46. पौलुसा रा मसीही विस्वासी बणना

शाऊल नौं रा इक माहणु था तिने जे प्रभु यीशुये पर विस्वास नी कित्या था। तजे सै जवान था, तां तिनें स्तिफनुसा जो मारने औले लोकां रे कपड़ेयां री निगरानी कित्ती थी। बाद च, तिनें विस्वासियां जो सताया था। तिने यरूशलेमा च घरें-घरें जाई कने मर्द कने जनाना दुईं जो पकड़ी कने कैद खाने च पाई दित्या था। तां महायाजके शाऊला जो दमिशक नगरा च जाणे रा हुक्म दित्या। तिने तेथी रे मसीहियां जो कैद करी ने कने तिनां जो बापस यरूशलेमा जो लई ने औणे खातर शाऊला ने गलाया।

इस खातर शाऊले दमिश्का जो जाणे खातर यात्रा शुरू कित्ती। तिस नगरा च पुजणे ते थोड़ा पैहले, तिसरे चऊँ पासेयां आसमाना ते इक तेज चमकदार लोये चमकी कने सै घरतिया पर पई गया। शाऊले किसी जो ये गलांदे सुणया, “हे शाऊल! हे शाऊल! तू मिंजो कां सताये रां?” शाऊले पुछया, “हे प्रभु, तू कुण आ?” यीशुये तिसो जवाब दित्या, “हऊँ यीशु आ। तू मिंज्जो कैं सताये रां!”

तजे शाऊल उठेया तां सै देखी नीं सकदा था। तिसरे दोस्त तिसो दमिश्का च लई ने गये थे। शाऊले तीन्न दिना तकौ किछ मनी खाद्या ना किछ पित्या था।

दमिश्क च हनन्याह नौं रा इक चेला था। परमेशरे तिसने बोल्या, “तिस घरा जो जा तेथी जे शाऊल ठैहरी रा। अपणे हत्थां जो तिस पर रख तां भई सै फेरी ते देखणे लगो।” पर हनन्याहे बोल्या, “हे प्रभु, मैं सुणीरा भई इने माहणुये विस्वासियाँ जो कितना सताई रा।” परमेशरे तिसो जवाब दित्या, “जा! मैं तिसो यहूदियां च कने दुज्जी जातियां रे लोकें मेरे नौं री घोषणा करने खातर चुणी लरा। तिस मेरे नौं खातर बोहत कष्ट सेहन करने।”

इस खातर हनन्याह शाऊला ला जो गया, अपणे हत्थां जो तिस पर रखया कने गलाया, “यीशुये, सै जे येथी औणे रे तेरे रस्ते च तू पर प्रगट हुआ था, मिंज्जो तेरे ला जो भेज्जिरा तां भई तू फेरी देखणे लगो कने पवित्र आत्मा तिज्जो भरी देओ।” ताहलूं ई शाऊल फेरी देखणे लगी गया कने हनन्याहे तिसो बपतिस्मा दित्या। तां शाऊले रोटी खादी कने फेरी ते ताकत पाई।

तदुआं ते, शाऊले दमिश्क च रैहणे औले यहूदियां च प्रचार करना शुरु करी दित्या। तिने बोल्या, “प्रभु यीशु ई परमेशरा रा पुत्र आ!” यहूदी लोक रैहान थे, कांभई शाऊले तां विस्वासियां जो मारी देणे री कोशत कित्ती थी, पर हुण सै प्रभु यीशुये पर विस्वास करां था। शाऊले यहूदियां सौगी तर्क-विर्तक कित्ते। तिने साबत कित्या भई प्रभु यीशु ई मसीह था।

बोहत दिनां ते बाद, यहूदियें शाऊला जो मारी देणे री योजना बणाई। तिनें तिसो मारी देणे खातर नगरा रे फाटकां पर लोकां जो भेज्या भई तिसो टोलदे रओ पर शाऊले तिसा योजना रे बारे च सुणी लया कने तिसरे दोस्तें तेथी ते बची ने जाणे खातर तिसरी मद्द कित्ती। इकी राती जो तिनें तिसो टोकरूये च बठाली ने नगरा रिया चऊं पासेयां औलिया कन्धा ते थल्ले तुआरी दित्या। दमिश्का ते बची कने निकलणे ते बाद शाऊल प्रभु यीशुये रे बारे च प्रचार करदा रैया।

शाऊल प्रेरितां ने मिलणे खातर यरूशलेमा जो गया, पर सै तिसते डरां थे। तां बरनबास नौं रे इक विस्वासी शाऊला जो प्रेरितां ला जो लई गया। तिनें तिनां जो दस्सया भई शाऊले कितनी हिम्मत करी ने दमिश्क च प्रचार कित्या था। तिसते बाद, प्रेरितें शाऊला जो स्वीकार करी लया।

किछ विस्वासी सै जे यरूशलेमा रे सतावा ते नह्ठी गे थे सै दूर अंताकिया नगरा जो चली गये थे कने प्रभु यीशुये रे बारे च प्रचार करां थे। अंताकिया च रैहणे औले लोक जादा जे यहूदी नीं थे, पर पैहली बार, तिनां च ते बोहत लोक विस्वासी बणी गे। बरनबास कने शाऊल इनां नवें विस्वासियां जो प्रभु यीशुये रे बारे च होर जादा सखाणे खातर तेथी गये कने कलीसिया जो मजबूत कित्या। प्रभु यीशुये पर विस्वास करने औले पैहली बार अंताकिया च ई “मसीही” कैहलाये।

इक दिन, अंताकिया रे मसीही लोक बरत करने सौगी प्राथना करे रां थे। पवित्र आत्मा तिनां जो बोल्या, “मेरे खातर बरनबास कने शाऊला जो तिस कम्मा करने खातर लग करी देओ, सै जे करने खातर मैं तिनां जो सद्दी रा।” इस खातर अंताकिया रिया कलीसिया ते बरनबास कने शाऊला खातर प्राथना कित्ती कने तिनां पर हात्थ रखे। तां तिनें तिनां जो होरीं बोहतीं जगहां पर प्रभु यीशुये रे बारे च खुश खबरी रा प्रचार करने खातर भेज्जी दित्या। बरनबास कने शाऊले लग-लग लोकां रे झुंडा जो शिक्षा दित्ती कने बोहत सारे लोकें प्रभु यीशुये पर विस्वास कित्या।