39. यीशुये पर मकदमा चलणा

ये अधिया राती रा बगत था। सै सैनिक यीशुये जो महायाजका रे घरा जो लई गे, कांह्भई सै यीशुये ने सवाल पुछणा चाहवां था। पतरस दूरा ते तिनां रा पीछा करे रां था। तजे सैनिक यीशुये जो महायाजका रे घरा जो लई गे, तां पतरस बाहर रुकी कने अप्पुं आग्ग सेकणे लगया।

घरा रे अन्दर सभा च, यहूदी अगुवेयां यीशुये पर मकदमा चलाया। सै तिसरे बरोधा च झुठियाँ गल्लां जो बोलणे खातर झूठे गवाहां जो लई कने आये। ईयां तां, तिनां रियां गल्लां इकी दुज्जे ने नीं मिलदियां थियां, इस खातर यहूदी अगुवे ये साबत नीं करी सके भई सै किसा गल्ला च दोषी था। यीशुये किछ मनी गलाया।

आखर च, महायाजके खड़ी ने यीशुये खा जो देख्या कने गलाया, “अहां जो दस्स भई क्या तू ई जीऊंदे परमेशरा रा पुत्र मसीह आ?”

यीशुये गलाया, “हऊं आ, कने तुहें मिंज्जो परमेशरा सौगी बैठिरा कने स्वर्गा ते औंदे बी देखणा।” महायाजके अपणे कपड़े फाड़ी दित्ते कांह्भई सै जे यीशुये गलाया सै तिसा गल्ला पर बोहत गुस्सा था। सै होरीं अगुवेयां पर रड़ाया, “अहां जो ये दस्सणे खातर किसी होरी गवाह री जरुरत नीं भई इने माहणुये क्या कित्तिरा! तुहें अप्पुं ई तिसो ये गलांदे सुणी लई रा भई सै परमेशरा रा पुत्र आ। तिसरे बारे च तुहांरा क्या निर्णय आ?”

सब यहूदी अगुवेयां महायाजका जो जवाब दित्या, “सै मरने रे जोगा आ!” तां तिनें यीशुये रियां आक्खीं पर पट्टी बन्नी दित्ती, तिस पर थुक्केया, तिसो मारया, कने तिसरा मजाक डुआया।

पतरस, तजे घरा रे बाहर अगंणा च न्हायलया रां था। तां इक दासी जनाने तिसो देख्या। तिसे तिसो बोल्या, “तू बी यीशुये सौगी था!” पतरसे मना करी दित्या। आखर च, किछ लोकें गलाया, “अहें जाणांये भई तू यीशुये सौगी था कांह्भई तुहें दोनों गलील लाके रे।”

तां पतरसे बोल्या, “जे हऊं इस माहणुये जो जाणदा हो तां परमेशर मिंजो श्राप देओ!” ताहलूं ई पतरसा रे इयां कसम खाणे ते बाद, इकी कुकड़ चाँह्ग दित्ती। यीशुये पीछे मुड़ी ने पतरसा जो देख्या।

पतरस तेथी ते चली गया कने बड़ा भारी रोया। तिस बगत, यीशुये जो पकड़ाणे औले यहूदे देख्या भई यहूदी अगुवेयां यीशुये जो मौता री सजा दित्ती री। यहुदा बोहत दुखी हुई गया कने जाई कने अप्पुं जो मारी दित्या।

हुण तिस देशा रा राज्यपाल पिलातुस था। सै रोमा खातर काम्म करां था। यहूदी अगुवे यीशुये जो तिस ला जो लई कने आये। सै चाहवां थे भई पिलातुस तिसो मौता री सजा देओ कने तिसो मारी देओ। तां पिलातुसे यीशुये ते पुछया, “क्या तू यहूदियां रा राजा आ?”

यीशुये जवाब दित्या, “तैं सच्च ई गलाई रा। पर मेरा राज्य इसा पृथ्विया रा नीं आ। जे हुंदा तां मेरे दास मेरे खातर लड़ाई करदे। हऊँ पृथ्विया पर परमेशरा रे बारे च सच दसणे आई रा। हर इक माहणु सै जे सच्चा कने प्रेम करां सै मेरी सुणां।” पिलातुसे बोल्या, “तां सच्च क्या आ?”

यीशुये सौगी गल्लां करने ते बाद, पिलातुसे बाहर लोकां ले आई ने बोल्या, “हऊँ इस च येड़ी कोई बजहा नीं देख्दा भई ये माहणु मारी दित्या जाणे रे जोगा हो।” पर यहूदी अगुवें कने भीड़े रड़ाई ने बोल्या, “तिसो क्रुसा पर चढ़ाई देओ!” पिलातुसे जवाब दित्या, “सै किछ बी गलत करने रा दोषी नीं आ।” पर सै होर बी जोरा ने उच्चिया आवाजा च रड़ाणे लगी गे। तां पिलातुसे तीज्जी बार गलाया, “सै दोषी नीं आ!”

पिलातुस डरी गया भई सै लोकां री भीड़ कित्ते दंगे ई नीं चालू करी देओ, इस खातर सै अपणे सैनिकां रे जरिये यीशुये जो क्रूसा पर चढ़ाणे खातर मन्नी गया। रोमी सैनिकें यीशुये जो कोड़े लाये, कने तिसो राजेयां रा बागा पनाया, कने तिसरे सिरा पर कण्डेयां ते बणी रा मुकुट रख्या। तां सै ये गलाई ने तिसरा मजाक डुआणे लगे, “देखा, यहूदियां रा राजा!”