44. पतरस कने यूहन्ना रा भिखारिये जो ठीक करना

इक दिन, पतरस कने यूहन्ना मंदरा चौ गये। इक लंगड़ा माहणु भीख मँगणे खातर मूरले दरवाजे पर बैठिरा था।

पतरसे तिस लंगड़े माहणुये खौ देख्या कने बोल्या, “मेरले तिज्जो देणे खातर पैसे तां हये नीं ये। पर जो किछ मेरले आ सै मांह तिज्जो देणा। प्रभु यीशुये रे नौं ते, उठ कने चल-फिर!”

ताहलूं ई, परमेशरे तिस लंगड़े माहणुये जो ठीक करी दित्या। तिने इखा-उखा चलणा कने दौड़ना कने परमेशरा री स्तुति करना शुरु करी दित्या। मंदरा रे अँगणा च हाजर लोक रैहान थे।

छोड़े ई लोकां री इक भीड़ तिस ठीक हुई रे माहणुये जो देखणे खातर आई। पतरसे तिनां ने बोल्या, “ये माहणु ठीक आ, पर इसा गल्ला पर रैहान मता हुंदे। अहें इसो अपणिया ताकता ने ठीक नीं कित्तिरा, या इस खातर नीं भई अहें परमेशरा रा आदर करांये। पर, सै प्रभु यीशु आ तिनें जे इस माहणुये जो अपणिया ताकता ते चंगा कित्तिरा, कांह्भई अहें यीशुये पर भरोसा करांये।”

“सै तुहें ई हये तिनें जे तिस रोमी राज्यपाला जो यीशुये जो मारी देणे खातर बोल्या था। तुहें तिसो मारी दित्या सै जे सबीं जो जीवन देआं आ। पर परमेशरे तिसो मरी रेयां च ते जीऊंदा कित्या। तुहां जो ये पता नीं लगया भई तुहें क्या करे रां थे, पर तजे तुहें तिनां कम्मां जो करे रां थे, तां सै जे भविष्यव्दक्तावें बोल्या था सै पुरा हुआ। इस खातर हुण, पश्चाताप करा कने परमेशरा खा जो फिरा, तां भई तिस तुहांरे पापां जो धोई कने साफ करी देओ।”

तजे मंदरा रे अगुवेया पतरस कने यूहन्ना जो सुणया, तां सै बोहत घबराई गये। इस खातर तिनें तिनां जो पकड़ी कने कैदा च पाई दित्या। पर जो किछ पतरसे गलाया था तिस पर बोहत सारे लोकें विस्वास कित्या। यीशुये पर विस्वास करने औलेयां री संख्या बधी कने लगभग 5000 हुई गी।

अगले दिन, सै यहूदी अगुवे पतरस कने यूहन्ना जो महायाजक कने होरीं धार्मिक अगुवेयां रे सामणे लई कने आये। सै तिस माहणुये जो बी लई कने आये सै जे लंगड़ा था। तिनें पतरस कने यूहन्ना ते पुछया, “किस अधिकारा ते तुहें तिस लंगड़े माहणुये जो चंगा कित्या?”

पतरसे जवाब दित्या, “ये माहणु सै जे तुहांरे सामणे खड़ी रा तिसो प्रभु यीशु मसीह रिया सामर्था रे जरिये ठीक कित्या गईरा। तुहें प्रभु यीशुये जो क्रूसा पर चढ़ाई दित्या, पर परमेशरे तिसो फेरी बीं जीऊंदा करी दित्या! तुहें तिसो नीं मन्नया, पर प्रभु यीशुये रिया सामर्था रे जरिये ते अलावा उध्दार मिलणे रा कोई होर रस्ता नीं आ!”

सै अगुवे रैहान थे भई पतरस कने यूहन्ने बड्डिया हिम्मतां ने गल्लां कित्तियां थियां। तिनें देख्या भई ये सधारण माहणु थे सै जे अणपढ़ ई थे। पर फेरी तिनां जो याद आया भई ये माहणु यीशुये सौगी रहवां थे। इस खातर तिनें तिनां ने बोल्या, “अहां तुहां जो बोहत सजा नीं देणी जे तुहें इस माहणु यीशुये रे बारे च लोकां जो कोई होर संदेश देंदे हो।” येढ़ियां बोहत सारियां गल्लां गलाणे ते बाद, तिनें पतरस कने यूहन्ना जो जाणे दित्या।