49. परमेशरा री नवीं वाचा

इकी स्वर्गदूते इकी जवान जनाना मरियमा ने गलाया भई तिसा परमेशरा रे पुत्रा जो जन्म देणा। अजें सै कुआरी ई थी, पर पवित्र आत्मा रिया सामर्था ते तिसा जो गर्भ रैया। तिसे इकी पुत्रा जो पैदा कित्या तिसरा नौं यीशु रख्या गया। इस खातर, प्रभु यीशु परमेशर कने माहणु दोनों आ।

प्रभु यीशुये बोहत सारे चमत्कार कित्ते तिनां ते जे ये पता लगां भई सै परमेशर आ। सै पाणिये पर चलया कने तुफाना जो शान्त करी दित्या। तिनें बोहत सारे बमार लोकां जो चंगा कित्या कने बोहत सारे लोकां च ते दुष्टात्मां जो कड्डया। तिने मरी रे लोकां जो जीऊंदा करी दित्या कने तिने पाँज्ज रोटी कने दो मछियाँ ते पाँज्ज हजार लोकां जो खुआणे खातर रोटिया चौ बदली दित्या।

प्रभु यीशु इक महान शिक्षक बी था। जो किछ बी तिनें सखाया, सै तिनें सिध्द हुई ने सखाया। सै जे से लोकां ते करने खातर बोलां भई तिनां जो करना चाहिंदा कांह्भई सै परमेशरा रा पुत्र आ। उदाहरणा खातर, तिने सखाया भई तुहां जो होरीं लोकअं जो तिसा रीतिया ते प्रेम करने री जरुरत ई तियां जे तुहें अप्पुं सौगी प्रेम करां ये।

तिने ये बी सखाया भई तुहांजो सबीं चीजां ते जादा कने अपणी संपतिया ते बी जादा परमेशरा जो प्रेम करना चाहिंदा।

प्रभु यीशुये गलाया भई संसारा च किसी बी चीजा रे मिलणे ते खरा आ परमेशरा रे राज्य चौ जाणा। तिसरे राज्य च तुहांरे जाणे खातर जरुरी आ भई परमेशर तुहां जो तुहां रे पापां ते बचाओ।

प्रभु यीशुये गलाया भई तिनां लोकां जे तिसो ग्रहण करना। परमेशरा तिनां लोकां जो बचाणा। पर किछ लोकां तिसो ग्रहण नीं करना। तिने ये बी गलाया भई किछ लोक खरिया मिट्टिया साई ये, कांह्भई सै प्रभु यीशुये रे बारे च खु खबरिया जो मन्नी लेयांये कने परमेशर तिनां जो बचावां। पर किछ लोक रस्ते रिया सख्त मिट्टिया साई ये। परमेशरा रा वचन बीजा साई रस्ते पर पवां, पर तेथी किछ मनी पैदा हुंदा। ये लोक प्रभु यीशुये रे बारे च संदेशां जो नीं मन्नदे। सै परमेशरा रे राज्या च जाणे ते मना करी देआंये।

प्रभु यीशुये सखाया भई परमेशर पापियां ने बोहत प्रेम करां। सै तिनां जो माफ करना चाहवां कने तिनां जो अपणी औलादां बनाणा चाहवां।

प्रभु यीशुये ये बी दस्सया भई परमेशर पापा ते घृणा करां। कांह्भई आदम कने हव्वे पाप कित्या, इस खातर तिनां ते पैदा हुणे औले सारे पापी हुये। इस संसारा च रैहणे औला हर इक माणू पाप करां कने परमेशरा ते दूर आ। हर इक माहणु परमेशरा ने बैर करां।

पर परमेशरे इस संसारा च रैहणे औले हर इक माहणुये ने इस तरीके ने प्रेम कित्या : तिने अपणा इकलौता पुत्र दई दित्या भई परमेशर तिस पर विस्वास करने औलेयां जो सजा नीं देओ। इसरे बजाये, तिनां तिस सौगी सदा खातर रैहणा।

तुहें मरने रे जोगे ये। कांह्भई तुहें पाप कित्ती रा। तुहां ने परमेशरा रा गुस्से हुणा ठीक ई आ, इसरे बजाये, सै प्रभु यीशुये पर गुस्से हुआ। तिनें प्रभु यीशुये जो क्रूसा पर मौता री सजा दई कने सजा दित्ती।

प्रभु यीशुये कदी बी पाप नीं कित्या, पर तिने परमेशरा जो तिसो सजा देणे दित्ती। तिनें अहां खातर मरना स्वीकार कित्या। इस तरीके ने, तुहां रे पापां जो कने इस संसार च रैहणे औले हर इक माहणुये रे पापां जो चक्की लेणे खातर सै इक सिध्द बलिदान था। प्रभु यीशुये अप्पुं जो परमेशरा खातर बलिदान करी दित्या, इस खातर परमेशरे किसी बी पापा जो, येथी तकौ भई खतरनाक ते खतरनाक पापां जो बी माफ करां।

भले ई जे तुहें बोहत खरे काम्म बी करदे हो, तां इतरे जरिये परमेशरा तुहां जो अनन्त मौता ते बचाणा नीं आ। परमेशरा रा दोस्त बणने खातर तुहें अप्पुं खा ते किछ मनी करी सकदे। इतरे बजाये, तुहां जो विस्वास करने पौणा भई प्रभु यीशु परमेशरा रा पुत्र आ कने सै तुहां रे बदले क्रूसा पर मरी गया कने ये बी भई परमेशरे तिसो फेरी भीं जीऊंदा करी दित्या। जे तुहें इस पर विस्वास करो, तां परमेशरा तुहां रे सारे पाप माफ करी देणे।

परमेशरा प्रभु यीशुये पर विस्वास करने औले कने सै जे प्रभुये जो अपणा प्रभु स्वीकार करां येढ़े हर इक माहणुये जो बचाणा। पर जो कोई प्रभु यीशुये पर विस्वास नीं करदे सै कियां बी बची नीं सकदे। ये कोई मायने नीं रखदा भई तुहें गरीब हो या अमीर हो, मर्द हो या जनाना, येथी रैंहदे हो या ओथी। परमेशर तुहां ने प्रेम करां कने चाहवां भई तुहें प्रभु यीशुये पर विस्वास करो भई सै तुहां रा दोस्त बणी सको।

प्रभु यीशु तुहां जो सद्दे रां भई तिस पर विस्वास करो कने बपतिस्मा लओ। क्या तुहें विस्वास करां ये भई परमेशरा रा इकलौता पुत्र यीशु मसीह ई आ? क्या तुहें विस्वास करां ये भई तुहें पापी ये कने ये भई तुहें परमेशरा रे जरिये पापां री सजा भुगतणे रे जोगे ये? क्या तुहें विस्वास करां ये भई प्रभु यीशु तुहां रे पापां जो मटाणे खातर क्रूसा पर मरया?

जे तुहें प्रु यीशुये पर कने जो किछ तिने तुहां खातर कित्तिरा तिस पर विस्वास करां ये, तां तुहें इक मसीही ये! शैतान अपणे नेहरे रे राज्य च हुण तुहां पर राज्य नीं करदा। हुण परमेशर अपणिया लोई च राज्य च तुहां पर राज करां आ। तिनें तुहां जो पाप करने ते रोकी दित्तिरा, सै जे तुहें पीढ़ियां ते करदे आये रां थे। तिनें तुहां जो इक नवां, खरा जीवन दित्या।

जे तुहें इक मसीही ये तां सै जे प्रभु यीशुये कित्तिरा तिस रिया बजहा परमेशरे तुहांरे पापां जो माफ करी दित्तिरा। हुण, परमेशर इकी बैरिये री बजाये तुहां जो घणा दोस्त मन्नां।

जे तुहें परमेशरा रे दोस्त हो कने प्रभु यीशुये सेवक हो तां तुहें तिनां गल्लां रा पालन करने री इच्छा करगे सै जे किछ प्रभु यीशु तुहां जो सखावां। भले ई तुहें इक मसीही हो, शैताना हुण बी पाप करने खातर तुहां री परीक्षा करने री कोशत करनी। पर परमेशरा सदा सै करना सै जे तिनें करने रे वादे कित्तिरे। सै बोलां भई जे तुहें अपणे पापां जो मन्नी लो, तां तिस तुहां जो माफ करी देणा। तिस तुहां जो पापां रे बरोधा च लड़ने री सामर्थ देणा।

परमेशरे तुहां जो प्राथना करने कने तिसरे वचनां जो पढ़ने खातर बोलां। तिस तुहां जो होरीं विस्वासियां सौगी मेल मलाप करी ने तिसरी आराधना करने खातर बी दस्सां। तुहां जो होरीं लोकां जो दसणा भई तिने तुहां खातर क्या कित्तिरा। जे तुहें इनां सबीं कम्मां जो करो, तां तुहां तिसरे पक्के दोस्त बणी जाणा।