41. परमेशर यीशुये जो मरी रेयां च ते जीऊंदा करां

सैनिकां रे जरिये यीशुये जो क्रूसा पर चढ़ाने ते बाद, यहूदी अगुवेयां पिलातुसा ने बोल्या, “तिने झुठे, यीशुये गलाया था भई सै तीन्नां दिनां ते बाद मरी रेयां च ते जी उठणा। किसी जो ये पक्का करने खातर कब्रा री निगरानी करने पौणी भई किते तिसरे चेले तिसरे शरीरा जो चोरी कने नीं लई जाओ। जे सै येढ़ा करां ये तां तिनां बोलणा भई सै मरी रेयां च ते जीऊंदा हुई गरा।”

पिलातुसे बोल्या, “किछ सैनिकां जो लई जाओ कने तियां जे तुहें करी सको तियां ई कब्रा री निगरानी करो।” इस खातर तिनें तिस कब्रा च जाणे रे दरवाजे रे पत्थरा पर इक मोहर लाई दित्ती। तिनें ये पक्का करने खातर ते थी सैनिकां जो बी बठाई दित्या भई कोई बी तिसरे शरीरा जो चोरी नीं सको।

यीशुये रे मरने ते बाद का दिन सब्ता रा दिन था। कोई बी सब्ता रे दिन काम्म नीं करी सकदा था, इस खातर यीशुये रा कोई बी दोस्त कब्रा पर नीं आया था। पर सब्ता ते बाद के दिन, सबेरे बोहत भ्यागा जो, किछ जनानां यीशुये रिया कब्रा पर जाणे खातर त्यार हुईयां। सै तिसरे शरीरा पर होर बी मसालेयां जो लाणा चाहवां थियां।

तिनां जनानां रे पुजणे ते पैहले, कब्रा पर बोहत बड्डा हिलण हुआ। स्वर्गा ते इक स्वर्गदूते आई कने तिस पत्थरा जो हटाई दित्या सै जे कब्रा रे जाणे औले दरवाजे पर रखी रा था कने तिस पर बैठी गया। ये स्वर्गदूत लोई साई चमके रां था। कब्रा पर सै जे सैनिक थे तिनें तिसो देख्या। सै इतने डरी गये थे भई मरी रेयां साई धरतिया पर पई गये।

तजे सै जनानां कब्रा पर पुज्जियां तां तिने स्वर्गदूते तिनां ने बोल्या, “मता डरदे। यीशु येथी नीं आ। सै मरी रेयां च ते जी उट्ठीरा, तेढ़ा जे तिनें बोल्या था भई तिस जीऊंदे हुई जाणा! कब्रा च जाई कने देखा।” तिनें जनानें कब्रा चौ अन्दर तेथी जे यीशुये रा शरीर रखी रा था तेथी टोलया कने देख्या भई तिसरा शरीर तेथी नीं था!

तां तिने स्वर्गदूते तिनां जनानां ने गलाया, “जाई कने तिसरे चेलेयां जो दस्सा, ‘यीशु मरी रेयां च ते जीऊंदा हुई गरा कने तिस तुहां ते अग्गे गलीला जो जाणा।’”

सै जनानां रैहान हुईयां कने बोहत खुश हुईयां। सै चेलेयां जो ये खरा संदेश सुनाणे खातर दौड़ीयां।

तजे सै जनानां चेलेयां जो ये खरा संदेश दसणे खातर अपणे रस्ते पर थियां, तां यीशु तिनां पर प्रकट हुआ। सै तिसरे पैरां पर पई गियां। तां यीशुये बोल्या, “मता डरदे। जाई कने मेरे चेलेयां जो गलील जाणे जो बोलो। तेथी तिनां मिंज्जो देखणा।”