29. नर्दैई नोकरे कथ्या

एकी बारी लागअ पतरस ईशू का पुछ़दअ, “मेरै मालक, ज़ै मेरअ भाई-बंध मुल्है ज़ुल्म करे, तेऊ लै केतरी बारी छ़ाडूं माफी, साता बारी?” ईशू बोलअ तेऊ लै, “साता बारीओ सत्तर गुणा कर, संघा कर तेतरी बाई माफ।”

ईशू बोलअ, “परमेशरो राज़ आसा ऐहा कथ्या ज़िहअ कि एकी मालकै बोलअ आपणैं नोकरा लै कि मेरअ साब-कताब कर, किल्हैकि नोकरा तै तेऊए आझ़कै ढबे साबै कोऐ दूई लाख ऋण हुअ द दैणा लै।

पर सह नोकर निं तेऊ ऋणा भरी सकअ और तेऊए मालकै बोलअ इहअ कि एऊए परिबारा पाआ गुलाम बणांईं बेच़ी।

तेऊ नोकरै किई आपणैं तेऊ मालका सेटा अरज़ कि मुल्है दै थोल़अ बगत होर, तेखअ हेरनअ मुंह तेरअ ऋण बैज़ा संघी भरी। मालका फिरी तेऊए झींण और तेऊ किअ तेऊओ सारअ ऋण माफ।

पर ज़ांऊं सह नोकर भितरा का बागै निखल़अ, तेऊ भेटअ बागै सह मणछ ज़हा लै तेऊ आप्पू त ऋण दैनअ द, सह ऋण त कोऐ चिई भिन्नें मज़दूरी बराबर। तेऊ ढाकअ सह गल़ा का संघा लागअ इहअ बोलदअ कि मेरै ढबै दै एभी।

सह मणछ लागअ तेऊ का हाथ-ज़ोल़ी अरज़ करदअ कि थोल़ै थोल़अ बगत दै मुल्है होर तेखअ हेरनअ मुंह तेरअ ऋण बैज़ा संघी भरी। पर तेऊ निं तेऊए एक बी शूंणीं और तेऊ किअ सह कैद।

तेऊ नोकरै ज़िहअ बभार तेऊ मणछा संघै किअ, सह भाल़अ तिधी होरी नोकरै बी, तिंयां डेऊऐ मालका सेटा संघा खोज़ी सारी गल्ला कि तेऊ किअ इहअ।

मालकै शादअ सह नोकर बापस संघा बोलअ तेऊ लै इहअ, “मंऐं किअ तेरअ ऋण माफ किल्हैकि तंऐं किई मुखा हाथ ज़ोल़ी अरज़, ताह बी लागा त तेऊ मणछा संघै तिहअ ई बभार करनअ ज़ुंणीं ताखा त ऋण काढदअ द! मालका आई तेऊ लै खास्सी रोश्शै और सह डाहअ तेभै तैणीं कैद करी ज़ेभै तैणीं सह तेऊओ ऋण भरी निं मुक्कअ।

तेखअ बोलअ ईशू इहअ, “ज़ै तम्हैं आपणैं भाई बंधा दिल्ला का माफ निं करे, तै निं मेरै बाब परमेशरा बी तम्हां लै माफी छ़ाडणीं।”