30. ईशू खैऊई पांज़ हज़ार लोगा का रोटी।

ईशू छ़ाडै आपणैं तिंयां च़ेल्लै ज़ोल़ी-ज़ोल़ी ज़ैगै-ज़ैगै गराऊंऐं लोगा का परमेशरे राज़े बारै खोज़दै। तिन्नां गराऊंआं का हांढी पुजै तिंयां बापस ईशू सेटा फिरी संघा डेऊए किश्ती दी बेटी गलील समुंदरा पारा बाखा लै एकी कांगनरांगी ज़ैगा लै।

पार बाखा तै होर बी क्ई लोग, तिन्नैं हेरअ भाल़ी कि ईशू और तेऊए च़ेल्लै डेऊऐ किश्ती दी बेशी पारा बाखा लै। तिंयां लोग ठुर्है तिधा का इहै कि तिंयां गऐ ज़ांघा हांढी तिन्नां का आजी गलील समूंदरा पार बाखा पुजी संघा लागै तिंयां ईशू और तेऊए च़ेल्लै एछदै न्हैल़ै।

तिन्नां लोगे छ़ुंढा दी तै मर्ध ई मर्ध कोऐ पांज़ हज़ार, बेटल़ी और माठै थिऐ तेता का लाऊआ। तिंयां लोग तै बाझ़ी फुआले भेडा ज़िहै। ईशू फिरी तिन्नां भाल़ी तिन्नें झींण, परमेशरे राज़े गल्ला खोज़ी करै ज़ुंण तिन्नां जैंदरी रोगी आसा तै; तिंयां किऐ तेऊ सोभै नरोगै।

तेतरी च़ाल्ली ती सान्ह पल़ी और च़ेल्लै लागै ईशू लै बोलदै, “ऐबै च़ाल्ली सान्ह पल़ी, हाम्हैं आसा गटा-गराऊंआं का खास्सै दूर, ऐबै कर तूह इहअ कि ईन्नां छ़ाड तूह घरा लै ताकि ईंयां आप्पू लै खाणैं पीणैंओ इंतज़ाम करी सके।”

पर ईशू बोलअ तिन्नां लै इहअ, “तम्हैं दैआ इना लै खाणां लै।” च़ेल्लै बोलअ इहअ, “हाम्हां का किधी आसा इना एतरै लोगा लै रोटी? हाम्हां का आसा सिधी पांच़ रोटी और दूई होछ़ी-होछ़ी म्हाछ़ली!

ईशू बोलअ तिन्नां लै, “इना बशैल़ा पज़ाह-पज़ाह लोगो घिर्नू बणांईं धरनीं घाह प्रैंदै घेल़्ही दी ज़ुदै-ज़ुदै।

इहअ बोली ढाकी ईशू तिंयां पांज़ रोटी और दूई म्हाछ़ली आपणैं हाथै छ़ाबी दी। ईशू भाल़अ उझै सरगा बाखा लै संघा किअ तिन्नां रोटी और म्हाछ़ली लै परमेशरो शूकर।

तेखअ किऐ तिन्नां रोटी और म्हाछ़लीए चोल़ी करै होछ़ै-होछ़ै ठोर, संघा बोलअ च़ेल्लै लै कि ऐबै बांडा इना सोभी लोगा लै। च़ेल्लै बांडी रोटी और म्हाछ़ली सोभी लोगा लै। सोभी लोगै खाई रज्ज़ी रोटी और तज़ी बी बच़ी पिछ़ू खास्सी रोटी एही।

तेखअ छाल़ी तिन्नैं पिछ़ू बच़ी दी रोटी और तेते भर्हुऐ बारा च़ठै।