37. ईशू किअ लाजर नांओं मणछ मरी करै भिई ज़िऊंदअ।

एक त लाज़र नांओं मणछ। तेऊए ती दू बैहणीं; एकी नांअ त मरिअम और दुजी नांअ त मार्था। तिंयां डाहा तै ईशू संघै खास्सी साथ संगत। ईशू का खोज़अ कुंणीं इहअ कि लाज़र आसा खास्सअ बमार। ईहअ शूंणीं बोलअ ईशू इहअ, “अह बमारी निं लाज़रे मरी डेऊंणैं करै खतम हणीं, ऐहा बमारी करनै लोग इहै कि तिंयां परमेशरो अदर करे।

ईशू झ़ूरा त तिन्नां लै खास्सअ पर तधू ज़िधी ईशी थिअ; सह रहअ दूई धैल़ै तैणीं तिधी। तेऊ बोलअ आपणैं च़ेल्लै लै इहअ, “च़ाल्ला हाम्हां डेऊंणअ यहूदिआ लाक्कै लै फिरी।” च़ेल्लै लागै इहअ बोलदै, “गुरू, तिधी थोल़ै धैल़ै आजी ई ता तिधी लोग ताह मारनअ च़ाहा तै!” ईशू बोलअ, “म्हारअ साथी लाज़र गअ सुत्ती, मुंह झ़ैऊंणअ सह खल़अ।”

ईशूए च़ेल्लै लागै इहअ बोलदै, “हे प्रभू, ज़ै लाज़र सुत्तअ द आसा, तै जाणअ सह ठीक हई।” तेखअ दैनअ ईशू तिन्नां लै समुखअ बोली, “लाज़र गअ मरी।” मुंह आसा ऐहा गल्ले खुशी कि हुंह निं तिधी आथी त, तै करनअ तम्हां मेरअ विश्वास।

ज़ांऊं ईशू लाज़रे गराऊंऐं पुजअ, लाज़रा मरी गऐ तै च़ार धैल़ै हई। मार्था आई ईशू सेटा लै बागै संघा लागी इहअ बोलदी, “हे प्रभू ज़ै तूह इधी हंदअ, तै निं मेरअ भाई मरदअ त। पर मुंह आसा विश्वास कि ज़िहअ बी तू परमेशरा का मांगे; तेऊ हेरनअ ताल्है दैई।”

ईशू दैनअ तैहा लै ज़बाब, “ज़िऊई उझ़णअ और ज़िन्दगी आसा हुंह। ज़ुंण मुंह दी विश्वास करा; सह ज़ै मरी बी जाए, तैबी हणअ सह ज़िऊंदअ। ज़ुंण मुंह दी विश्वास करे सह निं कधि मरनअ। ताह आसा मुंह दी विश्वास ऐ?” मार्था बोलअ इहअ, “हे प्रभू मुंह आसा विश्वास कि तूह आसा परमेशरो शोहरू मसीहा।”

तेखअ आई मरिअम, तैहा टेक्कअ ईशूए पैरा सेटअ माथअ संघा बोलअ इहअ, “हे प्रभू, ज़ै तूह इधी हंदअ, तै निं मेरअ भाई मरदअ त।” ईशू पुछ़अ तैहा का इहअ, “तम्हैं तेऊए ल्हास किधी आसा डाही दी?” तिन्नैं बोलअ, “घोरी आसा दाबी दी, एछ भाल़ भाल़ै।” ईशू लागअ तेखअ लेरा लांदअ।

सह घोर ती डुआरा ज़ेही और तेते मोहरै दी आसा त एक बडी टोल्ह डाही दी। तिधी पुजी बोलअ ईशू, “ऐहा टोल्हा बदल़ा पोर्ही।” पर मार्था बोलअ इहअ, “तेऊ मरी गऐ आझ़ च़ार धैल़ै हई, ऐबै हणीं ल्हासा का चजैन्ह लागी दी।”

ईशू दैनअ इहअ ज़बाब, “मंऐं तम्हां लै इहअ निं बोलअ कि ज़ै तम्हैं मुंह दी विश्वास करे, तै भाल़णअ तम्हां परमेशरो बल?” तेखअ बदल़ी तिन्नैं सह टोल्ह पोर्ही।

तेखअ लागअ ईशू उझै स्वर्गा बाखा भाल़अ, “हे बाबा, तंऐं शूणीं मेरी एता लै करा हुंह तेरअ शूकर। मुखा आसा थोघ कि तूह शूणां मेरी कबल्ली, पर मंऐं बोलअ इहअ एते तैणीं कि ज़ुंण मुंह सेटा इधी होर आसा; इना लोल़ी त विश्वास हुअ कि हुंह आसा तंऐं ई छ़ाडअ द।” तेखअ लाई ईशू ज़ोरै हाक्का, “ए लाज़र, बागा लै निखल़!”

लाज़र निखल़अ घोरी का बागै! तेऊ फेर ती कुआया पल़ेटी दी। ईशू बोलअ तिधी होरी लै, “ऐहा कुआया खोल्हा एऊए घेरी का पोर्ही, एऊ करा एता का आज़ाद।” एऊ च़मत्कारा भाल़ी किअ क्ई यहूदी ईशू दी विश्वास।

पर यहूदी धर्में मुखियै लागै ईशू लै ज़ीद डाहंदै, तैही किअ तिन्नैं झाल़अ और तिंयां लागै एही जोग करदै कि ईशू और लाज़र पाणैं दुहै मारी।