48. प्रभु यीशु ई वादा कित्तिरा मसीह आ

तजे परमेशरे सृष्टिया जो बणाया तां सब किछ खरा था। कोई पाप नीं था। आदम कने हव्वा इकी दुज्जे जो प्रेम करां थे कने सै परमेशरा ने प्रेम करां थे। कोई बमारी या मौत नीं थी। परमेशरे ईयां ई संसारा जो चाहवां था।

शैताने सप्पा रे जरिये बगीचे च हव्वा ने गल्लां कित्तियां, कांह्भई सै तिसो धोखा देणा चाहवां था। तां हव्वा कने आदमे परमेशरा रे बरोधा च पाप कित्या। कांह्भई तिनें पाप कित्या था इस खातर धरतिया पर रैहणे औले सब माहणु मरां ये।

कांह्भई आदम कने हव्वे पाप कित्या था, इस खातर किछ होर बी बुरा हुआ। सै परमेशरा रा बरोध करने औले हुई गये। इतरे परिणाम ये हुआ भई तिनां ते जमणे औले सारे पापी कैहलाये। हर इक माहणु जन्मा ते ई परमेशरा रे बरोधा च पापी हुआं। परमेशर कने लोकां रे बीच शान्ति नीं थी। पर परमेशर शान्ति बनाणां चाहवां था।

परमेशरे वादा कित्या भई हव्वा रे इकी वंशजा शैताना रे सिरा जो जीगलणा। तिनें ये बी गलाया भई शैताना तिसरिया अड्डिया जो डस्णा। मतलब शैताना मसीह जो मारी देणा, पर परमेशरा तिसो फेरी ते जीऊंदा करी देणा। इसते बाद, मसीह शैताना रियां शक्तिया जो सदा खातर खत्म करी देणा। कई सालां ते बाद, परमेशरे प्रकट कित्या भई सै मसीह यीशु आ।

परमेशरे तिसा बाढ़ा ते अपणे टबरा जो बचाया तिसो जे सै लौणे औला था। नूहा जो इक किस्ती बनाणे खातर बोल्या। कने इयां परमेशरे तिनां लोकां जो बचाया सै जे तिस पर विस्वास करां थे। इस तरीके ने, सै सारे रे सारे परमेशरा रे जरिये मारी देणे जोगे थे कांह्भई तिनें पाप कित्या था। पर परमेशरे तिनां सबीं जो बचाणे खातर प्रभु यीशुये जो भेज्या सै जे तिस पर विस्वास करां ये।

कई सौ सालां ते बाद, याजक परमेशरा खातर बलिदान चढ़ांदे रये। ये दस्सां था भई लोकें पाप कित्या कने ये भई सै परमेशरा रे जरिये तिनां जो सजा मिलणे रे जोगे थे। पर सै बलिदान तिनांरे पापां जो माफ नीं करी सके थे। प्रभु यीशु सबते बड्डा महायाजक आ। तिने सै कित्या सै जे कोई याजक नीं करी सकदा था। तिने अप्पुं जो तिस इको ई बलिदाना खातर दई दित्या सै जे हर किसी रे पापां जो मटाई सकां था। तिनें ये मन्नया भई परमेशरे तिनां सबीं रे पापां खातर तिसो सजा देओ। इसा बजहा ते, प्रभु यीशु सिध्द महायाजक था।

परमेशरे अब्राहमा ने बोल्या, “मांह तेरे जरिये संसारा रे सबीं कुलां जो आशीष देणी।” प्रभु यीशु अब्राहमा रा वंशज था। परमेशरे अब्राहमा रे जरिये ते सबीं कुलां जो आशीषां देआं आ, कांह्भई सै जे प्रभु यीशुये पर विस्वास करांये परमेशर तिनां सबीं जो पापां ते बचावां। तजे ये लोक प्रभु यीशुये पर विस्वास करांये, तां परमेशरे तिनां जो अब्राहमा रे वंशज मन्नां।

परमेशरे अब्राहमा ने गलाया भई सै अपणे इकलौते पुत्रा जो तिस खातर बलिदान करी देओ। पर फेरी परमेशरे इसहाका रे बदले च बलि करने खातर इक मेम्ना दई दित्या। अहें सारे अपणे पापां खातर मारे जाणे रे जोगे थे! पर परमेशरे अहां रिया जगहा पर मरने खातर प्रभु यीशुये जो बलिदाना रे तौरा च दई दित्या। इसा वजहा ते अहें प्रभु यीशुये जो परमेशरा रा मेम्ना बोलांये।

तजे परमेशरे मिस्र पर आखरी बिपत्ति भेजी तां तिने हर इक इस्राएली परिवारां ने गलाया भई सै इक मेम्ने जो बलि करो। तिस मेम्ने च कोई दोष नीं हुणा चाहिंदा। तां अपणे दरवाजे रिया चौखटा रे उपर कने बखा खा तिनां जो तिसरे खुना जो लगाणे पौणा था। तजे परमेशरे तिस खुना जो देख्या तां सै तिनांरे घरां ते अग्गे बधी गया कने तिनांरे पैहलोठे पुत्रां जो नीं मारया। तजे ये हुआ तां परमेशरे इसो फसह रा त्योहार गलाया।

प्रभु यीशु फसह ते त्योहारा रे इकी मेम्ने साई आ। तिनें जे कदी बी पाप नीं कित्या, इस खातर तिस च बी गलत नीं था। सै फसह रे पर्वा रे बगता पर मरेया। तजे कोई प्रभु यीशुये पर विस्वास करां, तां प्रभु यीशुये रा लहु तिस माहणुये रे पापां री कीमत चुकावां। ये तेढ़ा आ तियां जे परमेशरे तिस माहणुये ला जो अग्गे बधीने गया, कांह्भई सै तिसो सजा नीं देंदा।

परमेशरे इस्राएली लोकां सौगी इक वाचा बन्नेयां, कांह्भई सै येड़े लोक थे तिनां जो परमेशरे अपणा बनाणे खातर चुणया था। पर हुण परमेशरे इक येढ़ी वाचा बन्नीरी सै जे सबीं खातर आ। जे किसी बी समाजा रा कोई बी माहणु बी इसा नविंयां वाचा जो मन्नां, तां सै परमेशरा रे लोकां च मिली जां। सै येढ़ा इस खातर कराम आ कांह्भई सै प्रभु यीशुये पर विस्वास करां आ।

मूसा इक येढ़ा भविष्यव्दक्ता था तिने जे परमेशरा रे वचनां जो बड्डिया सामर्था सौगी प्रचार कित्या था। पर प्रभु यीशु सबीं भविष्यव्दक्तावां च बड्डा आ। सै परमेशर आ, इस खातर जो किछ तिने कित्या कने गलाया सै परमेशरा रे काम्म कने वचन थे। इस खातर पवित्र शास्त्र प्रभु यीशुये जो परमेशरा रा वचन दस्सां।

परमेशरे राजा दाऊदा ने वादा कित्या था भई राजा रे तौरा च तिसरा इकी वंशजा परमेशरा रे लोकां पर सदा खातर शासन करना। प्रभु यीशु परमेशरा रा पुत्र कने मसीह आ, इस खातर सै राजा दाऊदा रा वंशज आ सै जे सदा खातर राज्य करी सकां आ।

दाऊद तां इस्राएला रा राजा था, पर प्रभु यीशु सारे जगता रा राजा आ! तिस फेरी भीं औणा कने सदा खातर न्याय कने शान्तिया सौगी अपणे राज्य पर शासन करना।