35. ईशू खोज़ी कथाहणीं कि बाब आपणैं शोहरू लै किहअ झ़ूरा।

एकी धैल़ै आसा त ईशू खास्सै लोगा का बच़न खोज़दअ लागअ द, तिन्नां खास्सै लोगा मांझ़ै आसा त एक कारै गराहणैं आल़अ मणछ बी और होर बी तै इहै ज़ुंण मूसा गूरै खोज़ै दै बधाने साबै रबाज़ पूरअ निं करदै तै।

यहूदी धर्में गूरू लागै ईशू भाल़ी कि अह ईशू रहा तिन्नां लोगा संघै रल़ी-मिल़ी करै। तिंयां लागै लोगा का इहअ बोलदै कि एऊए गल्ला आसा गलत। ईशू का गआ थोघ लागी कि इंयां किज़ै सोठा। तेता लै समझ़ाऊऐ तेऊ तिंयां एही कथाहणीं खोज़ी करै कि

एकी मणछे तै दूई शोहरू। तेऊए कान्हैं शोहरू बोलअ तेऊ लै, “बाबा मुल्है दै बांड।” तेऊ शादै आपणैं दुहै शोहरू संघा दैनीं सारी ज़ैदात तिन्नां दुही शोहरू लै बांडी।”

कान्हअ शोहरू निखल़अ इहअ बाधू कि शोहरू पाई आपणैं हेस्से सारी ज़ैदात बेच़ी संघा डेऊअ परदेसा लै। तेथ दी किई तेऊ आपणैं तिंयां सारै ढब्बै मौज़-मस्ती लै खतम।

थोल़ी साला बाद पल़अ तेऊ देशै खास्सअ नकाल़ ज़िधी सह कान्हअ शोहरू रहा त। तेऊए ढब्बै मुक्कै पठी और तेऊ का निं रोटी खाणा लै बी किछ़ै बच़अ। तेखअ भेटअ तेऊ किधी सुंगरा च़राऊंणेंओ काम। सह त बेघै दुखी और भुखअ कि तेऊ लागा ती सुंगरा ई संघै रोटी बी खाणीं और सह ई ती तेऊए मज़दूरी।

खिरी लागअ सह आपणैं मनै सोठदअ कि आझ़ हुंह किहअ हुअ! मेरै बाबे घरै निं नोकर-च़ाकरा लै बी खाणैं-पिणें किछ़ै काम्मीं आथी, तज़ी बी आसा हुंह इधी भुखै मर्दअ लागअ द, मुंह डेऊंणअ ऐबै घरा लै आपणैं बाबा सेटा लै फिरी। सह नांईं बी मनें, तेऊ सेटा करनीं मुंह एही अरज़ कि हुंह रहूं तेरअ नोकर बणीं संघा करूं ज़िहअ तूह बोला तिहअ काम।

तेखअ फिरअ सह परदेसा का आपणैं घरा लै बापस, ज़ांऊं सह घरा नेल़ ज़िहअ पुजअ, तेऊए बाबै हेरअ सह दूरा का भाल़ी कि पार आअ मेरअ शोहरू। तेऊओ बाब आअ तेऊ सेटा ठुर्ही करै संघा किई तेऊ लै च़ुंज़ी-माख्खी और पिड्डी मल़्हैची दैई खास्सी झींण।

तेखअ लागअ सह कान्हअ शोहरू बोलदअ, “मंऐं किअ ताल्है और बिधाता लै पाप। हुंह निं तेरअ शोहरू बोल़णैं जोगी आथी!”

पर तेऊए बाबै किअ आपणैं नोकर-च़ाकरा लै हुकम कि नंऊंऐं झिकल़ै आणा संघ बन्हैऊंआं एऊए हाथै सुन्नें मुंदल़ी और खूरै बन्हैंऊंआं नऊंऐं पोलल़ै। तेखअ काटा एऊए घरा लै फिरनें खुशी दी रिठ; आझ़ मनाऊंणीं हाम्हां सोभी खुशी। किल्हैकि मेरअ शोहरू त मरी गअ द, ऐबै हुअ अह मुल्है भिई ज़िऊंदअ।

सोभै लागै खुशी मनांऊंदै पर तेखअ आअ उडै ज़ेठअ शोहरू कामा बणा का घरा लै, सह पल़अ सोच़ा कि आझ़ घरै अह बाज़अ-गुज़अ और नाच़-खेल्ह किज़ू आसा लागअ द?

जांऊं तेऊ का इहअ थोघ लागअ कि भाऊए घरा लै फिरने खुशी दी आसा अह सारअ इंतज़ाम हुअ द, तेऊ फिरै खास्सै रोश्श और सह निस्सअ भितरा लै डेऊई। बाब आअ तेऊ सेटा बागै कि च़ाल्ल बेटैआ आझ़ आअ भाल़ तेरअ भाऊ घरा लै फिरी। पर ज़ेठअ शोहरू निस्सअ मनी।

तेखअ लागअ ज़ेठअ शोहरू आपणैं बाबा लै इहअ बोलदअ, “मंऐं किअ सारी अमरा ज़िहअ तंऐं बोलअ तिहअ काम, तेरी निं मंऐं एक गल्ल बी टाल़ी, पर तंऐं निं मुल्है होछ़ी बाकरी बी काटी कि हुंह बी आपणैं साथी-संघी संघै खुशी मनाऊं! आझ़ आअ अह सारी ज़ैदात नांगै नाल़ै पाई घरा लै फिरी और तंऐं किअ रिठ काटी एऊओ सुआगत!

तेऊऐ बापू बोलअ तेऊ लै मेरै शोहरुआ तूह आसा मूंहैं ही संघै ईधी कबल्अ और ज़ुण मेरअ आसा सह आसा सारअ तेरअ ई, पर ऐभै आसा अह खुशी मनाऊंणीं ज़रूरी किल्हैकि तेरअ भाई गअ ती मरी पर ऐबै आसा सह ज़िऊंदअ, अह ती लूकअ द ऐबै भेटअ हाम्हां अ।” बाबै बोलअ ज़ैठै शोहरू लै, “बेटैआ, तूह आसा भाल़ मुंह ई संघै सदा, ज़ुंण मेरअ आसा सह आसा सोभै तेरअ ई। पर एभै आसा मेरी खुशी मनांऊंणीं भली; किल्हैकि तेरअ अह भाऊ गअ त भाल़ हाम्हां लै मरी और आझ़ हुअ अह ज़िऊंदअ। अह त लुक्कअ द और आझ़ भेटअ अह हाम्हां।”