47. फिलिप्पी च पौलुस कने सीलास

तजे शाऊले सारे रोमी सम्राज्या रियां यात्रा कित्तियाँ तां तिनें अपणे रोमी नौं “पौलुसा” रा इस्तेमाल करना शुरु करी दित्या। इक दिन, पौलुस कने तिसरा दोस्त सीलास फिलिप्पी नगरा च यीशुये रे बारे च खुश खबरी सुनाणे खातर गये। सै नगरा ते बाहर नदिया रे कनारे इकी जगहा पर गये तेथी लोक प्राथना करने रे खातर कट्ठे थे। तेथी से लुदिया नौं री इक जनाना ने मिले सै जे इक व्यापारी थी। सै परमेशरा ने प्रेम करां थी कने परमेशरा री आराधना करां थी।

परमेशरे लुदिया जो यीशुये रे बारे च संदेशा पर विस्वास करने खातर योग्य कित्या। पौलुस कने सीलासे तिसा जो कने तिसारे टबरा जो बपतिस्मा दित्या। तिसे पौलुस कने सीलासा जो अपणे घरा च ठैहरने खातर सद्या। इस खातर सै तेथी रूकी गये।

पौलुस कने सीलासे लोकां ने अक्सर तिसा जगहा पर मिलां थे तेथी जे यहूदी लोक प्राथना करां थे। हर रोज तजे सै तेथी जो जां थे तां इक दासी जनाना च तिसा च जे दुष्टात्मा रे जरिये चलाई जावां थी तिनां रा पीछा करां थी। इसा दुष्टात्मा रे जरिये ते सै लोकां रा औणे औला बगत दस्सां थी, इस खातर सै औणे औला बगत दस्सणे औलिया रे तौरा च अपणे मालकां खातर बोहत पैसे कमां थी।

तिनां रे जांदे बगता सै दासी जनाना रड़ाई ने दस्सां थी, “ये माहणु परम प्रधान परमेशरा रे सेवक ये। ये तुहां जो उध्दार पाणे रा रस्ता दस्से रां ये!” सै हर रोज येढ़ा ई करां थी तिसते जे पौलुस नराज हुई गया।

आखर च, इक दिन तजे तिसे दासी जनाने रड़ाणा शुरू कित्या, तां पौलुसे तिसा खौ मुड़ी कने तिसा रे अंदरा रिया दुष्टात्मा ने बोल्या, “प्रभु यीशुये रे नौं ते इसा चते निकली जा।” तिस बगत तिसे दुष्टात्मे तिसा जो छड्डी दित्या।

तिसा दासी कुड़िया रे मालक बोहत गुस्से हुई गये। तजे तिनां जो पता लगया भई बिना तिसा दुष्टात्मा ते सै दासी कुड़ी लोकां जो औणे औलियां गल्लां नीं सकदी थी। इतरा मतलब था भई लोकां हुण तिसा रे मालकां जो पैसे नीं देणे भई सै तिनां जो तिनां रा औणे औला बगत दस्सो भई तिनां ने सौगी क्या हुणा।

इस खातर तिसे दासिये कुड़िया रे मालके पौलुस कने सीलासा जो रोमी अधिकारियां ला जो लई गये। तिनें पौलुस कने सीलासा जो कुट्टया कने फेरी तिनां जो कैद खाने च पाई दित्या।

तिनें पौलुसा कने सीलासा जो जेलखाने रे येढ़े हिस्से‍ रख्या तेथी जे सबते जादा सपाई थे। येथी तकौ भई तिनें तिनां रे पैरां जो लकड़िया रे बड्डे टुकड़ेयां च जोड़ी दित्या। पर पौलुस कने सीलासे अधिया राती रे बगता, परमेशरा री स्तुति रे गीत गाये रां थे।

अचानक ते, इक बड्डा हिलण हुआ! जेलखाने रे सारे दरवाजे खुली गये कने सारे कैदियां रियां जंजीरां खुली ने पई गईयां।

तजे दरोगा जागी गया। तिने देख्या भई कैद खाने रे सारे दरवाजे खुली गरे थे। तिने सोचया भई सारे कैदी बची कने नह्ठी गरे थे। सै डरी गया भई तिनां रे नह्ठी जाणे रिया बजहा ते रोमी अधिकारियां तिसो मारी देणा, इस खातर सै अप्पुं जो मारने खातर तैयार हुई गया! पर पौलुस तिसो देखी ने जोरा ने हाक्क पाई, “रूकी जा! अपणा किछ नुक्सान मत करदा। अहें सारे येथी ई हये।”

तिस दरोगे कंबदे हुये पौलुस कने सीलासा ला जो आई ने पूछया, “उध्दार पाणे खातर हऊँ क्या करूँ?” पौलुसे तिसो जवाब दित्या, “प्रभु यीशुये पर विस्वास कर, तां तिज्जो कने तेरे घराने जो उध्दार मिलणा।” तां सै दरोगा पौलुस कने सीलासा जो अपणे घरा जो लई गया कने तिनां रे जख्मां जो साफ कित्या। पौलुसे तिसरे घरा रे सबीं लोकां जो प्रभु यीशुये रे बारे च खुश खबरी सुणाई।

दरोगे कने तिसरे पूरे टबरे प्रभु यीशुये पर विस्वास कित्या, इस खातर पौलुसे कने सीलासे तिनां जो बपतिस्मा दित्या। तां दरोगे पौलुस कने सीलासा जो रोटी खुआई कने सै इकी दुज्जे सौगी खुश हुये।

अगले दिन नगरा रे अगुवेयां पौलुसा कने सीलासा जो कैद खाने ते अजाद करी दित्या कने फिलिप्पी ते चली जाणे खातर गलाया। पौलुस कने सीलासे लुदिया कने किछ होर दोस्तां ने मिले कने तिसते बाद नगरा ते निकली गये। प्रभु यीशुये रे बारे च खुश खबरी फैलदी गई कने कलीसिया बद्दी गई।

पौलुस कने होरीं मसीही अगुवेयां बोहती नगरां री यात्रा कित्ती। तिनें लोकां जो प्रभु यीशुये रे बारे च खुश खबरी सुणाई। तिनें कलीसियावां रे विस्वासियां जो हिम्मत देणे कने शिक्षा देणे खातर कई चिट्ठियाँ बी लिखियां। इनां च ते बाइबला रियां कताबां बणी गईयां।