40. यीशये रा क्रूसा पर चढ़ाया जाणा

यीशुये रा मजाक डुआणे ते बाद, सैनिक तिसो क्रूसा पर चढ़ाणे खातर लई गे। तिनें तिस क्रूसा जो तिस ते ई चकवाया, तिस पर जे सै तिनां टंगणा था।

सै सैनिक यीशुये जो तिसा जगहा पर लई कने आये तिसो जे “खोपड़ी” बोलां थे कने तिसरे हात्थ कने पैरा जो क्रूसा पर कीलां ने गड्डी दित्या। पर यीशुये गलाया, “हे पिता, इनां जो माफ कर, कांह्भई ये नीं जाणदे भई ये क्या करे रां ये।” तिने इक फट्टे जो बी तिसरे सिरा रे उपर टंगी दित्या। तिस पर लिखी रा था, “यहूदियां रा राजा।” पिलातुसे तिनां जो येढ़ा लिखणे खातर गलाया था।

तां सैनिकें यीशुये रे कपड़े बंडणे खातर पर्चियां पाईयां। तजे तिनें येढ़ा कित्या तां तिनें तिसा भविष्यव्दाणिया जो पूरा कित्या सै जे दस्सां थी, “तिनें मेरे कपड़ेयां जो अप्पु चीयें बंड्डी लया, कने मेरे कपड़ेयां खातर चिट्ठियां पाईयां।”

तेथी दो डाकू बी थे, सैनिकें तिनां जो बी तिस ई बगता पर क्रूसा पर चढ़ाया था। तिनें तिनां जो यीशुये री दुईं पासेयां खा रखया था। तिनां च ते इकी डाकूये यीशुये रा मजाक डुआया, पर दुज्जे गलाया, “क्या तू नीं डरदा भई परमेशरा तिज्जो सजा देणी? अहें बोहत सारे बुरे कम्मां जो करने रे दोषी ये, पर ये माहणु निर्दोष आ।” फेरी तिने यीशुये ने गलाया, “तजे तू अपणे राज्य च आओ तां मेहरबानी करी ने मिंज्जो याद रखयां।” यीशुये जवाब दित्या, “आज्ज ई तू मेरे सौगी स्वर्गलोका च हुणा।”

यहूदी अगुवे कने भीड़ा रे होर लोकें यीशुये रा मजाक डुआया। तिनें तिसने बोल्या, “जे तू परमेशरा रा पुत्र आ, तां क्रूसा ते थल्ले जो आई जा कने अप्पुं जो बचाई ले! तां अहां तेरे पर विस्वास करना।”

तां तिस सारे देशा रा अकाश पूरे तरीके ने काला हुई गया, सै अधिया दिहाड़िया रा बगत था। ये दपेहरका बगत काला हुई गया था कने लगभग तीन्नां घंटेयां खातर येढ़ा ई रैया था।

तां यीशुये परमेशरा जो अवाज लाई कने बोल्या, “पूरा हुआ! हे पिता, हऊँ अपणी आत्मा तेरे हत्थां च दई दां।” तां तिने अपणे सिरा जो झुकाया कने अपणे प्राणां जो छड्डी दित्या। तजे सै मरया तां बोहत हिलण हुआ। सै बड्डा पर्दा सै जे परमेशरा री हजुरिया ते लोकां जो लग्ग कित्या जां था उपरा ते थल्ले तकौ फटी कने दो हिस्से हुई गया।

अपणिया मौता रे जरिये, यीशुये लोकां खातर परमेशरा ले औणे रा रस्ता खोली दित्या। तजे यीशुये री निगरानी करने औले इकी सैनिके जो किछ हुआ था ये सब देख्या तां तिनें बोल्या, “पक्का ई, ये माहणु निर्दोष था। ये परमेशरा रा पुत्र आ।”

तां यूसुफ कने नीकुदेमुस नौं रे दो यहूदी अगुवे आये। सै विस्वास करां थे भई यीशु ई मसीह था। तिनें पिलातुसा ते यीशुये रा शरीर मँगया। तिनें तिसरे शरीरा जो कपड़ेयां च लपेटया। तां सै तिसो इकी बड्डे पत्थरा जो कट्टी कने बणाई गई री थी, येढ़िया कब्रा चौ लई गये कने तितरे अन्दर रखी दित्या। तां तिनें तिस कब्रा रे दरवाजे जो बंद करने खातर इक बड्डे पत्थरा जो लुढ़काई दित्या।