36. ईशूए काया बधल़ूई

एकी धैल़ै निंयैं ईशू आपणैं चअन च़ेल्लै; पतरस, यहून्ना और याकूब आप्पू संघा। (यहून्नां नांओं अह च़ेल्लअ आसा होर, अह निं सह यहून्ना आथी ज़ुंणीं ईशू लै डुबकी दैनीं ती।) तिंयां डेऊऐ प्राथणां करदै उछ़टी धारा प्रैंदा लै।

ईशू त प्राथणां करदअ ई लागअ द कि तेऊए काया बधल़ूई और तेऊओ मूंह हुअ सुरज़ा ज़िहअ च़मच़मांदअ। तेऊए झिकल़ै हुऐ इहै शेतै कि धरती दी निं तेता खा खास्सअ शेतअ किछ़ै आथी और तेता का लागअ झ़ामण।

तेखअ हुऐ तिधि मूसा और एलिआ गूर प्रगट। तिंयां रहा तै ऐहा धरती तेऊ ज़मानैं का का खास्सी शौआ साला पैहलै। तिंयां लागै ईशूए मौते बारै गल्ला करदै कि येरूशलेम जाणअ सह छ़ेक्कै मरी।

मूसा और एलिआ गूर तै ईशू संघै गल्ला करदै लागै दै कि ईशूए च़ेल्लै पतरसै बोलअ ईशू लै, “प्रभू अह हुअ राम्बल़अ कि हाम्हैं आसा ताह संघै इधी, हाम्हां बणांणैं इधी चअन मंडप, एक ताल्है, एक मूसा लै और एक एलिआ गूरा लै।” पर पतरसा निं आप्पू ई थोघ कि तेऊ किज़ै बोलअ।

ज़ांऊं पतरस इना एही गल्ला करदअ त लागअ द, उझै का आअ एक च़मच़मांदअ बादल़ उंधै और सह घोर्हुअ तिन्नां प्रैंदै। तेखअ शुण्हुंऐं बादल़ा जैंदरा का तिन्नां का इहै बोल, “अह आसा मेरअ शोहरू ज़हा लै हुंह खास्सअ झ़ूरा, हुंह आसा एऊ का खुश, ज़िहअ अह बोला; तिहअ शूणा।” तिंयां चिहै च़ेल्लै डरै संघा बधल़ूऐ तिंयां धरनीं।

तेखअ बोलअ ईशू तिन्नां लै इहअ, “डरा निं आथी।” तेखअ लागै तिंयां फेर भाल़ै, तिधी निं तिन्नां का ईशू छ़ाडी होर किछ़ै शुझुअ।

तेखअ होथै ईशू और तिंयां चिहै च़ेल्लै धारा का उंधै और तेखअ बोलअ ईशु तिन्नां लै इहअ, “ज़ुंण इधी हुअ, एते बारै निं कोही का खोज़ी, ऐबै जाणअ हुंह छ़ेक्कै मरी और तेखअ हणअ हुंह भिई ज़िऊंदअ। तेता बाद लागै तम्हैं लोगा का खोज़दै।