45. स्तिफनुस कने फिलिप्पुस

सबते पैहले मसीही अगुवेयां रे बीच्च स्तिफनुस नौं रा इक माहणु था। सब लोक तिसरा आदर करां थे। पवित्र आत्मा ते तिसो बोहत सामर्थ कने बुध्दि मिलीरी थी। स्तिफनुसे मते सारे चमत्कारां औले काम्म कित्ते थे। तजे तिनें प्रभु यीशुये पर भरोसा करने रे बारे च लोकां जो दसणा शुरु कित्या तां बोहत सारे लोकें तिस पर विस्वास कित्या।

इक दिन, स्तिफनुस प्रभु यीशुये रे बारे च सखाये रां था, तां किछ यहूदी तेथी आई गे तिनें जे प्रभु यीशुये पर विस्वास नीं कित्या था कने तिसने सौगी बेहस करने लगी गे। सै बोहत गुस्से च थे, इस खातर सै धार्मिक अगुवेयां लौ गये कने तिसरे बारे च झुठ गलाया। तिनें बोल्या, “अहें स्तिफनुसा जो मूसा कने परमेशरा रे बारे च बुरियां गल्लां बोलदे सुणी रा!” इस खातर धार्मिक अगुवेयां स्तिफनुसा जो कैद करी लया कने तिसो महायाजक कने यहूदियां रे होरीं अगुवेयां रे सामणे ली आये। बोहत झूठे गवाह बी आये कने तिनें स्तिफनुसा रे बारे च झूठी गवाईयां दित्तियां।

महायाजके स्तिफनुसा पुछया, “क्या ये लोक तेरे बारे च सच बोल्या रांये?” स्तिफनुसे महायाजका जो जवाब देणे खातर बोहत सारियां गल्लां गलाणे शुरु करी दित्तियां। तिने गलाया भई अब्राहमा रे बगता ते प्रभु यीशये रे बगता तकौ परमेशरे इस्राएला रे लोकां खातर मते सारे अनोखे काम्म कित्तिरे। पर लोकें सदा परमेशरा रे हुक्मां जो नीं मन्नया। स्तिफनुसे बोल्या, “ तुहें लोक परमेशरा रे बरोधा च कठोर कने बलवा करने औले ठैहरी रे। तुहें सदा पवित्र आत्मा जो नीं मन्नया, तियां जे अहांरे पूर्वजें सदा पवित्र आत्मा जो नीं मन्नया था कने सदा परमेशरा रे भविष्यव्दक्तावां जो मारी दित्या था। पर जो किछ तिनें कित्या था तिसरी तुलना च तुहें होर बी बुरा कित्तिरा! तुहें मसीह जो मारी दित्या!”

तजे तिनें धार्मिक अगुवेयां ये सुणया, तां सै इतने गुस्से हुई गे भई तिनें अपणे कन्नां जो बंद करी लया कने उच्चिया आवाजा च रड़ाये। सै स्तिफनुसा जो घसीटी कने नगरा ते बाहरा जो लई गे कने तिसो मारने खातर तिसो पत्थर मारे।

तजे स्तिफनुस मरे रां था, तिसरे मुंहा ते निकलया, “हे यीशु, मेरिया आत्मा जो ग्रहण कर!” तां सै अपणे गोडेयां पर पया कने फेरी सै प्रभुये ने गलाया, “हे प्रभु, ये पाप तिनां पर मत लांदा।” तां सै मरी गया।

तिस दिन, यरूशलेमा च रैहणे औले बोहत सारे लोकें यीशुये रे मनणे औलेयां जो सताणा शुरु करी दित्या, इस खातर विस्वासी लोक होरीं लग जगहां जो नह्ठी गे। पर इतरे बावजूद बी, तेथी कित्ती जे सै गये तिनें यीशुये रे बारे च प्रचार कित्या।

फिलिप्पुस नौं रा प्रभु यीशुये रा इक विस्वासी था। होरीं विस्वासियां सौगी सताव रे बगता च सै बी यरूशलेमा ते नह्ठी गया। सै सामरिया रे लाके चौ चली गया। तेथी तिने लोकां जो प्रभु यीशुये रे बारे च प्रचार कित्या। बोहत सारे लोकें तिस पर विस्वास कित्या कने उध्दार पाया। इन दिन, फिलिप्पुसा ले परमेशरा रिया तरफा ते इक स्वर्गदूत आया कने तिसो जंगला च जाणे खातर कने तेथी रिया किसी सड़का पर चलणे खातर गलाया। फिलिप्पुस तेथी जो चली गया। तजे सै तिसा सड़का पर चले रां था, तां तिने इकी माहणुये जो अपणे रथा पर जांदे देख्या। ये माहणु कूश देशा रा इक खास अधिकारी था। फिलिप्पुसा जो पवित्र आत्मा गलया भई जाई कने तिस माहणुये सौगी चलो।

इस खातर फिलिप्पुस रथा ला जो गया। तिनें सुणया भई सै कूशी परमेशरा रे वचनां जो पढ़े रां था। सै जे यशायाह भविष्यव्दक्ते लिखिरा था सै तिसो पढ़े रां था। सै पढ़े रां था, “सै तिसो बडणे खातर जाणे औलिया भेडा साई लई गे कने तियां जे मेम्ना शान्त रहवां, तिनें बी कोई अवाज नीं कित्ती। तिनें तिस सौगी बुरा व्योवहार कित्या कने तिसरा आदर नीं कित्या। तिनें तिसरा प्राण लई लया।”

फिलिप्पुसे तिस कूशीये ते पुछया, “जो किछ तू पढ़े रां क्या तू तिसरा मतलब बी समझां?” तिनें कूशीये जवाब दित्या, “नईं। तदुआं तकौ जे कोई मिंज्जो नीं समझाओ, तदुआं तकौ हऊं इसो नीं समझी सकदा। मेहरबानी करी ने मेरे ले आई ने बैठ। यशायाह ये अपणे बारे च लिखे रां था या किसी होरी रे बारे च?”

फिलिप्पुस रथा पर चढ़ी कने बैठी गया। तां तिने तिस कूशी माहणुये जो ये दस्सया सै जे यशायाहे प्रभु यीशुये रे बारे च लिख्या था। फिलिप्पुसे परमेशरा रे वचनां रे होर बी मते सारे हिस्सेयां रे बारे च गल्ल बात कित्ती। इयां तरीके ने, तिने तिस माहणुये जो प्रभु यीशुये रे बारे च शुभ संदेश सुणाया।

फिलिप्पुसे कने सै कूशी चलदे पाणिये ले पुज्जीगे। तिने कूशिये बोल्या, “देख! येथी पाणी आ! क्या हऊँ बपतिस्मा लई सकां?” कने तिने रथ चलाणे औले जो रथा जो रोकणे खातर गलाया।

इस खातर सै पाणिये चौ चली गे कने फिलिप्पुसे तिस कूशिये जो बपतिस्मा दित्या। तजे सै पाणिये ते बाहर आये, तां पवित्र आत्मा अचानक ई फिलिप्पुसा जो चक्की कने किसी होरी जगहा जो लई गया। तेथी फिलिप्पुस लोकां जो प्रभु यीशुये रे बारे च दसदा रैया।

सै कूशी अपणे घरा जो जाणे खातर अग्गे बधी गया। सै खुश था भई सै हुण प्रभु यीशुये जो जाणां था।