9. परमेश्वरा रअ मूसा शादणअ

युसफा रे मरने बाद तेउरे सारे रिश्तेदार मिस्र देशा में रहंदे लागे। तया होर तयाहरे बंश कई साला तणी मिस्र देशा ही में रही, होर तयाहरे बहु सारे शोहरू होई। तया इस्राएली होई।

कई शअ साला बीतणे बाद, इस्राइली री आबादी बहु बढी थी। होर मिस्री लोका एबा युसफा होर जोह कुछ तेऊए त्या री सहायता करने री तणी जोह कुछ करू थी तेता बिसरी थी। त्या इस्राएला रे लोका का डरी थी किवेकी इस्राएला रे लोका री आवादी मिस्री लोका का ज्यादा थी। तेबा तेऊ वक्ते मिस्र देशा में राजा करण आल़े फिरोने राजे एस्राएली लोका मिस्री रे गुलाम बणाई।

मिस्र रा रे लोके एस्राएली लोका बे बहु घर होर कई ग्रा बणाऊणे बे मजबूर करी। तेऊ मुशिकला कामे एस्राएली लोका री जिंदगी बडी दुखा आली बणाई, पर परमेश्वरे त्या बे आशीष दीनी होर त्यारे होर बहु शोहरू पैदा होई।

राजे फिरोने हेरू की इस्राएली लोका रे बहु शोहरू पैदा हुँदै लागे, तेबा तेऊ आपणे सपाही बे आज्ञा दीनी इस्राएली लोका रे सभी शोहरू नील नई में शोटी करे मारी पा।

एक इस्राएली बेटड़ी एकी शोहरू बे जन्म दीना। तेसे होर तेसके मर्दे जेतरा होई सके सह शोहरू गझाई डाहु।

जेबा तेऊ शोहरू रे आमा बापू तेऊ शोहरू ज्यादा नाँई घझाई सकी, तेबा त्याहे तेऊ शोहरू मरने का बचाऊणे री तणी एकी टोकरी में डाहु होर सह टोकरी नील नई रे किनारे एकी सरकंडे रे बीचा में डाही। तेउ शोहरू री बडी भीणे दूर खड़ी होई करे एता हेरदी लागी दी थी की तेऊ सगे केह हूणा।

जेबा फिरोना री शोहरी तेसा नई में नेहुदी आई, तखे तेसे सरकंडे रे बीच एक टोकरी हेरी। राजकुमारी आपणी दासी बे आणदी भेजी, तेसे टोकरी में एक शोहरू हेरू राजकुमारी तेऊ शोहरू पेंदे दया करी करे सह आपण शोहरू बणाऊ। तेसा एक इस्राएली बेटड़ी बे तेऊ शोहरू बे दुधा पिलाऊदी डाही, यह बेटड़ी तेउरी आसली आमा थी, पर एसा गला राजकुमारी नाँई जाणदी थी,जेबा सह शोहरू बडअ होऊ,तेबा तेसा इस्राएली बेटड़ी सोचु की एबा शोहरू आमा रे दुदा री जरूरत नाँई आंदी, तेबा तेसा सह शोहरू फिरोना री शोहरी सेटा बापिस दीनअ, होर तेसे तेऊरा ना मूसा डाहु।

एकसा धयाडी जेबा मूसा जुआन हऊ थी,तेबा तेऊ हेरू की एक मिसरी एकी एजराइली बे चीकतअ लागअ साहा।मूसा आपणे सगी इसराइली बे बचाऊणे री कोशिश करी।

मूसा सोचु की हाउ कासीये नाँई हेरू, तेबा तेऊ सह मिस्री मणश मारी पाऊ,होर तेऊर शव आटी पाऊ पर मूसा कासीये तेऊ मिस्री मणशा मारदअ हेरू थी।

फिरोना बे पता लागा की मूसा यह कह करू। तेऊये तेऊ मारने री कोशिश करी, पर मूसा मिस्र देशा का जगला फेरा बे ठुरु। फिरोना रे फऊजी तेऊ तखे नाँई लोडी सके।

मूसा मिस्र देशा का दूर मिधान देशा में रहंधअ लागअ। तेऊ तखे एकी बेटड़ी सगे ब्याह करू होर तेऊररे दुई शोहरु होई। तखे सह एक फुहाल बणु

मूसा तखे आपणे शहरे री भेडा चारा थी। एकसा धीयाडी मूसा एक जलदी होछी शाण हेरी जो बिना भस्म हुँदे जलदी लागी दी थी। सह तेता हेरने री तणी तेसा होछी शाणी नेड नाठअ। तेबा परमेश्वरे तेऊ सगे गला करी। परमेश्वरे तेऊ बे बोलू मूसा बूटा पोरी खोल किबेकी तूह एक पवित्र जगहा में खडअ आसा।

परमेश्वरे मूसा बे बोलू, "माए आपणे लोका रा दुःख हेरू दा साहा जोह मिस्र देशा में आसा। तेबा माह तूह फिरोना राजे सेटा बे भेजणअ की, तूह इस्राएली लोका मिसरा रे लोका री गुलामी का छाडी आणे। माह त्याबे कनान देश दीणअ, सह देश जोह माए अब्राहम, इसाहक, होर याकुबा बे दीणे रा बायदा करू दा साहा।"

मूसा परमेश्वरा का पुछु, "अगर त्या लोका पुछले की तूह कुणी भेजू तेबा महा त्याबे केह जबाब दीणा ?" परमेश्वरे बोलू, " ताए त्याबे बोलणा जो हाऊ साहा सह हाउ आसा। तूह त्याबे एडा भी बोले जासुये हाऊ भेजूद साहा सह थारे पूर्वज अब्राहम इसाहक होर याकूबा रअ परमेश्वर योह्बा आसा, होर सदा तणी तेऊरा यहे ना रहणा।"

मूसा फिरोना सेटा नाहणे डरा थी,किबेकी सह ठीक ढंगा सगे गला नाँई करी पाऊदअ थी, तेबा परमेश्वरे मूसा री सहायता करने री तणी तेऊर भाई हारून तेऊ सगे भेजू।