43. पैहली कलीसिया री शुरुआत

यीशुये रे स्वर्गा जो बापस जाणे ते बाद, चेले यरूशलेमा च ई रुकी गे तियां जे यीशुये तिनां जो करने रा हुक्म दित्या था। तेथी रे विस्वासी लोक लगातार सौगी प्राथना करने खातर कट्ठे हुये करां थे।

हर साल, फसह रे त्योहारा रे 50 दिनां ते बाद, यहूदी लोक पिन्तेकुस्त नौं रे इक खास दिना जो मनाया करां थे। पिन्तेकुस्त सै बगत था तजे यहूदी लोक कणका री बढाई री खुशी मनाया करां थे। सारे संसारा ते यहूदी लोक पिन्तेकुस्त रे दिना जो सौगी हुई ने मनाणे खातर यरूशलेमा चौ आये थे। इस साल, पिन्तेकुस्त मनाणे रा बगत यीशुये रे स्वर्गा जो जाणे रे लगभग इकी हफ्ते ते बाद आया था।

तिस बगता जे सारे विस्वासी लोक सौगी कट्ठे हुये थे, तां तिस घरा च जे सै थे अचानक तुफाना साई अवाजा कने भरी गया। तां अग्गी रियां लपटां साई दुसणे औला किछ विस्वासियां रे सिरां रे उपर प्रकट हुआ। सै सब पवित्र आत्मा ते भरी गे कने तिनें अन्य भाषा च परमेशरा री स्तुति कित्ती। ये सै भाषा थी तिसो जे बोलणे खातर तिनां जो पवित्र आत्मा रे जरिये सामर्थ मिली थी।

तजे यरूशलेमा च रैहणे औले लोकें तिस रौले जो सुणया, तां सै भीड़ रे तौरा च ये देखणे खातर सौगी कट्ठे हुई ने आये भई क्या हुये रां था। तिनें विस्वासियां जो परमेशरा रे जरिये कित्ते गई रे बड्डे-बड्डे कम्मां री घोषणा करदे सुणया। सै रैहान थे कां भई सै तिनां कम्मां जो अपणी ई भाषा च सुणे रां थे।

इनां च ते किछ लोकें बोल्या भई सै चेले नशे च थे। पर पतरस खड़ा हुआ कने तिनां ने बोल्या, “मेरी गाल्ल सुणा! ये लोक नशे च नीं ये! इसरे बजाये, जो किछ तुहें देख्या रांये ये सै ई आ तेढ़ा जे योएल भविष्यव्दक्ते गलाई रा था भई हुणा; परमेशरे बोल्या, ‘आखर रे दिनां च मांह अपणा आत्मा तुहां जो देणा।’”

“हे इस्राएली माहणुओ, यीशु इक येढ़ा माहणु था तिने बोहत नोखे काम्म करी ने ये दस्सया भई सै कुण था। तिनें परमेशरा रे सामर्था ते मते सारे नोखे कम्मां जो करी ने दस्सया था। तुहें येढ़ा अप्पुं जाणांये, कांभई तुहें इनां कम्मां जो देख्खिरा। पर तुहें तिसो क्रूसा पर चढ़ाई दित्या!”

“यीशु मरी गया पर परमेशरे तिसो मरी रेयां च ते जीऊंदा करी दित्या। तिनें इसा गल्ला जो पूरा करी दित्या सै जे इकी भविष्यव्दक्ते लिखिरा था : ‘तू अपणे पवित्र माहणुये जो कब्रा च सड़णे नीं देणा।’ अहें इस गल्ला रे गवाह ये भई परमेशरे यीशुये जो फेरी ते जीऊंदा करी दित्या।”

“परमेशरे पिते हुण यीशुये जो अपणे सज्जिया खा बठाली ने तिसो आदर दित्तिरा। यीशुये अहां खातर पवित्र आत्मा जो भेज्या तेढ़ी जे तिने प्रतिज्ञा कित्तिरी थी भई तिस भेजणा। पवित्र आत्मा ई तिनां कम्मां जो हुणे दे रां तिनां जो जे तुहें देख्या रां ये कने सुणे रांये।”

“तुहें तिस माहणुये, यीशुये जो क्रूसा पर चढ़ाई दित्या। पर पक्के तौरा ते जाणी लवा भई परमेशरे यीशुये जो सबीं चीजां पर प्रभु कने मसीह दुईं जो ठेहराई रा!”

पतरसा री सुणने औले लोक तिस रियां बोली रियां गल्लां ते अंदरा तका हिली गरे थे। इस खातर तिनें पतरस कने चेलेयां जो पुछया, “हे भाईयो, अहां जो क्या करना चाहिंदा?”

पतरसे तिनां जो जवाब दित्या, “तुहां च ते हर इक अपणे पापां खातर पश्चाताप करा तां भई परमेशरे तुहांरे पापां जो माफ करो कने प्रभु यीशु मसीह रे नौं ते बपतिस्मा लौ। तां तिस तुहां जो वरदान रे तौरा पर पवित्र आत्मा बी देणा।”

पतरसे जो किछ गलाया तिस पर लगभग3000 लोकें विस्वास कित्या कने यीशुये रे चेले बणी गे। तिनें बपतिस्मा लया कने यरूशलेमा री कलीसिया रा हिस्सा बणी गया।

तजे प्रेरितें तिनां जो शिक्षा दित्ती तां विस्वासियें लगातार सुणया। सै आम तौरा च मिले करां थे कने सौगी रोटी बी खावां थे कने तिनें लगातार इक दुज्जे खातर प्राथना कित्तियां। तिनें मिली कने परमेशरा री स्तुति कित्ती कने जो किछ बी तिनां ले था तिनें इकी दुज्जे ने बंडी चुंडी ने खादया। नगरा रा हर इक माहणु तिनां खातर खरा बचार रखां था। हर रोज, जादा ते जादा लोक विस्वासी बणदे गये।