर्बाद करी दित्या।”

“इसते बाद, तेथी जे तिसरा छोटा पुत्र था तिस देशा च इक भयंकर अकाल पया कने तिसले रोटी खरीदी ने खाणे खातर पैसे नीं थे। इस खातर तिसो सै जे काम्म मिलया सै सूअरां जो चराणे रा था। सै इतना दुखी कने भुखा था भई सै सूअरां रा खाणा खाई लेणा चाहवां था।”

“आखर कार, तिने छोटे पुत्रे अप्पुं ने गलाया, ‘हऊँ क्या करे रां? मेरे पिते रे सब सेवकां ले खाणे खातर बोहत चीज़ां ईयां, फेरी भीं हऊँ येथी भूखा मरे रां आ। मांह अपणे पिते ला जो बापस जाणा कने अपणे पिते रा इक सेवक बणने खातर तिसने बिनती करगा।’”

“इस खातर तिने छोटे पुत्रे बापस आई ने अपणे पिते रे घरा खातर चलणा शुरु कित्या। अजें सै दूर ई था, तिसरे पित्ए तिसो देख्या कने तिस पर बोहत दया आई। सै दौड़ी कने अपणे पुत्रा ला जो आया कने तिसो गला लाई ने पुक्के लये।”

“तिने पुत्रे बोल्या, ‘हे पिता, मैं परमेशरा रे कने तेरे बरोधा च पाप कित्तिरा। हऊँ तेरा पुत्र बी कैहलाणे जोगा नीं आ।’”

“पर पिते अपणे इकी सेवका ने बोल्या, ‘छोड़े ई जाई कने सबते खरे कपड़े लई ने आओ कने मेरे पुत्रा जो पहनाओ! तिसो हत्था च गुट्ठी कने तिसरे पैरां च जूत्ते पहनाओ। फेरी सबते खरा मोटा ताजा पलीरा जानवर मारा, भई अहें खाईये कने त्योहार मनाओ, कांभई मेरा पुत्र मरी गरा था, पर हुण सै जीऊंदा आ! सै गवाच्छी गरा था, पर हुण अहां जो सै मिली गरा!’”

“इस खातर सारेयां खुशियां मनाणे शुरु कित्तियां। किछ बगत बीतणे पर, बड्डा पुत्र खेतां च काम्म करीने घरा जो आया। तिने संगीत कने नाच गाणे री अवाज सुणी कने रैहान हुआ भई ये क्या हुये रदा हुंगा।”

“तजे बड्डे पुत्रा जो पता लगया भई सै तिसरे छोटे भाईये रे घरा जो औणे रिया खुशिया च खुशियाँ मनाये रां थे, तां सै बोहत गुस्से हुआ कने घरा चौ नीं गया। तिसरे पिते बाहर आई कने तिनां ने सौगी खुशियाँ मनाणे खातर तिसो गलाया, पर तिने मना करी दित्या।”

“तिस बड्डे पुत्रे अपणे पिते ने बोल्या, ‘इतने सारे सालां च मैं तेरे खातर इमानदारिया ने काम्म कित्या! कदी बी तेरिया गल्ला जो नीं टालया, पर तैं कदी मिंज्जो इक छेटी बकरी बी नीं दित्ती भई हऊँ अपणे मित्रां सौगी खुशियाँ मनाई सक्कुं। पर तेरे इने पुत्रे तेरे पैसेयां जो गलत कम्मां च बर्बाद करी दित्या। कने हुण तजे सै आईरा तां तिस खातर त्योहार मनाणे जो तैं सबते खरा पालीरा जानवर मारी दित्या!”

“पिते जवाब दित्या, ‘हे मेरे पुत्र, तू सदा मेरने सौगी आ, कने जो किछ मेरा आ सै सब किछ तेरा आ। पर अहां खातर खुशियाँ मनाणे जरुरी आ कांह्भई तेरा भई मरी गरा था, पर हुण जीऊंदा आ। सै गवाच्छी गरा था, पर हुण अहें तिसो पाई लरा!’”