38. यीशुये रा पकड़वाया जाणा

हर साल, यहूदी लोक फसह रा त्योहार मनावां थे। ये इस बारे च इक त्योहार था भई कई सौ साल पैहले परमेशरे तिनां रे पूर्वजां जो मिस्र रिया दासता ते छुड़वाया था। लगभग तीन्न सालां ते बाद यीशुये सब्बीं जो प्रचार करना कने शिक्षा देणा शुरु कित्या। यीशुये अपणे चेलेयां जो दस्सया भई सै तिनां सौगी यरुशलेमा च फसह रे त्योहारा जो मनणा चाहवां, कने ये बी भई तिसो तेथी मारी दित्या जाणा।

यीशुये रे चेलेयां च इक यहूदी नौं रा इक माहणु था। यहूदा प्रेरितां री पैसेयां री थैली रखणे रा प्रभारी था, पर अक्सर सै तिस थैलिया च ते पैसे नकाली लेयां था। यीशु कने चेलेयां रे यरुशलेमा पुज्जणे ते बाद यहूदा यहूदी अगुवेयां ले गया। तिने पैसेयां रे बदले च यीशुये जो तिनां रे हत्था पकड़वाणे री गल्ल रखी। सै जाणां था भई यहूदी अगुवे ये नीं मनदे थे भई यीशु ई मसीह था। सै जाणां था भई सै तिसो मारी देणा चाहवां थे।

महायाजका रे गलाणे पर यहूदी अगुवेयां यीशुये जो तिनांरे हत्थां च पकड़ुआणे खातर यहूदा जो तीह चाँदिये रे सिक्के दित्ते। ये तियां ई हुआ तियां जे भविष्यव्दक्ते गलाया था भई ये हुणा। यहूदा मन्नी गया कने पैसे लई कने चली गया। सै यीशुये जो पकड़वाणे च तिनां री मद्द करने खातर किसी खास मौके जो टोलणे लगया।

यरूशलेमा च, यीशुये अपणे चेलेयां सौगी फसह रा त्योहार मनाया। फसह रे त्योहारा रे बीच, यीशुये रोटी लई कने तोड़ी। तिनें गलाया, “इसो लवा कने खावा। ये मेरा शरीर आ सै जे हऊँ तुहां खातर देआं। येढ़ा मिंज्जो याद करने खातर करना।” इस तरीके ते, यीशुये गलाया भई तिस तिनां खातर मरी जाणा, मतलब तिनां खातर तिस अपणे शरीरा जो बलि चढ़ाई देणा।

फेरी यीशुये इक दाखरसा रा प्याला लया कने गलाया, “इसो पी लवा। ये नवीं वाचा रा मेरा लहु आ सै जे मांह दई देणा तां भई परमेशर तुहांरे पापां जो माफ करो। हर बार इसो पींदे बगता मेरी यादा च इसो करो सै जे हऊँ हुण करे रां।”

तां यीशुये अपणे चेलेयां ने बोल्या, “तुहां च ते इकी माहणूये मिंज्जो पकड़वाणा।” चेले रैहान हुई गे कने पुछणे लगे भई किस येढ़ा काम्म करना। यीशुये गलाया, “मेरा पकड़वाणे औला माहणु सै तिसो जे मांह ये रोटिया रा टुकड़ा देणा।” तां तिने सै रोटिया रा टुकड़ा यहूदा जो दित्या।

तिसा रोटिया जो लेणे ते बाद, यहूदा च शैतान समाई गया। यहूदा निकली कने यीशुये जो गिरफ्तार करने रे खातर यहूदी अगवेयां री मद्द करने जो चली गया। ये रात का बगत था।

रोटी खाणे ते बाद, यीशु कने तिसरे चेले जैतून पहाड़ा जो चली गे। यीशुये बोल्या, “तुहां सबीं आज्ज राती मिंज्जो छड्डी देणा। ये लिखिरा, ‘मांह चरवाहे जो मारना कने सारियां भेड्डां ऊरे परे खो हुई जाणियां।’”

पतरसे जवाब दित्या, “भले ई बाकी सारे तिज्जो छड्डी देओ, मांह तिज्जो नीं छडणा!” तां यीशुये पतरसा ने गलाया, “शैतान तुहां सबीं जो लई लेणा चाहवां, पर हे पतरस, मैं तेरे खातर प्राथना कित्तिरी भई तू विस्वासा ते चुक नी करी लो। फेरी बीं, आज्ज की रात, मुर्गे रे बाँग देणे ते पैहले तू तीन्न बार इंकार करना भई तू मिंज्जो जानदा मनीं आ।”

तां पतरसे यीशुये ने गलाया, “भले ई हऊँ मरी बी जाउँ, मांह कदी बी तेरा मुकरना नीं करना!” बाकी रे सबीं चेलेयां बी ये ई गलाया।

तां यीशु अपणे चेलेयां सौगी गतसमनी नौं रिया जगहा पर गया। यीशुये अपणे चेलेयां जो प्राथना करने खातर गलाया तां भई शैतान तिनांरी परीक्षा नीं करो। तां यीशु अप्पुं प्राथना करने खातर चली गया।

यीशुये तीन्न बार प्राथना कित्ती, “हे मेरे पिता, जे संभव हो तां मेहरबानी करी ने ये दुखा रा प्याला मिंज्जो पीणे खातर मता देंदे। पर जे लोकां रे पाप माफ कित्ते जाणे खातर कोई होर रस्ता नीं आ, तां तेरी ई इच्छा पूरी हो।” यीशु बोहत व्याकूल था कने तिसरा पसीना खुना रियां बूँदां साई था। तिसो सामर्थ देणे खातर परमेशरे इक स्वर्गदुता भेज्या।

हर बार प्राथना ते बाद, यीशु अपणे चेलेयां ला जो बापस आया, पर सै सई गरे थे। तजे यीशु तीज्जी बार बापस हुआ तां यीशुये गलाया, “जागी जावा! मेरा पकड़ुआणे औला येथी आ।”

यहूदी अगुवेयां, सैनिकां कने बोहत बड्डिया भीड़ा सौगी यहूदा आया। तिनें तलवारां कने लाठियाँ लई रियां थियां। यहुदा यीशुये ला जो आया कने तिसने बोल्या, “हे गुरु, नमस्कार,” कने तिसो चूमेया। तिने कैद करने औले माहणुआं जो कने यहूदी अगुवेयां पर प्रकट करने खातर येढ़ा कित्या था। तां यीशुये बोल्या, “हे यहूदा, क्या तू इक चुम्बन लई ने मिंज्जो पकड़वाये रां आ?”

तजे सै सैनिक यीशुये जो पकड़े रां थे, तां पतरसे अपणी तलवार कड्डी कने महायाजका रे इकी सेवका रा कान्न कट्टी दित्या। यीशुये बोल्या, “तलवारा जो दूर कर! मांह अपणे पिते ने मिंज्जो बचाणे खातर स्वर्गदूतां रिया इक पलटना जो भेजणे खातर बिनती करी सकां। पर मांह अपणे पिते री गल्ल मनणी।” तां यीशुये तिस माहणुये रे कन्नां जो ठीक करी दित्या। तां सारे चेले नह्ठी गये।