8. परमेश्वर युसफ होर तेऊरे परिवार बचाऊदा

याकुबा कनान देशा में रहंदे कई साला होई मुकी थी, जेबा सह बुढल होऊ , तेबा तेऊ आपणे प्यारे शोहरू युसपा बे तेउरे भाई रा हाला चाला पूछणे बे भेजू , तेऊरे भाई जनबरा री भाल शूण करा थी।

युसुफा रे भाई तेऊका जलन करा थी किबेकी त्या रअ बापू युसफा सगे ज्यादा प्रेम करा थी , होर तेबा भी की युसफे सुपने हेरू थी की तेऊ आपणे भाई सगे राज करणा जेबा युसफ आपणे भाई सेटा आऊओ त्याहे डाकी करे सह बानू, होर सह नोकरा रे व्यापारी बे बेचू।

जेबा युसुफा रे भाई घरा बे बापिस आउए तेबा तयाहे युसुफा रे झिकडे चिरी होर बाकरी रे खुना सगे शगी। तेउकी त्याए आपणे त्या झिकड़े आपणे बापू बे रिहाई करे बोलू की तेरअ शोहरू युसफ जगली जानबरे मारी पाऊ। यहा गला शूणी करे युसफा रअ बापू बहु दुखी होऊ।

नोकरा रा व्यापार करन आल़े लोके युसफ मिस्र देशा बे निऊ। मिस्र देशा में नील नई रे कनारे में एक बडअ देश बसु दअ एक बडअ शक्तिशाली देश थी तयाहे नोकरा रे ब्यपारी युसफ एक सेठ सरकारी अधिकारी बे बेचू।युसफे आपणे मलका री राबड़े सगे सेवा करी होर परमेश्वरे तेऊ बे आशीष दीनी।

एता वाद एडा होऊ की युसुफा री मालका लाड़ीये तेऊ सगे गलत कामा करने री कोशिश करी, पर युसुफे परमेश्वरा रे बिरोधा में पापा करने का नाँई करू। तेबा तेसा रोष आउआ होर तेसा बेटड़ी युसुफा पेंदे झूठा आरोप लाऊ, तेबा युसुफ ढाकु होर जेला में पाऊ। जेला में भी युसुफ परमेश्वरा रे प्रति सचअ होर ईमानदार रहू, होर परमेश्वरे तेऊ बे आशीष दीनी।

दुई साला तणी युसुफ निर्दोष होई करे भी जेला में थी, एकसा राची मिस्र देशा रे राजे फिरोने दुई सुपने हेरी त्याहे सह बहु परेशान करू तेऊरअ कोहे भी भी सलाहकार तेउरे सुपने रा उतर नाँई खोजी सकू।

परमेश्वरे युसफा बे सुपने रा मतलब खोजणे री समझ दीनी थी, तेबा राजे फिरोने युसुफा बे जेला का आपु सेटा बे शादू युसुफे राजे रे सुपने रा मतलब खोजू होर बोलू ,” पुरे मिस्र देशा में सात साला तणी ज्यादा फसल हुणी, पर एता बाद सात साला तणी अकाल पणनअ।"

फिरोन युसुफा का एथरअ खुश होऊ की तेऊ युसुफ मिस्र देशा रअ दूजअ सभी का सामर्थी मणश चुनु।

युसुफे रामडी साता साला में लोका का बहु सारा नाज कठे करने बे बोलू। जेबा साता साला अकाल पडू तेबा युसुफे लोका बे नाज बेचू की सभी लोका बे खाणे बे नाज भेटे।

सह अकाल सीधी मिस्र में नाँई पर कनाना में भी ज्यादा थी जखे युसुफ होर तेऊरे टबर रहंधा थी।

तेबा याकुबे आपणे बड़े शोहरू नाजा लऊणे री तणी मिस्र देशा बे भेजी। जेबा त्या नाजा लऊणे री तणी युसुफा जेह खडे होई तेबा त्याहे भाई सह नाँई पछेणु। पर युसुफे त्याहा पछेणी।

युसफे पहिले आपणे भाई परेखी की त्या बदली की नाँई, होर तेता बाद तेऊ बोलू , “ हाऊ थारअ भाई युसुफ आसा! डरा नाँई आंदे। जेबरे तमे हाऊ मिस्र देशा रे व्यपारी सेटा बेचू थी। तेबा तमे तेऊ वक्ते महाबे बुरे करने री सोची थी, पर परमेश्वरे सह बुराई भलाई री तणी इस्तेमाल करी! ईच्छा होर मिस्र देशा में रहा की हाऊ तमा बे होर थारे परिवार बे खाणे रा इंतजाम करू।"

जेबा युसुफा रे भाई घरा बे वापिस आऊये होर त्याहे आपणे बापू याकुबा बे खोजू की युसुफ एबरे भी जिउंद आसा तेबा सह बखे खुश होऊ।

पर याकूब एक बुढल मणश थी तेबा भी सह पुरे परिवारे सगे मिस्र देशा बे नाठअ, होर त्या तखे बसी। याकुबे मरने का पहिले तेऊ आपणे हर एक शोहरू बे आशीर्वाद दीना।

वाचा रा सह बायदा जोह परमेश्वरे अब्राहमा सगे करू दा थी सह इसाह्का पेंदे होर तेता बाद याकुबा पेंदे , होर तेता बाद तेऊरे बारहा शोहरू पेंदे, होर तेउरे परिबार पेंदे आउआ थी। त्याह बाराह शोहरू रे बंशज इस्राएला रे बारहरा गोत्र बणी।