42. यीशुये रा स्वर्गा जो बापस जाणा

तिस दिन जे परमेशरे यीशुये जो मरी रेयां च ते जीऊंदा कित्या था, तिसरे दो चेले बखा रे गावाँ चौ जाये रां थे। चलदे चलदे से जो किछ यीशुये सौगी हुआ था। तिसरे बारे च गल्लां करे रां थे, तिनां जो आस थी भई सै मसीह था, पर तां बी सै मारी दित्या गया था। हुण सै जनानां बोलां इयां भई सै फेरी जीऊंदा हुई गरा। सै नीं समझी पाये रदे भई किसा गल्ला पर विस्वास करो।

यीशुये तिनां ले आई कने तिनां ने चलणा शुरु कित्या, पर सै तिसो पछयाणी नीं सके। तिनें पुछया तुहें किसरे बारे च गल्लां करे रां थे। तिनें यीशुये सौगी हुई रियां पैहल कियां सारियां बीती रियां गल्लां रे बारे च दस्सया। तिनें सोचया भई सै किसी परदेशिये ने गल्लां करे रां थे सै जे ये नीं जानदा था भई यरूशलेमा च क्या हुआ था।

तां यीशुये तिनां जो समझाया भई परमेशरा रा वचन मसीह रे बारे च क्या दस्सां। बोहत पैहले, भविष्यव्दक्तावें गलाया था भई बुरे लोकां मसीहा जो कुट्टणा कने मारी देणा। पर भविष्यव्दक्तावें ये बी गलाया था भई तिस तीज्जे दिन जीऊंदे हुई जाणा।

तजे सै तिस नगरा च पुज्जे तेथी जे दो माहणु ठेहरना चाहवां थे, तां लगभग संज्का बगत हुई गरा था। तिनें यीशुये जो तिनां सौगी रुकणे खातर गलाया, इस खातर सै तिनां सौगी इकी घरा चौ गया। अपणे संझकिया रोटिया जो खाणे खातर बैठी गे। यीशुये इक रोटी लई कने तिसा खातर परमेशरा रा धन्यावाद कित्या, कने फेरी सै खाणे लगया। तां इकदमा च तिनें ये पता लाई लेया भई सै यीशु था। पर तिस बगता, सै तिनां रिया आक्खीं ते दूर चली गया।

तिनें दुईं माहणुयें इकी दुज्जे ने गलाया, “सै प्रभु यीशु था! इस खातर तजर तिनें अहां जो परमेशरा रे वचनां जो समझाया था तां अहें बोहत हिम्मता ने भरी गरे थे!” ताहलूं ई, सै निकली कने बापस यरूशलेमा जो गये। तजे सै पुज्जे तां तिनें चेलेयां जो दस्सया, “यीशु जीऊंदा आ! अहें तिसो देखी रा!”

तजे चेले गल्लां करे रां थे, यीशु इकदम ते तिस कमरे च तिनां सौगी प्रकट हुआ। तिनें बोल्या, “तुहां जो शान्ति मिलो!” चेलेयां सोचया भई सै कोई भूत था, पर यीशुये बोल्या, “तुहें कैं डरांये? तुहें येढ़ा कैं नीं सोचदे भई हऊँ सचमुच च ई, यीशु आ? मेरे हत्थां पैरां जो देखा। भूतां ले येढ़ा शरीर नीं हुंदा तेढ़ा जे मेर ले आ।”ये दसणे खातर भई सै कोई भूत नीं था, तिनें खाणे खातर किछ मँगया। तिनें तिसो मछिया रा इक टुकड़ा दित्या, कने तिसो खाई लया।

यीशुये बोल्या, “मेरे बारे च परमेशरा रा वचन जो किछ बी बोलां से ई हुई जां। मैं तुहां जो दस्सी तरा था भई इता गल्ला रा हुणा जरुरी आ।” तां यीशुये तिनां जो परमेशरा रा वचन खरे तरीके ने समझाया। तिने बोल्या, “बोहत पैहले भविष्यव्दक्तावें लिखिरा था भई मिज्जो, मतलब मसीह जो दुख चकणे पौणा, मरने पौणा कने फेरी तीज्जे दिन मरी रेयां च ते जी उठणा पौणा।”

“तिनें भविष्यव्दक्तावें ये बी लिखिरा था भई मेरे चेलेयां परमेशरा रे वचनां री घोषणा करनी। तिनां हर इक जो पश्चाताप करने खातर बोलणा। जे सै पश्चाताप कर गे तां परमेशरे तिनां रे पापां जो माफ करना। मेरे चेलेयां यरूशलेमा ते इस सन्देशा रा प्रचार शुरु करना। तां तिनां सबीं देशां सबीं लोकां लौ जाणा। तुहें लोक मेरी हर इक गल्ल कने कम्मा रे गवाह ये सै जे मैं बोल्या कने कित्या था, कने तिनां सबीं गल्लां रे सै जे मेरने बीत्ती रियां।”

औणे औले चाली दिनां रे बीच, यीशु अपणे चेलेयां पर कई बार प्रकट हुआ। इक बार तां सै इकी बगता पर 500 ते जादा लोकां पर प्रकट हुआ! तिने अपणे चेलेयां पर कईयां तरीकयां ते साबत कित्या भई सै जीऊंदा था कने तिने तिनां जो परमेशरा रे राज्य रे बारे च शिक्षा दित्ती।

यीशुये अपणे चेलेयां ने बोल्या, “परमेशरे मिंज्जो स्वर्ग कने धरतिया रे हर इक माहणुये पर राज करने रा अधिकार दित्तिरा। इस खातर हुण हऊँ तुहां ने बोलां: जाई कने सबीं समाजां रे लोकां जो चेला बणाओ। येढ़ा करने खातर, तुहां जो तिनां जो पिता परमेशर, पुत्र प्रभु यीशु मसीह कने पवित्र आत्मा रे नौं ते बपतिस्मा देणे पौणा। जो किछ मैं तुहां जो हुक्म दित्तिरा तिनां सबीं गल्लां जो मनणा बी तुहां जो तिनां जो सखाणे पौणा। याद रखा, मांह सदा खातर तुहां सौगी रैहणा।”

यीशुये रे मरी रेयां च ते जी उठणे ते चालियां दिनां ते बाद, तिनें अपणे चेलेयां ने गलाया, “तदुआं तकौ जे मेरा पिता तुहां जो सामर्थ नीं देंदा तदुआं तकौ यरूशलेमा च रुकी रेट रह्वा। तिस तुहां खातर पवित्र आत्मा भेजणे रे जरिये येढ़ा करना।” तां यीशु स्वर्गा चौ चली गया कने इक बादले तिसो तिनां रियां नजरां ते छुपाई लरा। स्वर्गा च यीशुये सबीं चीजां पर राज करने खातर परमेशर पिता रिया सज्जिया खौ बैठी गया।