32. ईशू किअ एक इहअ मणछ नरोगअ, ज़हा भूत त शाचअ द और एक बारा साला ओर्ही लोहू बगणें बमारी आल़ी बेटल़ी नरोगी।

ईशू डेऊऐ किशती दी बेठी करै गरसेनी लोगे लाक्कै बाखा लै, ज़ांऊं किश्ती का धरनीं होथै,

तिधी आअ एक एक मणछ ईशू सेटा लै ठुर्ही, तेऊ त भूत शाचअ द।

तेऊ भूता त एतरअ ज़ोर कि तेऊ मणछा निं कोहै ढाकी सकदअ द। क्ई बारी डाहअ सह लोगै शांघल़ी लोगै पाई बान्हीं पर सह पाआ त तेता बी चोल़ी।

सह मणछ रहा त धैल़-राच लैल़ा-पकारा लांदअ लागी। नां सह घेरी झिकल़ै बान्हदअ त। आपणीं घेरी डाहा त सह काठा-पात्थरा करै क्रिंज़ा पाई लोहू लल़िछ़ी लाई।

ईशू भाल़ी आअ सह मणछ ठुर्ही करै तेऊ सेटा लै संघा धरनीं ठुंईंअ। तेखअ लागअ तेऊ दी शाचअ द सह भूत गल्ला करदअ और ईशू बोलअ तेऊ लै इहअ, “एऊ मणछा का निखल़ पोर्ही।”

पर सह भूत लागअ ज़ोरै-ज़ोरै क्रिंगा पांदअ और इहअ बोलदअ, “हे परम प्रधान परमेशरे शोहरूआ, मुंह ताह संघै किज़ै काम? मेरी आसा ताखा एही अरज़, मुल्है निं सज़ा दैई।” तेखअ बोलअ ईशू तेऊ भूता लै, “ताह नाअं किज़ै आसा?” तेऊ दैनअ ज़बाब, “मुंह नाअं आसा फौज़।” मतलब तिंयां तै खास्सै भूत।

तिंयां भूत लागै ईशू का एही अरज़ करदै, “हाम्हां निं एऊ गराऊंआं का बागै दरल़ाऊई आथी।” तिधी आसा त नेल़ ज़िहअ धारठी सुंगरो छ़ुंढ च़रदअ लागअ द और तिन्नैं भूतै बोलअ इहअ, “हाम्हां छ़ाड इना सुंगरा मांझ़ा लै।” ईशू बोलअ, “ठीक आ डेओआ।”

ज़ांऊं तिंयां भूत तेऊ मणछा का निंखल़ी तिन्नां सुंगरा लै पेठी, सारअ सुंगरो छ़ुंढ बेघरूअ संघा दैनीं धारठी प्रैंदा का समुंदरे डुघी आल़ी और सारअ छ़ुंढ हुअ खतम। तिंयां सुंगर तै कोऐ तूई हज़ार।

तिन्नां सुंगरा गुलाल़ै तै इना सोभी गल्ला भाल़ै लागै दै कि ईशू किज़ै किज़ै किअ। तिंयां ठुर्है तेभी गराऊंआ लै संघा खोज़ी सोभी का सारी गल्ला कि किज़ै-किज़ै हुअ। गरांऊंए लोग आऐ तिधा लै और तिन्नैं भाल़अ कि सह भूत शाचअ द मणछ कि सह आसा राम्बल़अ हई बेठअ द राम्बल़ी गल्ला करदअ लागअ द।

तिंयां लोग तै डरै दै संघा लागै ईशू लै बोलदै, “तूह डेऊ म्हारै लाक्कै का पोर्ही, ज़ांऊं ईशू किश्ती दी बेठदअ लागअ, भूता का नरोगअ हुअ द मणछ लागअ ईशू का अरज़ करदअ कि हुंह बी च़ाल्लअ ताह ई संघै।

पर ईशू किअ तेऊ लै इहअ बोली नांह कि हुंह च़ाहा इहअ कि तू खोज़ इना गल्ला सोभी का घरै-घरै डेऊ कि परमेशरै ताल्है केही झींण किई।

तेखअ डेऊअ सह मणछ आपणैं घर गराऊंआं लै संघा खोज़ी तिंयां सोभै गल्ला कि किहअ करै हुअ सह राम्बल़अ। लोग बी हुऐ इना गल्ला शूंणीं रहैन।

तेखअ आअ ईशू किश्ती दी बेशी समुंदरे दुजै बाढा बाखा लै , ज़ांऊं सह आर बाखा पुजअ; तेतरी गऐ तेऊ फेर खास्सै लोग झाल़्हुई। तिन्नां जैंदरी आसा ती एक एक रोगी बेटल़ी, तैहा ती बारा साला ओर्ही लोहू बगणे बमारी, सह निंस्सी दी केही राम्बल़ी हई। आपणैं ढब्बै बी हेरै तै तैहा लाज़ा-पुआई पिछ़ू पठी खतम करी पर बमारी लागी ती होर बी खास्सी सल्लदी।

तैहा बेटल़ी आसा त ईशूए बारै इहअ शूंणअ द कि ईशू किऐ कई मणछ हर रोगा का नरोगै और हुंबी जाणीं राम्बल़ी हई। तैहा बेटल़ी त इहअ भरोस्सअ कि ज़ै हूह ईशूए झिक़ल़ै बी छ़ुंए; तै जाणीं हुंह राम्बल़ी हई। तैही आई सह लोगा जैंदरी ईशू पिछ़ू, तैहा छ़ुंअ पिछ़ू ईशूए झिकल़ेओ पाल्लअ और सह हुई तेभी नरोगी।

ईशू का गअ थोघ लागी कि तेऊ का निखल़अ बल। ईशू लागअ पिछ़ू फिरी च़ेल्लै का पुछ़दअ, “हुंह कुंणीं छ़ुंअ।” च़ेल्लै बोलअ प्रभू, इधी आसा खास्सै लोग कुंण ज़ाणें जेल्ह-मरेल्ही जैंदरी कसरअ हाथ लागअ, एथ छ़ुंअं तूह कई ज़ण्हैं पर तूह किल्है पुछ़ा, “हुंह कुंणीं छ़ुंअं।”

तेतरी आई सह बेटल़ी डरदी-काम्बदी ईशू सेटा संघा बेठी ठुंईंए ज़ोरै धरनीं। तैहा बोलअ इहअ कि प्रभू मंऐं छ़ुंऐं तम्हैं और हुंह हुई तेभी आपणीं बमारी का नरोगी। ईशू बोलअ तैहा लै, “तंऐं किअ मुंह दी विश्वास; तेता करै हुई तूह नरोगी, ऐबै डेऊ, संघा रहअ आझ़ा पोर्ही खुश।”