50. प्रभु यीशुये बापस औणा

लगभग दो हजार सालां ते, संसारा च सबी जगहां पर जादा ते जादा लोक मसीह यीशुये रे बारे च खुश खबरी सुणाये रां ये। कलीसिया तरक्की करे रां ई। प्रभु यीशुये रा वादा भई तिस संसारा रे आखर च बापस औणा। अजें तकौ तां सै बापस नीं आईरा, तां बी तिस अपणा वादा पूरा करना।

तजे भई अहें प्रभु यीशुये रे बापस औणे जो न्हालया रां ये, परमेशरे अहां ते येढ़े तरीके ते जीवन जीणे री इच्छा करां सै जे पवित्र आ कने तिसते जे तिसरा आदर हुंदा हो। तजे सै धरतिया पर रये रां था तां तिने गलाया, “मेरे चेलेयां संसारा रियां सबीं जगहां पर लोकां जो परमेशरा रे राज्य रे बारे च खुश खबरी प्रचार करनी कने तां अंत आई जाणा।”

मते सारे समाजा रे लोक अजें तकौ बी प्रभु यीशुये रे बारे च नीं सुणी रा। स्वर्गा जो बापस जाणे ते पैहले, प्रभु यीशुये मसीहियां ते तिनां लोकां जो खुश खबरी सुणाने खातर गलाई रा तिनें जे कदी मनी सुणी रा। प्रभु यीशुये बोल्या, “जावा कने सबीं जातियां रे लोकां जो चेला बणावा!” कने लूणने खातर खेत तां पक्की चुक्किरे!”

प्रभु यीशुये ये बी बोल्या, “किसी माहणुये रा सेवक अपणे मालका ते बड्डा नीं हुंदा। इस संसारा रे खास लोकें मेरते नफरत कित्ती कने मेरिया बजहा ते तिनां तुहां जो बी सताणा कने मारी देणा। इस संसारा च तुहां जो दुख कने कष्ट हुणे, पर मजबूत बणा कांह्भई मैं शैताना जो हराई दित्तिरा सै जे इस संसारा पर राज्य करां था। जे तुहें आखर तकौ मेरे सौगी विस्वासा जोगे बणी रे रओ, तां परमेशरा तुहां जो बचाणा!”

प्रभु यीशुये अपणे चेलेयां जो ये समझाणे खातर इक कहाणी सुणाई भई तजे संसारा रा अंत हुआं तां लोकां सौगी क्या हुणा। तिनें बोल्या, “किसी माहणुये अपणे खेता च खरा बीऊ बाह्या। तजे सै सये रां था तां तिसरा शत्रु आया कने कणका रे बीऊआं रे बीच जंगली पौधे रे बीजां जो बाह्ई दित्या कने फेरी सै चली गया।”

“तजे पौधेयां जो लुंगां निकलियां तां सेवकेम तिस माहणुये ने बोल्या, ‘हे स्वामी, तैं तां अपणे खेता च खरा बीज बाह्या था, तां फेरी इसच जंगली पौधे कां ये?’ तिने माहणुये जवाब दित्या, ‘सिर्फ मेरे शत्रु ई तिनां जो बाह्णा चाहंगे। ये मेरा कोई शत्रु आ तिने जे येढ़ा कित्तिरा।’”

“तिनें सेवकें अपणे मालका जो जवाब दित्या, ‘क्या अहें जंगली पौधेयां जो पट्टी देणा चाहिंदा?’ तिने मालके बोल्या, ‘नईं। जे तुहें येढ़ा करगे तां तुहां किछ कणक बी पट्टी देणी। लूणाईया रे बगता तकौ न्हयाला। तां जंगली पौधेयां रे पुल्ले बन्नी ने कट्ठे करी लवा तां भई तुहें तिनां जो फुक्की सको। पर कणका जो मेरे पेड़ुआं चौ ली आवा।’”

चेले इसा कहाणिया रे मतलबा जो नीं समझी सके, इस खातर तिनें प्रभु यीशुये ते तिनां जो समझाणे री प्राथना कित्ती। प्रभु यीशुये बोल्या, “खरा बीज बाह्णे औला माहणु मसीह रे बारे च दस्सां। खेत संसारा रे बारे दस्सां ये। खरा बीऊ परमेशरा रे राज्य रे लोकां रे बारे च दस्सां ये।”

“जंगली पौधे तिस दुष्ट माहणुये, शैताना रे लोकां रे बारे च दस्सां ये। तिस माहणुये रा शत्रु शैताना रे बारे च दस्सां, तिने जे जंगली पौधेयां जो बाह्ई दित्या था। लूणाई इस संसारा रे अंत हुणे रे बारे च दस्सां ई, कने लूणाई करने औले परमेशरा रे स्वर्गदूतां रे बारे च दस्सां ये।”

“तजे संसारा रा अन्त हुणा तां स्वर्गदूतां तिनां सबीं लोकां जो सौगी कट्ठा करना सै जे शैताना जो मन्नां ये। तिनां स्वर्गदूतां तिनां जो बोहत गर्म आग्गी च सट्टि देणा। तेथी तिनां लोकां पीड़ां च खतरनाक सताये जाणे च रोणा कने अपणे दाँद किर्डने रा काम्म करना। पर सै जे लोक धर्मी ये, तिनें जे प्रभु यीशुये रे पीछे चलना नीं छड्डया, तिनां अपणे पिता परमेशरा रे राज्य च सूरजा साई चमकणा।”

प्रभु यीशुये ये बी गलाया भई इस संसारा रा अंत हुणे रे पैहले तिस पृथ्विया पे बापस औणा। तिस तिस ई तरीके कने बापस औणा तियां जे सै गया था। मतलब, तिस ले असली शरीर हुणा कने तिस आकाशा रेयां बदलां पर सवार हुई कने औणा। तजे प्रभु यीशुये बापस औणा, तां हर इक मसीही सै जे मरी चुक्की रे तिनां मरी रेयां च ते जी उठणा कने तिनां ने अकाशा च मिलणा।

तां सै जे मसीही अजें तकौ जीऊंदे हुणे सै अकाशा चौ चक्कि लये जाणे कने तिनां दुज्जे मसीहियां सौगी मिली जाणा सै जे मरी रेयां च ते जीऊंदे हुई गरे। तिनां सब्बीं तेथी प्रभु यीशुये सौगी रैहणा। तिसते बाद, प्रभु यीशुये अपणे लोकां सौगी रैहणा। तजे तिनां सौगी रैहणा तां तिनां ले सदा खातर पूरी शान्ति हुणी।

प्रभु यीशुये तिस पर विस्वास करने औले हर इक माहणुये जो इक मुकुट देणे री प्रतिज्ञा कित्तिरी। तिनां सदा खातर परमेशरा सौगी हर इक चीजा पर राज्य करना। तिनां ले सिध्द शान्ति हुणी।

पर परमेशरा तिनां सबीं रा न्याय करना तिनां सै जे प्रभु यीशुये पर विस्वास नीं करदे। तिस तिनां जो नरका च पाई देणा। तेथी तिनां रोणा कने अपणे दँदां जो किर्डणा कने तिनां जो सदा खातर दर्दां रैहणियां। कदी मनी बुझणे औलिया आग्गी तिनां जो सदा फुखदे रैहणा कने तेथी रेयां कीड़ेयां तिनां जो बड्डदे ई रैणा।

तजे प्रभु यीशु बापस आवां, तां तिस पूरे तरीके ने शैताना जो कने तिसरे राज्य जो नष्ट करी देणा। तिस शैताना जो नरका च पाई देणा। तेथी शैताना खातर जलदे रैहणा, तिनां सबीं सौगी तिनें जे परमेशरा रियां गल्लां जो मनणे रे बजाये शैताना रे पीछे चलणे रा चुनाव कित्या था।

कांह्भई आदम कने हव्वे परमेशरा रे हुक्मां जो नीं मन्नेया था कने पापा जो संसारा चौ लई कने आये थे, परमेशरे तिसो श्राप दित्या कने तिसो नष्ट करने रा निर्णय कित्या। पर किसी दिन परमेशरा इक नवां स्वर्ग कने इक नवीं पृथ्विया री रचना करनी सै जे सिध्द हुणे।

प्रभु यीशुये कने तिसरे लोकां तिसा नविंया पृथ्विया पर रैहणा कने तिस सदा खातर सबीं चीजां पर राज करना। तिस अपणे लोकां रियां आक्खीं रा हर इक आँसु पुंझी देणा। कने किसी जो बी दुख कने कष्ट नीं हुणे। तिनां रोणा नीं आ। तिनां बमार नीं हुणा नां ई मरना। तेथी किछ बी बुराई नीं हुणी। प्रभु यीशुये अपणे राज्य पर न्याय सौगी कने शान्तिया ने सौगी राज करना। तिस हमेशा खातर अपणे लोकां सौगी रैहणा।